ഐപിഎൽ 2026 സീസണിൽ ചെന്നൈ സൂപ്പർ കിംഗ്‌സിന് ഇന്ന് സീസണിലെ അവസാന ലീഗ് മത്സരം. പ്ലേ ഓഫിൽ സ്ഥാനം ഉറപ്പാക്കിയ ഗുജറാത്ത് ടൈറ്റൻസാണ് എതിരാളികളായുള്ളത്.

അഹമ്മദാബാദിൽ രാത്രി ഏഴരയ്ക്കാണ് കളി തുടങ്ങുക. ഇന്ന് ജയിച്ചാൽ സിഎസ്‌കെയ്‌ക്ക് പ്ലേ ഓഫിലേക്ക് നേരിയ പ്രതീക്ഷ നിലനിർത്താനാകും. ചെന്നൈ സൂപ്പർ കിംഗ്‌സ് ഇതിഹാസം എം എസ് ധോണി ഇന്നെങ്കിലും കളിക്കാനിറങ്ങുമോ എന്ന ആകാംക്ഷയിലാണ് ആരാധകർ.

പുറത്താകലിൻറെ വക്കിലാണ് മുമ്പ് അഞ്ച് തവണ ഐപിഎൽ ചാമ്പ്യൻമാരായിട്ടുള്ള ചെന്നൈ സൂപ്പർ കിംഗ്‌സ്. പ്ലേ ഓഫ് ഉറപ്പിച്ച ശുഭ്‌മാൻ ഗില്ലിൻറെ ഗുജറാത്ത് ടൈറ്റൻസ് ലക്ഷ്യമിടുന്നത് ഒന്നാം ക്വാളിഫയറിലെ സ്ഥാനം. പോയിൻറ് പട്ടികയിൽ റോയൽ ചലഞ്ചേഴ്‌സ് ബെംഗളൂരു, സൺറൈസേഴ്‌സ് ഹൈദരാബാദ് എന്നിവരോട് മത്സരിക്കുന്ന ഗുജറാത്തിന് ജയത്തിൽ കുറ‌ഞ്ഞതൊന്നും മതിയാവില്ല. കാരണം, ഒന്നാം ക്വാളിഫയറിന് യോഗ്യത നേടുന്ന ടീമുകൾക്ക് ഫൈനലിൽ എത്താൻ രണ്ട് അവസരമുണ്ട്.

ഗുജറാത്തിനെ തോൽപിച്ചാലും മറ്റ് ടീമുകളുടെ മത്സരഫലത്തെ ആശ്രയിച്ചാവും ചെന്നൈയുടെ നേരിയ സാധ്യതയുള്ളത്.