യുഎസിലെ വീട്ടില്‍ ഹൈദരാബാദ് സ്വദേശിയായ യുവാവിനെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. സിവില്‍ എഞ്ചിനീയറായി ജോലി ചെയ്തിരുന്ന മുഹമ്മദ് ജാബര്‍ ഹുസൈനെയാണ് (28) മസാച്ചുസെറ്റ്‌സിലെ ലോവലിലുള്ള വീട്ടിലെ മുറിയില്‍ മരിച്ച നിലയില്‍ കണ്ടെത്തിയത്. യുവാവിന്റെ വിവാഹം കഴിഞ്ഞ് 17 ദിവസം മാത്രമാണായതെന്ന് കുടുംബം പറയുന്നു. ഓഗസ്റ്റ് 28ന് ടെക്‌സാസില്‍ വച്ചാണ് മുഹമ്മദ് ജാബറിന്റെ വിവാഹം നടന്നത്. വിവാഹത്തിന് ശേഷം ജാബര്‍ മസാച്ചുസെറ്റ്‌സിലേക്ക് മടങ്ങിയെന്നും പിതാവ് മുഹമ്മദ് സാക്കിര്‍ ഹുസൈന്‍ പറഞ്ഞു.

എന്നാല്‍ മകന്റെ ഭാര്യ അവനോടൊപ്പം പോയിരുന്നോ എന്നതില്‍ വ്യക്തതയില്ലെന്നും അദ്ദേഹം പറഞ്ഞു. സെപ്റ്റംബര്‍ 14നാണ് ഹുസൈന്‍ അവസാനമായി കുടുംബവുമായി സംസാരിച്ചത്. ഏകദേശം എട്ട് മണിക്കൂറിന് ശേഷം മകന്‍ മരിച്ചെന്ന് ഹുസൈന്റെ റൂംമേറ്റ് അറിയിക്കുകയായിരുന്നെന്നും പിതാവ് പറഞ്ഞു. യൂണിവേഴ്‌സിറ്റി ഓഫ് ന്യൂ ഹെവനില്‍ നിന്ന് സിവില്‍ എഞ്ചിനീയറിങ്ങില്‍ പിജി പഠിക്കാനായാണ് ഹുസൈന്‍ 2021ല്‍ യുഎസിലേക്ക് പോയത്. പഠനത്തിന് ശേഷം യുഎസില്‍ തന്നെ ജോലിയില്‍ പ്രവേശിക്കുകയായിരുന്നു. മകന്റെ മൃതദേഹം നാട്ടിലെത്തിക്കാനായി കുടുംബം കേന്ദ്രസര്‍ക്കാരിന്റെ സഹായം തേടിയിട്ടുണ്ട്. ഇക്കാര്യം അഭ്യര്‍ഥിച്ച് ഹുസൈന്റെ പിതാവ് വിദേശകാര്യ മന്ത്രി എസ്. ജയശങ്കറിന് കത്തയച്ചു.