സംസ്ഥാന ധനമന്ത്രിമാരുടെയും ധനവകുപ്പ് സെക്രട്ടറിമാരുടെയും രണ്ടു ദിവസത്തെ ദേശീയ സമ്മേളനം ഇന്ന് ഡൽഹിയിൽ ആരംഭിക്കും. ഇന്ത്യയുടെ വികസന ലക്ഷ്യമായ 'വികസിത് ഭാരത്' മുൻനിർത്തി, കേന്ദ്രവും സംസ്ഥാനങ്ങളും തമ്മിലുള്ള നയപരമായ സഹകരണവും സാമ്പത്തിക പങ്കാളിത്തവും ചർച്ച ചെയ്യുന്നതിനായിട്ടാണ് സമ്മേളനം. വെള്ളി, ശനി ദിവസങ്ങളിലായി കേന്ദ്ര ധനമന്ത്രാലയത്തിന്റെ ആഭിമുഖ്യത്തിലാണ് ഉന്നതതല യോഗം സംഘടിപ്പിക്കുന്നത്.

കേന്ദ്ര ധനമന്ത്രി നിർമല സീതാരാമൻ യോഗത്തിൽ പങ്കെടുക്കുന്നുണ്ട്. വിവിധ സംസ്ഥാനങ്ങളിലെ മുഖ്യമന്ത്രിമാർ, ധനമന്ത്രിമാർ, ഉന്നതോദ്യോഗസ്ഥർ എന്നിവർ യോഗത്തിൽ സന്നിഹിതനാകുന്നുണ്ട്. കേരളത്തിൽ നിന്ന് മുഖ്യമന്ത്രി വിഡി സതീശൻ പങ്കെടുക്കും. 'ഫിനാൻസിങ് ഇന്ത്യാസ് ജേണി ടുവേർഡ്‌സ് വികസിത് ഭാരത്' എന്ന പേരിൽ നടക്കുന്ന സമ്മേളനം, രാജ്യത്തിന്റെ ഭാവി സാമ്പത്തിക വളർച്ചയ്ക്ക് ആവശ്യമായ വിഭവങ്ങളും നയങ്ങളും ചർച്ച ചെയ്യാൻ അക്കാദമിക ഗവേഷണങ്ങളെയും പ്രായോഗിക നയരൂപീകരണങ്ങളെയും ഒരേ വേദിയിലെത്തിക്കുന്നു.
പതിനഞ്ചാം ധനകാര്യ കമ്മിഷൻ ചെയർമാനും ഇൻസ്റ്റിറ്റ്യൂട്ട് ഓഫ് ഇക്കണോമിക് ഗ്രോത്ത് പ്രസിഡന്റുമായ എൻകെ സിങ് യോഗത്തിന്റെ ഉദ്ഘാടന സമ്മേളനത്തിൽ മുഖ്യപ്രഭാഷകനാകുകയും ചെയ്യും.