ഒപി ജെയ്ഷയ്ക്ക് റിയോയില്‍ മാരത്തണ്‍ ഓടുമ്പോള്‍ വെള്ളമോ ഗ്ലൂക്കോസോ നല്‍കിയില്ലെന്ന ആരോപണത്തില്‍ കേന്ദ്രസര്‍ക്കാര്‍ അന്വേഷണം പ്രഖ്യാപിച്ചു. കായികമന്ത്രാലയം ഇക്കാര്യത്തില്‍ അന്വേഷണം ആരംഭിച്ചിട്ടുണ്ട്. രണ്ടംഗ പാനലാണ് അന്വേഷണം നടത്തുന്നത്. ഒരാഴ്ചയ്ക്കകം അന്വേഷണം നടത്തി റിപ്പോര്‍ട്ട് സമര്‍പ്പിക്കാനാണ് കായികമന്ത്രി നിര്‍ദേശിച്ചിട്ടുള്ളത്.

അന്വേഷണം ആവശ്യപ്പെട്ട് ഇടതു എംപിമാര്‍ കേന്ദ്ര കായികമന്ത്രിയെ കണ്ട് അന്വേഷണം കത്തു നല്‍കിയതിനു പിന്നാലെയാണ് അന്വേഷണം പ്രഖ്യാപിച്ചത്. ഇടതു എംപിമാരായ പി.കെ ശ്രീമതി ടീച്ചര്‍, എ.സമ്പത്ത് എന്നിവര്‍ അടങ്ങുന്ന സംഘമാണ് കേന്ദ്രകായിക മന്ത്രിയെ സന്ദര്‍ശിച്ചത്. ജെയ്ഷയുടെ ആരോപണം ഗൗരവമായി കാണണമെന്നും വേണ്ട നടപടി എടുക്കണമെന്നും എംപിമാര്‍ ആവശ്യപ്പെട്ടിരുന്നു. ഇതിനു തൊട്ടുപിന്നാലെയാണ് അന്വേഷണത്തിന് സമിതിയെ നിയോഗിച്ചു കൊണ്ട് ഉത്തരവിറക്കിയത്.

മാരത്തണ്‍ ഓടുമ്പോള്‍ 42 കിലോമീറ്ററില്‍ ഒരിടത്തു പോലും റിഫ്രഷ്‌മെന്റ് പോയിന്റുകളില്‍ ഇന്ത്യന്‍ ഒഫീഷ്യലുകള്‍ വെള്ളം നല്‍കിയിരുന്നില്ലെന്നു ജെയ്ഷ പരാതിപ്പെട്ടിരുന്നു. 42 കിലോമീറ്റര്‍ ഓടിയ താന്‍ ഒടുവില്‍ ഫിനിഷിംഗ് ലൈനില്‍ തളര്‍ന്നു വീഴുകയായിരുന്നു. മരിച്ചെന്നു തന്നെയാണ് കരുതിയത്. ഇന്നു ജീവിച്ചിരിക്കുന്നത് ഭാഗ്യം കൊണ്ടു മാത്രമാണെന്നും ജെയ്ഷ പറഞ്ഞിരുന്നു. എന്നാല്‍, വെള്ളം വേണ്ടെന്നു ജെയ്ഷ തന്നെയാണ് പറഞ്ഞിരുന്നതെന്ന വിചിത്രമായ വാദമാണ് അത്‌ലറ്റിക്‌സ് അസോസിയേഷന്‍ ഉന്നയിച്ചിരുന്നത്.