സ്കോര്പീന്: സുപ്രധാന രഹസ്യങ്ങള് ചോര്ന്നിട്ടില്ല; ഇന്ത്യന് നാവിക സേന
സ്കോര്പീന് അന്തര്വാഹിനികളുടെ സുപ്രധാന രഹസ്യങ്ങള് ചോര്ന്നിട്ടില്ലെന്നു ഇന്ത്യന് നാവികസേന. രാജ്യസുരക്ഷയുമായി ബന്ധപ്പെട്ട വിഷയമായതിനാല് ആഭ്യന്തരതലത്തിലും രാജ്യാന്തരതലത്തിലും അന്വേഷണം നടത്തും. ഫ്രാന്സുമായുളള നയതന്ത്രബന്ധം ഉപയോഗിച്ചാകും അന്വേഷണമെന്നും നാവികസേന അറിയിച്ചു. വിഷയത്തെ അതീവ ഗൗരവത്തോടെയാണു ഫ്രഞ്ച് സര്ക്കാര് കാണുന്നതെന്ന് ഇന്ത്യയിലെ ഫ്രഞ്ച് അംബാസഡര് ഫ്രാന്സ്വ റിച്ചര് പറഞ്ഞു.
അതേസമയം, സ്കോര്പീന് അന്തര്വാഹിനികളുടെ രഹസ്യങ്ങള് ചോര്ന്ന വിഷയത്തില് ഇന്ത്യ, ഫ്രഞ്ച് ആയുധ കമ്പനിയുടെ വിശദീകരണം തേടി. സമഗ്ര അന്വേഷണത്തിന് ഇന്ത്യ പ്രത്യേക സംഘത്തെ ഫ്രാന്സിലേക്ക് അയക്കും. അന്തര്വാഹിനി നിര്മിച്ച ഡിസിഎന്എസ് കമ്പനിയില് പരിശോധന അടക്കം നടപടികള്ക്കാണ് ഇന്ത്യയുടെ ശ്രമം.
സ്കോര്പീന് അന്തര്വാഹിനികളുടെ തന്ത്രപ്രധാന രഹസ്യങ്ങള് ചോര്ന്നത് ഇന്ത്യയില് നിന്നല്ല എന്നാണു നാവികസേനയുടെ കണ്ടെത്തല്. രഹസ്യവിവരങ്ങള് അടങ്ങിയ 22,000 പേജുകള് ചോര്ന്നതു ഫ്രാന്സിലെ തങ്ങളുടെ ആസ്ഥാനത്തു നിന്നല്ലെന്ന് അന്തര്വാഹിനികളുടെ നിര്മാതാക്കളായ ഡിസിഎന്എസും വിശദീകരിക്കുന്നു. ഇതോടെയാണ് ഇന്ത്യ അന്തര്വാഹന നിര്മാണകമ്പനിയുടെ വിശദീകരണം തേടിയത്.
രഹസ്യങ്ങള് ചോര്ന്നത് എവിടെനിന്നാണെന്നു കണ്ടെത്താന് ഫ്രഞ്ച് പ്രതിരോധ വിഭാഗവും അന്വേഷണം തുടങ്ങി. അതേസമയം, അന്തര്വാഹിനികള് നിര്മിക്കുന്ന മുംബൈയിലെ കേന്ദ്രത്തില് നാവികസേന ഉന്നത ഉദ്യോഗസ്ഥര് പരിശോധന നടത്തി. ഡിസിഎന്എസ് കമ്പനിക്കു കരാര് നല്കിയ മറ്റു രാജ്യങ്ങളും ആശങ്കയിലാണ്.
https://www.facebook.com/Malayalivartha
