പിതാവും സഹോദരനും തന്നെ കൊല്ലുമെന്ന് ട്രെയിനിലെ ടോയ്ലെറ്റില് നിന്നും മൊബൈല് വീഡിയോ വഴി യുവതി റെക്കോര്ഡ് ചെയ്തു; മണിക്കൂറുകള്ക്കകം കൊല്ലപ്പെട്ടു
ഓടുന്ന തീവണ്ടിയുടെ ടോയ്ലെറ്റില് മൊബൈല് ക്യാമറ ഓണാക്കി ആ യുവതി പറഞ്ഞു. 'പിതാവും സഹോദരനും എന്നെ കൊല്ലാന് ആഗ്രഹിക്കുന്നു, അവര് എന്നെ നിര്ബന്ധപൂര്വം ഗ്രാമത്തിലേക്ക് കൊണ്ടുപോകുകയാണ്. എന്റെ ജീവന് അപകടത്തിലാണ്. എനിക്കെന്തെങ്കിലും സംഭവിക്കുകയാണെങ്കില് അതിന്റെ ഉത്തരവാദിത്വം അവര്ക്കായിരിക്കും. ഞാന് ഇമ്രാനെ വിവാഹം കഴിക്കാന് ആഗ്രഹിക്കുന്നു..' ചൊവ്വാഴ്ച പ്രത്യക്ഷപ്പെട്ട ഈ വീഡിയോ സാമൂഹികമാധ്യമങ്ങളില് വൈറല് ആയിരിക്കുകയാണ്. പക്ഷേ വിഡിയോയില് പ്രത്യക്ഷപ്പെട്ട സോണിയെന്ന(26) യുവതി അപ്പോഴേക്കും മരിച്ചിരുന്നു.
വിഡിയോ ക്ലിപ്പിന്റെ അടിസ്ഥാനത്തില് പൊലീസ് ബന്ധുക്കള്ക്കെതിരെ കേസെടുത്തു. പടിഞ്ഞാറന് ഉത്തര്പ്രദേശിലെ ഹത്രാസിലുള്ള സോണിയുടെ മാതാപിതാക്കളും നാലു സഹോദരങ്ങളും അടക്കം ആറു പേര്ക്കെതിരായാണ് എഫ്.ഐ.ആര് രജിസ്റ്റര് ചെയ്തത്. എല്ലാ പ്രതികളും ഒളിവിലാണ്. എന്നാല് യുവതിയുടെ മരണം സ്വഭാവികമാണോ കൊലപാതകമാണോ എന്നത് സംബന്ധിച്ച് അവ്യക്തതയുണ്ട്. സംസ്കരിച്ച മൃതശരീരം പുറത്തെടുത്ത പൊലീസ് പോസ്റ്റ്മോര്ട്ടം നടത്തി. തുടര്ന്ന് ചില സാമ്പിളുകള് ഫോറന്സിക് പരിശോധനക്കായി അയച്ചു.
കഴിഞ്ഞ വെള്ളിയാഴ്ചയാണ് യുവതി മരണപ്പെട്ടതായി കുടുംബം വെളിപ്പെടുത്തിയത്. എന്നാല് സോണിയുടെ മരണകാരണം കുടുംബം വെളിപ്പെടുത്തിയിരുന്നില്ല. ഏതാനും ദിവസം മുമ്പ് സോണി കുടുംബത്തോടൊപ്പം ഗ്രാമത്തില് എത്തിയാതായി അയല്വാസികള് പറയുന്നു. 'പെണ്കുട്ടി മരിച്ചതായി അറിഞ്ഞപ്പോള് രാവിലെ അഞ്ച് മണിയോടെ ഞങ്ങള് അവരുടെ വീട്ടിലെത്തി. വെള്ളിയാഴ്ചയായിരുന്നു സംഭവം. തുടര്ന്ന് ഇസ്ലാമിക ആചാരങ്ങള് പ്രകാരം അവളെ അടക്കം ചെയ്തു പെണ്കുട്ടിയുടെ അയല്വാസിയായ മുഹമ്മദ് ഷാഹിദ് വ്യക്തമാക്കി.
യുവതി വീഡിയോയില് പരാമര്ശിച്ച ഇമ്രാന് എന്നയാളെ അന്വേഷിച്ച് ഒരു പോലീസ് ടീം മുംബൈയിലേക്ക് തിരിച്ചു. ഈ വീഡിയോ പകര്ത്തിയത് എപ്പോഴാണെന്ന് വ്യക്തതയില്ല. വീഡിയോ ചിത്രീകരിക്കാന് ആരോ യുവതിയെ സഹായിച്ചതായി പോലീസ് സംശയിക്കുന്നു.
https://www.facebook.com/Malayalivartha
