തമിഴ്‌നാട്ടില്‍ വ്യാജ ബാങ്ക് നടത്തിയവര്‍ പിടിയില്‍. തമിഴ്‌നാട്ടിലെ ധര്‍മപുരിയിലാണ് സംഭവം. നാല് പേര് ചേര്‍ന്ന് ആരംഭിച്ച ബാങ്ക് രണ്ട് മാസത്തോളം പ്രവര്‍ത്തിച്ചു. 1.60 ലക്ഷം രൂപയുടെ നിക്ഷേപവും വ്യാജ ബാങ്ക് ഇടപാടുകാരില്‍ നിന്ന് സ്വീകരിച്ചു. യെസ് ബാങ്കിനെ അനുകരിച്ച് യെസ് എ.ബി.എസ് ബാങ്ക് എന്ന പേരിലാണ് വ്യാജ ബാങ്ക് പ്രവര്‍ത്തിച്ചത്.
യെസ് ബാങ്കിന്റെ ലോഗോ ദുരുപയോഗം ചെയ്താണ് വ്യാജ ബാങ്ക് പ്രവര്‍ത്തിച്ചത്. തങ്ങളുടെ പേരും ലോഗോയും ഉപയോഗിച്ച് വ്യാജ ബാങ്ക് പ്രവര്‍ത്തിക്കുന്നതായി വിവരം ലഭിച്ചതിന്റെ അടിസ്ഥാനത്തില്‍ യെസ് ബാങ്കിന്റെ സേലം ശാഖ മാനേജര്‍ പരാതി നല്‍കിയതോടെയാണ് വ്യാജ ബാങ്ക് നടത്തിയവര്‍ പിടിയിലായത്. സോമസുന്ദരന്‍ എന്നയാളിന്റെ നേതൃത്വത്തിലാണ് വ്യാജ ബാങ്ക് പ്രവര്‍ത്തിച്ചത്. ഇയാളായിരുന്നു വ്യാജ ബാങ്കിന്റെ സി.ഇ.ഒ.
യെസ് ബാങ്കിന്റെ ധര്‍മപുരി ബിസിനസ് കറസ്‌പോണ്ടന്റ് ആയിരുന്നു സോമസുന്ദരന്‍. ഇതേതുടര്‍ന്നാണ് ബാങ്ക് തുടങ്ങാന്‍ ഇയാള്‍ തീരുമാനിച്ചത്. 83 അക്കൗണ്ടുകളാണ് ഇവര്‍ രണ്ട് മാസം കൊണ്ട് ഇവര്‍ സ്വീകരിച്ചത്. പ്രദേശത്തെ ഒരു പ്രസില്‍ നിന്നാണ് ചലാന്‍ ഉള്‍പ്പെടെയുള്ള രേഖകള്‍ അച്ചടിച്ചിരുന്നത്.