ഇഎസ്‌ഐ ആനുകൂല്യത്തിനുള്ള ശമ്പളപരിധി 15,000 രൂപയില്‍ നിന്ന് 21,000 രൂപയായി ഉയര്‍ത്താനും ഒരിക്കല്‍ ഇഎസ്‌ഐ ആനൂകൂല്യം ലഭിച്ചവര്‍ക്കു സേവനകാലം മുഴുവന്‍ അതിനര്‍ഹത നല്‍കാനും ഇഎസ്‌ഐ കോര്‍പറേഷന്‍ ബോര്‍ഡ് യോഗത്തില്‍ തീരുമാനിച്ചു. ഇഎസ്‌ഐ കോര്‍പറേഷനിലെ ഡോക്ടര്‍മാരുടെ വിരമിക്കല്‍ പ്രായം അറുപതില്‍ നിന്ന് 65 ആക്കി ഉയര്‍ത്താനും കോര്‍പറേഷന്‍ തീരുമാനിച്ചു.
ശമ്പളപരിധി 21,000 രൂപയിലധികമായാലും ഇഎസ്‌ഐ ആനുകൂല്യം നിലനിര്‍ത്താന്‍ ആഗ്രഹിക്കുന്ന ജീവനക്കാര്‍ക്ക് അങ്ങനെ ചെയ്യാം. അത്തരം ജീവനക്കാര്‍ക്ക് 21,000 രൂപ ശമ്പളം കണക്കാക്കിയാകും വിഹിതം ഈടാക്കുക. ജീവനക്കാര്‍ക്കിടയില്‍ ഇഎസ്‌ഐ ആനൂകൂല്യം കൂടുതല്‍ വ്യാപകമാക്കാനാണു തീരുമാനം.
കേന്ദ്ര സര്‍ക്കാര്‍ സേവനത്തിലുള്ള ഡോക്ടര്‍മാരുടെ വിരമിക്കല്‍ പ്രായം 65 ആക്കി ഉയര്‍ത്താനുള്ള കേന്ദ്ര മന്ത്രിസഭാ തീരുമാനമനുസരിച്ചാണ് ഇഎസ്‌ഐ കോര്‍പറേഷനിലും ഡോക്ടര്‍മാരുടെ വിരമിക്കല്‍ പ്രായം 65 ആക്കിയത്. കേന്ദ്ര തൊഴില്‍ സഹമന്ത്രി ബണ്ഡാരു ദത്താത്രേയയുടെ അധ്യക്ഷതയില്‍ ചേര്‍ന്ന ഇഎസ്‌ഐ കോര്‍പറേഷന്‍ ബോര്‍ഡ് യോഗത്തില്‍ തൊഴിലാളി യൂണിയന്‍ പ്രതിനിധികളായ വി.രാധാകൃഷ്ണന്‍ (ബിഎംഎസ്), സുരേഷ് ബാബു (ഐഎന്‍!ടിയുസി) തുടങ്ങിയവര്‍ പങ്കെടുത്തു.