ഇന്ത്യന്‍ വ്യോമസേനയുടെ മിഗ് 21 വിമാനം ശ്രീനഗറില്‍ വിമാനത്താവളത്തില്‍ ലാന്‍ഡിങിനിടെ തെന്നിമാറി. എന്നാല്‍ പൈലറ്റ് പരിക്കുകള്‍ കൂടാതെ രക്ഷപ്പെട്ടു. വിമാനം റണ്‍വെയില്‍ നിന്ന് 200 മീറ്റര്‍ പുറത്തേക്ക് തെന്നി മാറിയെങ്കിലും അപകടം ഒന്നും സംഭവിച്ചില്ല.
ചൊവ്വാഴ്ച ഉച്ചയോടെയാണ് സംഭവം. സാങ്കേതിക തകരാര്‍ മൂലം വിമാനം അടിയന്തരമായി ലാന്‍ഡ് ചെയ്യുകയായിരുന്നു. അടിയന്തര ലാന്‍ഡിംഗ് മൂലം വിമാനത്തിന്റെ ചക്രങ്ങള്‍ കരിഞ്ഞിട്ടുണ്ട്. റണ്‍വേയ്ക്ക് കേടുപാടുകള്‍ സംഭവിച്ചതുമൂലം ശ്രീനഗര്‍ വിമാനത്താവളത്തിലെ ചൊവ്വാഴ്ചത്തെ എല്ലാ സര്‍വീസുകളും റദ്ദാക്കി.
പൈലറ്റിന്റെ സമയോചിതമായ ഇടപ്പെടലാണ് വന്‍ ദുരന്തം ഒഴിവാക്കിയതെന്നും അധികൃതര്‍ അറിയിച്ചു. ശ്രീനഗറില്‍ നിന്നും 12 കിലോമീറ്റര്‍ അകലെയുള്ള വിമാനത്താവളത്തില്‍ ആഴ്ചയില്‍ 560 ഓളം വിമാനങ്ങളാണ് വന്നുപോകുന്നത്.