യജമാനന്റെ ജീവനും പണവും മോഷ്ടാക്കളില് നിന്നും രക്ഷിച്ച വളര്ത്തു നായ! കള്ളന്മാര് അഞ്ച് പേരും ജീവനും കൊണ്ടോടി
കോളജ് പ്രൊഫസറായ യജമാനനെ ആക്രമിച്ച ശേഷം പണവും സ്വര്ണവും അപഹരിക്കാന് ശ്രമിച്ച അഞ്ചംഗ മോഷ്ടാക്കളെ വളര്ത്തു നായ നേരിടുകയും യജമാനനെ രക്ഷപ്പെടുത്തുകയും ചെയ്തു.
ബംഗളൂരിലെ മഹാലക്ഷ്മി ലേയൗട്ടിന് സമീപം ചൊവ്വാഴ്ച പുലര്ച്ചെ അഞ്ചര മണിക്കാണ് സംഭവം. 52 കാരനായ പ്രൊഫസര് സ്ഥിരമായി മഹാലക്ഷ്മി ലേയൗട്ടിന് സമീപമുള്ള നന്ദിനി മില്ക്ക് പാര്ലറില് പാല് വാങ്ങാന് പോകാറുണ്ട്. മിക്ക ദിവസങ്ങളിലും അദ്ദേഹത്തിന്റെ വളര്ത്തു നായയായ ലിയോയും കൂടെ പോകുമായിരുന്നു. സംഭവ ദിവസവും ലിയോ കൂടെയുണ്ടായിരുന്നു. അതാണ് അദ്ദേഹത്തിന് രക്ഷയായത്.
ചൊവ്വാഴ്ച പാല് വാങ്ങി സ്കൂട്ടറില് വരുമ്പോഴായിരുന്നു ഒരു സംഘമാളുകള് കാറില് വന്നു തടഞ്ഞുനിര്ത്തിയ ശേഷം കവര്ച്ചക്ക് ശ്രമിച്ചത്.
കാറ് കുറുകെ വന്ന് നിര്ത്തിയ ശേഷം ഒരാള് കത്തിയും മറ്റൊരാള് വടിവാളുമായി അക്രമിക്കാന് ശ്രമിക്കുകയായിരുന്നു. കത്തി കഴുത്തില് വെച്ച അക്രമി മാലയും പൈസയും എല്ലാം കൊടുക്കാന് ആവശ്യപ്പെട്ടു.
എല്ലാം തരാമെന്നും ഒന്നും ചെയ്യരുതെന്നും പറഞ്ഞ് പ്രൊഫസര് അക്രമികള്ക്ക് കൊടുക്കാനായി മാല അഴിക്കുമ്പോഴേക്കും ലിയോ കവര്ച്ചക്കാരെ നേരിട്ടിരുന്നു. ഒരാളെ കൈകാര്യം ചെയ്ത ലിയോ ബാക്കിയുള്ളവരേയും ആക്രമിക്കാന് ഒരുങ്ങി. അപ്പോഴേക്കും അക്രമികള് അഞ്ച് പേരും ഓടി രക്ഷപ്പെട്ടു. ലിയോ രക്ഷിച്ചത് കൈവശമുണ്ടായിരുന്ന അഞ്ച് ലക്ഷം രൂപയുടെ സ്വര്ണം മാത്രമല്ല തന്റെ ജീവന് കൂടിയാണെന്ന് പ്രൊഫസര് പറഞ്ഞു. സംഭവം സംബന്ധിച്ച് മഹാലക്ഷ്മി ലേയൗട്ട് പോലീസില് ഇദ്ദേഹം പരാതി നല്കി.
https://www.facebook.com/Malayalivartha
