ഏഴ് വയസുകാരനെ കൊലപ്പെടുത്തിയ സംഭവത്തില്‍ സ്‌കൂളിനെതിരെ നടപടി ആവശ്യപ്പെട്ട് രക്ഷിതാക്കള്‍ രംഗത്ത്
ഏഴ് വയസുകാരനെ കഴുത്തറുത്ത് കൊലപ്പെടുത്തിയ സംഭവത്തില്‍ സ്‌കൂള്‍ ബസ് കണ്ടക്ടര്‍ അശോകിനെ പൊലീസ് അറസ്റ്റ് ചെയ്‌തെങ്കിലും കൂടുതല്‍ നടപടി ആവശ്യപ്പെട്ട് കുട്ടിയുടെ പിതാവ് രംഗത്തെത്തി. സ്‌കൂളിനെതിരെ ശക്തമായി നടപടി സ്വീകരിക്കണമെന്ന് ആവശ്യപ്പെട്ട് കൊല്ലപ്പെട്ട പ്രഥുമന്‍ താക്കൂറിന്റെ പിതാവ് വരുണ്‍, ഗുര്‍ഗാവ് പൊലീസ് കമ്മീഷണര്‍ക്ക് പരാതി നല്‍കി.
ഗുര്‍ഗാവിലെ റിയാന്‍ ഇന്റര്‍ നാഷണല്‍ സ്‌കൂളിലെ രണ്ടാം ക്‌ളാസ് വിദ്യാര്‍ത്ഥിയായ പ്രഥുമന്‍ താക്കൂറിനെ ഇന്നലെയാണ് കൊല ചെയ്യപ്പെട്ട നിലയില്‍ സ്‌കൂള്‍ ടോയ്‌ലറ്റില്‍ കണ്ടെത്തിയത്. സ്‌കൂള്‍ വിദ്യാര്‍ത്ഥികള്‍ക്ക് അടിസ്ഥാന സുരക്ഷിതത്വം പോലും ഇവിടെ നല്‍കുന്നില്ലെന്നും പിന്നെ എങ്ങനെയാണ് രക്ഷിതാക്കള്‍ കുട്ടികളെ സ്‌കൂളിലേക്ക് അയക്കുകയെന്നും വരുണ്‍ പരാതിയില്‍ പറയുന്നു.
വരുണിനെ കൂടാതെ സ്‌കൂളിലെ മറ്റ് വിദ്യാര്‍ത്ഥികളുടെ രക്ഷിതാക്കളും സ്‌കൂളിനെതിരെ നടപടിയെടുക്കണമെന്ന് ആവശ്യപ്പെട്ട് രംഗത്തെത്തിയിട്ടുണ്ട്. ഏഴ് വയസുകാരന്‍ കൊല്ലപ്പെട്ട സംഭവത്തില്‍ സ്‌കൂള്‍ ബസ് കണ്ടക്ടറായ അശോകിനെ കഴിഞ്ഞ ദിവസം അറസ്റ്റ് ചെയ്തിരുന്നു. മരിച്ച വിദ്യാര്‍ത്ഥിയെ കണ്ടക്ടര്‍ ലൈംഗികമായി ഉപയോഗിച്ച് വരികയായിരുന്നെന്നും കുട്ടിയെ കൊല്ലുന്നതിന്റെ തലേദിവസം ലൈംഗിക ചൂഷണത്തിന് വിധേയമാക്കിയിരുന്നെന്നും പൊലീസ് വ്യക്തമാക്കി.
ഇന്നലെ രാവിലെ 8.30നാണ് കുട്ടിയുടെ മൃതദേഹം കണ്ടെത്തിയത്. ഒരു വസ്ത്ര വ്യാപാരസ്ഥാപനത്തിലെ ക്വാളിറ്റി മാനേജരായ വരുണാണ് പ്രഥുമന്റെ അച്ഛന്‍. പതിവ് പോലെ ഇയാള്‍ തന്നെയാണ് മകനെ സ്‌കൂളില്‍ കൊണ്ട് വിട്ടത്.
https://www.facebook.com/Malayalivartha
