രാജ്യത്തെ കോടിക്കണക്കിന് വരുന്ന ജനങ്ങളുടെ യാത്രാസ്വപ്നങ്ങള്‍ക്ക് വഴിമരുന്നേകി ഇന്ത്യന്‍ റെയില്‍വേ വേഗത്തിന്റെ പാളത്തിലേറി കുതിക്കാനൊരുങ്ങുന്നു. നിലവില്‍ രാജ്യത്തുള്ള റെയില്‍വേ സംവിധാനങ്ങളെ കവച്ചുവയ്ക്കാന്‍ കഴിയുന്ന ബുള്ളറ്റ് ട്രെയിന്‍ പദ്ധതിക്ക് വ്യാഴാഴ്ച തുടക്കമാകും. ഇന്ത്യയിലെ ആദ്യത്തെ ബുള്ളറ്റ് ട്രെയിന്‍ പദ്ധതിക്ക് പ്രധാനമന്ത്രി നരേന്ദ്ര മോദിയും ജാപ്പനീസ് പ്രധാനമന്ത്രി ഷിന്‍സോ ആബെയും ചേര്‍ന്ന് തറക്കല്ലിടും. മോദിയുടെ നാടായ ഗുജറാത്തിലെ അഹമ്മദാബാദിലാണ് പദ്ധതി തുടങ്ങുന്നത്.

കാലങ്ങള്‍ പഴക്കമുള്ള ഇന്ത്യയിലെ റെയില്‍വേ സംവിധാനത്തില്‍ പൊളിച്ചെഴുത്ത് നടത്തുമെന്നും കോടികളുടെ നിക്ഷേപം ഈയിനത്തില്‍ നടത്തുമെന്നും മോദി തന്റെ തിരഞ്ഞടുപ്പ് പ്രചാരണ വേളയില്‍ പറഞ്ഞിരുന്നു. ഇവയിലൊന്ന് ബുള്ളറ്റ് ട്രെയിന്‍ സ്ഥാപിക്കുമെന്നായിരുന്നു. സ്ഥാനമേറ്റെടുത്തത് മുതല്‍ ഇതിനായി പ്രവര്‍ത്തനം തുടങ്ങിയിരുന്നെങ്കിലും പല സാങ്കേതിക കാരണങ്ങളാല്‍ പദ്ധതി നീണ്ടുപോയി. എന്നാല്‍ ഇതിനെയെല്ലാം മറികടന്ന് സെപ്തംബര്‍ 14ന് ഇന്ത്യയുടെ വ്യവസായിക നഗരമായ അഹമ്മദാബാദില്‍ പദ്ധതിയുടെ തറക്കല്ലിടല്‍ ചടങ്ങ് നടക്കുമെന്ന് ഗുജറാത്ത് സര്‍ക്കാര്‍ പ്രസ്താവനയില്‍ അറിയിച്ചു.

മണിക്കൂറില്‍ 320 കിലോമീറ്റര്‍ വേഗതയില്‍ സഞ്ചരിക്കുന്ന ബുള്ളറ്റ് ട്രെയിനുകളാണ് മുംബയ് അഹമ്മദാബാദ് പാതയില്‍ സര്‍വീസ് നടത്താനുദ്ദേശിക്കുന്നത്. ബുള്ളറ്റ് ട്രെയിനിന് രണ്ട് മണിക്കൂര്‍ കൊണ്ട് മുംബയില്‍ നിന്ന് അഹമ്മദാബാദില്‍ എത്താന്‍ കഴിയുമെന്നാണ് കരുതുന്നത്. ഈ റൂട്ടില്‍ ഒരു എക്‌സ്പ്രസ് ട്രെയിന്‍ ഏഴ് മണിക്കൂറാണ് യാത്രയ്‌ക്കെടുക്കുന്നത്. 997,636 കോടി രൂപ ചെലവ് പ്രതീക്ഷിക്കുന്ന പദ്ധതി 2023ല്‍ പൂര്‍ത്തീകരിക്കാനാവുമെന്നാണ് കരുതുന്നത്. പദ്ധതി ചെലവിന്റെ 81 ശതമാനവും ജപ്പാന്‍ വായ്പയായി നല്‍ക്കുന്നതാണ്. ഇത് 50 വര്‍ഷം കൊണ്ട് തിരിച്ചടയ്ക്കണമെന്നാണ് കരാര്‍.

ബുള്ളറ്റ് ട്രെയിന്‍ കടലിനടിയിലൂടെയും ഓടും

500 കിലോമീറ്ററോളം വരുന്ന പാതയില്‍ ബുള്ളറ്റ് ട്രെയിനിന്റെ 21 കിലോമീറ്റര്‍ യാത്ര കടലിനടിയിലെ ടണലിലൂടെ ആയിരിക്കും. താനെ വിരാര്‍ ഭാഗത്താണ് കടലിനടിയിലൂടെ പാത കടന്നുപോവുക.