ശശികലയെ പുറത്താക്കാന് അണ്ണാ ഡിഎംകെ ജനറല് കൗണ്സില് ഇന്ന് ചെന്നൈയില്
പാര്ട്ടിയിലെ തര്ക്കം കോടതി കയറിയതിനു പിന്നാലെ അണ്ണാ ഡിഎംകെയുടെ നിര്ണായക ജനറല് കൗണ്സില് ഇന്ന് ചെന്നൈയില് നടക്കും. ശശികലയെ പാര്ട്ടിയുടെ ഇടക്കാല ജനറല് സെക്രട്ടറി സ്ഥാനത്തുനിന്നും പുറത്താക്കികൊണ്ട് പ്രമേയം പാസാക്കിയേക്കും. ജനറല് കൗണ്സില് തടയണമെന്ന ദിനകരന് വിഭാഗത്തിന്റെ ആവശ്യം മദ്രാസ് ഹൈക്കോടതി ഡിവിഷന് ബെഞ്ചും ഇന്നലെ തള്ളിയിരുന്നു. അതേസമയം, സര്ക്കാരിനെ വീഴ്ത്തുമെന്ന മുന്നറിയിപ്പുമായി ടി.ടി.വി.ദിനകരനും നിലപാട് കടുപ്പിച്ചു.
ജനറല് കൗണ്സിലും എക്സിക്യൂട്ടീവ് കമ്മറ്റിയും നടക്കുന്ന ചെന്നൈ മധുരവയല് വാ നഗരത്തില് കനത്ത സുരക്ഷയാണ് ഒരുക്കിയിരിക്കുന്നത്. രണ്ടായിരത്തി അഞ്ഞൂറിലധികം ഭാരവാഹികള് പങ്കെടുക്കുമെന്നാണ് സൂചന. പാര്ട്ടി മേല്നോട്ടത്തിനായി രൂപീകരിച്ച സ്റ്റിയറിങ് കമ്മിറ്റിയുടെ സെക്രട്ടറിയായി ഉപമുഖ്യന്ത്രി ഒ.പനീര്സെല്വത്തേയും ഡെപ്യൂട്ടി സെക്രട്ടറിയായി മുഖ്യമന്ത്രി എടപ്പാടി പളനിസാമിയേയും തിരഞ്ഞെടുത്ത നടപടിക്ക് യോഗം അംഗീകാരം നല്കും. പാര്ട്ടിയില് ഒ.പി.എസിനും ഇ.പി.എസിനുമുള്ള സ്വാധീനം ദൃഢപ്പെടുത്തുന്ന തീരുമാനങ്ങളാവും പ്രധാനമായും ഉണ്ടാവുക.
നേരത്തെ, രാത്രിവരെ നീണ്ട നിയമപോരാട്ടത്തിനൊടുവിലാണ് അണ്ണാ ഡിഎംകെ ജനറല് കൗണ്സില്, എക്സിക്യൂട്ടീവ് യോഗങ്ങള് തടയണമെന്ന ദിനകരന് പക്ഷത്തിന്റെ ഹര്ജി മദ്രാസ് ഹൈക്കോടതി ഡിവിഷന് ബെഞ്ചും തള്ളിയത്. പി.വെട്രിവേല് എംഎല്യുടെ ഹര്ജി രാവിലെ തന്നെ സിംഗിള് ബെഞ്ച് തള്ളുകയും കോടതിയുടെ സമയം നഷ്ടമാക്കിയതിന് ഒരുലക്ഷം രൂപ പിഴ വിധിക്കുകയും ചെയ്തിരുന്നു. ഇതിനെതിരെ വെട്രിവേല് ചീഫ് ജസ്റ്റിസിനെ സമീപിച്ചതോടെയാണു ഹര്ജി ഡിവിഷന് ബെഞ്ചിനു കൈമാറിയത്. രാത്രിവരെ നീണ്ട വാദം കേള്ക്കലിനൊടുവില് സിംഗിള് ബെഞ്ച് വിധി ശരിവയ്ക്കുകയായിരുന്നു.
https://www.facebook.com/Malayalivartha
