ഇന്ത്യയിലെ വ്യാജ കറന്‍സി അച്ചടിച്ച് കടത്തുന്ന കാര്യത്തില്‍ പാകിസ്ഥാനെ കടത്തിവെട്ടി ബംഗ്‌ളാദേശ് മുന്നിലെത്തി. 500, 1000 രൂപാ നോട്ടുകള്‍ കേന്ദ്ര സര്‍ക്കാര്‍ നിരോധിച്ചതിന് ശേഷം പാകിസ്ഥാനില്‍ നിന്നുള്ള കള്ളനോട്ട് കടത്ത് കുറഞ്ഞിരുന്നു. എന്നാല്‍, അതിര്‍ത്തി രക്ഷാസേനയുടെ ഏറ്റവും പുതിയ റിപ്പോര്‍ട്ട് അനുസരിച്ച് ബംഗ്‌ളാദേശാണ് പുതിയ 2000 രൂപയുടെ വ്യാജ നോട്ടുകള്‍ അച്ചടിച്ച് കടത്തുന്നത്.

ജമ്മു, പഞ്ചാബ്, പശ്ചിമ ബംഗാള്‍, ആസാം, മേഘാലയ എന്നീ അതിര്‍ത്തി സംസ്ഥാനങ്ങള്‍ വഴിയാണ് പാകിസ്ഥാന്‍, ബംഗ്‌ളാദേശ് എന്നീ രാജ്യങ്ങളില്‍ നിന്ന് വ്യാജ കറന്‍സികള്‍ ഇന്ത്യയിലേക്ക് കടത്തിയിരുന്നത്. എന്നാല്‍, ജനുവരി മുതല്‍ ആസാമിലും ബംഗാളിലും മാത്രമാണ് കള്ളനോട്ട് കടത്ത് വര്‍ദ്ധിച്ചത്.

കഴിഞ്ഞ വര്‍ഷത്തെ അപേക്ഷിച്ച് ഈ ജനുവരി മുതല്‍ ആറ് മാസത്തെ കണക്കെടുത്താല്‍ ബി.എസ്.എഫ് പിടികൂടിയ വ്യാജ കറന്‍സി 32 ലക്ഷം മാത്രമാണ്. ഇവയെല്ലാം അസാധുവാക്കിയ 500, 1000 രൂപാ നോട്ടുകളുമാണ്. 2015ല്‍ ഗോഹട്ടി, തെക്കന്‍ ബംഗാള്‍ എന്നിവിടങ്ങളില്‍ 2.6 കോടി രൂപയുടെ വ്യാജ കറന്‍സി പിടികൂടിയപ്പോള്‍ 2016ല്‍ അത് 1.5 കോടി മാത്രമായിരുന്നു.

അതേസമയം, തെക്കന്‍ ബംഗാള്‍, ഗോഹട്ടി എന്നിവിടങ്ങളില്‍ നിന്ന് കഴിഞ്ഞ ആറു മാസത്തിനിടെ പിടികൂടിയ വ്യാജ കറന്‍സികളുടെ എണ്ണം വര്‍ദ്ധിച്ചിട്ടുണ്ട്. ജനുവരിയില്‍ ഒരു ലക്ഷത്തിന്റേയും ഫെബ്രുവരിയില്‍ 2.96 ലക്ഷത്തിന്റേയും മാര്‍ച്ചില്‍ 4.60 ലക്ഷത്തിന്റേയും വ്യാജ കറന്‍സികള്‍ പിടികൂടിയിരുന്നു. ഏപ്രില്‍ 20 ലക്ഷമായിരുന്നത് മേയില്‍ 6.98 ലക്ഷമായി കുറഞ്ഞു. ജൂലായില്‍ അതിലും കുറവായിരുന്നു പിടിച്ചെടുത്ത വ്യാജ കറന്‍സികള്‍. അതേസമയം, ആഗസ്റ്റ് 22ന് ബംഗാളിലെ മാല്‍ഡ സെക്ടറില്‍ 5.20 ലക്ഷത്തിന്റെ വ്യാജ കറന്‍സികള്‍ ബി.എസ്.എഫ് പിടികൂടിയിരുന്നു.