സര്‍വിസിലിരിക്കുന്ന പരിശീലനം ലഭിച്ചിട്ടില്ലാത്ത പ്രൈമറി അധ്യാപകര്‍ ട്രെയിനിങ് ജയിച്ചില്ലെങ്കില്‍ പിരിച്ചുവിടുമെന്ന് കേന്ദ്ര സര്‍ക്കാര്‍
സര്‍വിസിലിരിക്കുന്ന പരിശീലനം ലഭിച്ചിട്ടില്ലാത്ത അധ്യാപകര്‍ രണ്ട് വര്‍ഷത്തിനകം പരിശീലനം പൂര്‍ത്തിയാക്കിയില്ലെങ്കില്‍ പിരിച്ചുവിടണമെന്നുള്ള കേന്ദ്ര മാനവവിഭവശേഷി മന്ത്രാലയത്തിന്റെ ഉത്തരവ് വിവാദമായി. െ്രെപമറി വിദ്യാലയങ്ങളിലെ ആയിരക്കണക്കിന് ഭാഷ അധ്യാപകരുടെ നിലനില്‍പ്പ് അനിശ്ചിതത്വത്തിലാക്കുന്നതാണ് കേന്ദ്ര സര്‍ക്കാറിന്റെ പുതിയ നിര്‍ദേശം.
സര്‍ക്കാര്‍, എയ്ഡഡ്, അണ്‍ എയ്ഡഡ് (അംഗീകൃതം) സ്‌കൂളുകളില്‍ ഒന്നു മുതല്‍ എട്ടുവരെ ക്ലാസുകളില്‍ പഠിപ്പിക്കുന്ന അധ്യാപക പരിശീലനം (ഡി.എഡ്/ഡി.എല്‍.എഡ്) നേടിയിട്ടില്ലാത്ത അധ്യാപകര്‍ 2019 മാര്‍ച്ച് 31ന് മുമ്പ് യോഗ്യത നേടണമെന്നാണ് മാനവവിഭവശേഷി വകുപ്പ് നിര്‍ദേശം.
കെ.ഇ.ആര്‍ പ്രകാരം എല്‍.പി, യു.പി വിഭാഗങ്ങളിലെ അറബിക്, ഉറുദു, സംസ്‌കൃതം, ഹിന്ദി അധ്യാപകര്‍ക്ക് പരിശീലനം ആവശ്യമില്ല. പലരും പ്ലസ്ടുവോ ട്രെയിനിങോ ഇല്ലാത്തവരാണ്. എസ്.എസ്.എല്‍.സിയും ബന്ധപ്പെട്ട ഭാഷയിലെ പ്രിലിമിനറി പരീക്ഷയുമാണ് ഇവരുടെ യോഗ്യത. ഹൈസ്‌കൂളിലെ അധ്യാപകര്‍ക്ക് മാത്രമാണ് പരിശീലനം നിര്‍ബന്ധമുള്ളൂ. പുതിയ ഉത്തരവ് പ്രകാരം പ്രൈമറിയിലെ മുഴുവന്‍ അധ്യാപകരും അധ്യാപക പരിശീലന യോഗ്യതയോ തത്തുല്യമായ യോഗ്യതയോ നേടിയിരിക്കണം.
നാഷണല്‍ ഇന്‍സ്റ്റിറ്റിയൂട്ട് ഓഫ് ഓപണ്‍ സ്‌കൂളിന്റെ (എന്‍.ഐ.ഒ.എസ്) രാജ്യവ്യാപകമായി ഇതുവരെയും പരിശീലനം നേടാത്ത അധ്യാപകര്‍ക്ക് പരിശീലനം നേടുന്നതിനുള്ള അവസാന അവസരം ഒരുക്കിയിട്ടുണ്ടെന്ന് മാനവവിഭവശേഷി വകുപ്പ് ഉത്തരവില്‍ പറയുന്നു. ഇതിനായി ഈ മാസം 15നകം രജിസ്റ്റര്‍ ചെയ്യണമെന്ന് എന്‍.ഐ.ഒ.എസ് പത്രപരസ്യം നല്‍കിയിട്ടുണ്ട്.
എന്നാല്‍, ഇതുസംബന്ധിച്ച് പൊതുവിദ്യാഭ്യാസ വകുപ്പ് സ്‌കൂളുകള്‍ക്ക് അറിയിപ്പ് നല്‍കിയത് കഴിഞ്ഞ സെപ്റ്റംബര്‍ എട്ടിന് മാത്രമാണ്. ഇതനുസരിച്ച് 2019 മാര്‍ച്ച് 31ന് മുമ്പ് റിട്ടയര്‍ ചെയ്യാത്ത എല്ലാവരും ഓപണ്‍ സ്‌കൂളില്‍ രജിസ്റ്റര്‍ ചെയ്ത് പരിശീലനം നേടിയിരിക്കണം.
പ്ലസ്ടുവിന് 50 ശതമാനം മാര്‍ക്കില്ലാത്തവര്‍ അത് നേടുന്നതിന് ഓപണ്‍ സ്‌കൂളില്‍ രജിസ്റ്റര്‍ ചെയ്യണം. പിന്നീട് ഒരു അവസരം നല്‍കില്ലെന്ന് പത്രപരസ്യത്തിലുണ്ട്. സംസ്ഥാനത്തെ ആയിരക്കണക്കിന് അധ്യാപകരെ ബാധിക്കുന്ന പ്രശ്‌നമാണിത്. കേരള വിദ്യാഭ്യാസ ചട്ടപ്രകാരം 20ഉം അതിലധികവും വര്‍ഷമായി സേവനം ചെയ്യുന്ന അധ്യാപകരോടാണ് സര്‍വിസിന്റെ അവസാന കാലയളവില്‍ പരിശീലനം നേടണമെന്ന് കേന്ദ്ര സര്‍ക്കാര്‍ ഉപാധി വെക്കുന്നത്. അല്ലാത്ത പക്ഷം പെന്‍ഷനുപോലും അര്‍ഹതയില്ലാത്തവിധം പിരിച്ചുവിടുമെന്നാണ് മുന്നറിയിപ്പ്.
https://www.facebook.com/Malayalivartha
