പവര്‍ ബാങ്കുകള്‍ വിമാനയാത്രയില്‍ അനുവദിക്കില്ലെന്ന് കേന്ദ്ര സര്‍ക്കാര്‍ തീരുമാനം
മൊബൈല്‍ ബാറ്ററിയും മറ്റുമുപയോഗിച്ച് പ്രാദേശികമായി നിര്‍മിക്കുന്ന ചാര്‍ജിംഗ് പവര്‍ ബാങ്കുകള്‍ വിമാനയാത്രയില്‍ കൊണ്ടുപോകാന്‍ അനുവദിക്കുകയില്ലെന്ന് കേന്ദ്രസര്‍ക്കാര്‍ തീരുമാനിച്ചിട്ടുണ്ട്. ഇതിനെക്കുറിച്ച് വിമാനയാത്രക്കാര്‍ക്കും പൊതുജനങ്ങള്‍ക്കും അവബോധം സൃഷ്ടിക്കുന്നതിനുവേണ്ട മാര്‍ഗനിര്‍ദേശങ്ങള്‍ കേന്ദ്ര ആഭ്യന്തര മന്ത്രാലയം പുറപ്പെടുവിച്ചു.
ബാറ്ററി, സര്‍ക്യൂട്ട് എന്നീ ഘടകങ്ങളുപയോഗിച്ചാണ് ഇത്തരം പവര്‍ ബാങ്കുകള്‍ പ്രാദേശികനിര്‍മാതാക്കള്‍ നിര്‍മിക്കുന്നത്. ഭാരം കൂട്ടുന്നതിനും പൊള്ളയായ ഭാഗം നിറയ്ക്കുന്നതിനുമായി 'പുട്ടി'യും (ഇരുമ്പ് ജനല്‍ ചട്ടത്തില്‍ ഗ്ലാസ് ഉറപ്പിക്കുന്നതിനുള്ള വസ്തു) ചേര്‍ക്കാറുണ്ട്. വിമാനത്താവളങ്ങളിലും മറ്റും സുരക്ഷാ പരിശോധനയ്ക്കായി സ്‌കാന്‍ ചെയ്യുമ്പോള്‍ ഇത്തരം പവര്‍ബാങ്കുകള്‍ ഒരു സ്‌ഫോടക വസ്തുവിന് സമാനമായ ഇമേജായി കാണിക്കുകയും ഇതിലുള്ള സര്‍ക്യൂട്ട് സ്‌ക്രീനിംഗ് വേളയില്‍ പരിഭ്രാന്തി സൃഷ്ടിക്കുകയും ചെയ്യുന്നതിനാലാണ് ഈ പവര്‍ ബാങ്കുകള്‍ നിരോധിച്ചിരിക്കുന്നത്.
കൂടാതെ ഇത്തരം പവര്‍ബാങ്കുകളുടെ രൂപത്തിലുള്ള സ്‌ഫോടകവസ്തുക്കള്‍ ദേശദ്രോഹികളും തീവ്രവാദികളും ഇവരുടെ ഗൂഢലക്ഷ്യങ്ങള്‍ക്കായി ഉപയോഗിക്കാനും സാധ്യതയുണ്ട്. അതിനാല്‍ എയര്‍പോര്‍ട്ടുകളിലും വിമാനയാത്രകളിലും അതുപോലുള്ള അവസരങ്ങളിലും ഇത്തരത്തില്‍ അവിദഗ്ധമായി പരിഷ്‌കരിച്ച പവര്‍ബാങ്കുകള്‍ കൈവശം വയ്ക്കാനോ ഉപയോഗിക്കാനോ പാടില്ലെന്ന് കേന്ദ്ര ആഭ്യന്തരമന്ത്രാലയം നിര്‍ദേശിച്ചിട്ടുണ്ടെന്ന് സംസ്ഥാന പോലീസ് മേധാവി അറിയിച്ചു..
https://www.facebook.com/Malayalivartha
