ആകാശത്ത് നിന്നും വീണ വസ്തു അമൂല്യമെന്ന് കരുതി സൂക്ഷിച്ചവര്‍ക്ക് അബദ്ധം പറ്റി. ഹരിയാനയിലെ ഗുരുഗ്രാമിനടുത്തുള്ള ഫസില്‍പുര്‍ ബദ്‌ലി എന്ന ഗ്രാമം വിചിത്രമായ ചില സംഭവങ്ങള്‍ നടന്നത്. രാജ്ബിര്‍ യാദവ് എന്ന കര്‍ഷകന്റെ ഗോതമ്പ് പാടത്ത് ശനിയാഴ്ച്ച പ്രഭാതത്തില്‍ ഒരു അജ്ഞാത വസ്തു ആകാശത്ത് നിന്ന് പതിക്കുന്നതോടെയാണ് സംഭവങ്ങളുടെ തുടക്കം.വലിയ ശബ്ദത്തോടെയായിരുന്നു വസ്തു ഭൂമിയില്‍ പതിച്ചതെന്ന് രാജ്ബിര്‍ യാദവ് പറയുന്നു. വെള്ളനിറത്തിലുള്ള സുതാര്യമായ മേല്‍പാളിയോടെ കാണപ്പെട്ട ആ വസ്തുവിന് ഐസ് കട്ടയോളം തണുപ്പുണ്ടായിരുന്നു.

രാജ്ബിര്‍ യാദവിന്റെ പാടത്ത് ആകാശത്ത് നിന്നെന്തോ വീണെന്ന വാര്‍ത്ത ഗ്രാമത്തില്‍ പടര്‍ന്നു. വിവരമറിഞ്ഞ് അടുത്ത ഗ്രാമത്തില്‍ നിന്നു വരെ ആളുകള്‍ രാജ്ബിറിന്റെ ഗോതമ്പ് പാടത്തേക്കെത്തി. വന്ന ഗ്രാമീണരില്‍ പലരും തണുത്തു മരവിച്ചു കിടക്കുന്ന ആ വസ്തു സൂഷ്മമായി പരിശോധിച്ചു.

ഉല്‍ക്ക പോലെ ബഹിരാകാശത്ത് നിന്നും പതിച്ച എന്തെങ്കിലുമായിരിക്കാം അതെന്നായിരുന്നു പലരുടേയും നിഗമനം. അമൂല്യമായ ധാതുക്കളായിരിക്കാം അതിനകത്തെന്നും ചിലര്‍ അഭിപ്രായപ്പെട്ടു. എന്തായാലും കാഴ്ച്ചക്കാരായി എത്തിയവരില്‍ ചിലര്‍ കഷ്ടപ്പെട്ട് ഐസ് കല്ല് പൊട്ടിച്ചെടുത്തു. കിട്ടിയ കഷ്ണങ്ങള്‍ വാരിക്കൂട്ടി വീട്ടിലേക്കോടി. അമൂല്യമായ ശിലയും അതിലെ ധാതുകളും ഉരുകി പോകാതിരിക്കാന്‍ പലരും അത് പാത്രത്തിലാക്കി വീട്ടിലെ ഫ്രിഡ്ജില്‍ സൂക്ഷിച്ചു.

ഫസില്‍പുര്‍ ബദ്‌ലിയില്‍ ഒരു അജ്ഞാതവസ്തു പതിച്ച വിവരം അതിനോടകം അധികാരികളും അറിഞ്ഞിരുന്നു. ഫറൂഖാബാദ് ജില്ലാ ഭരണകൂടത്തിന്റെ നിര്‍ദേശം അനുസരിച്ച് കാലാവസ്ഥാ വകുപ്പിലെ ഉദ്യോഗസ്ഥര്‍ ഗ്രാമത്തിലേക്ക് തിരിച്ചു. അടിയന്തരസാഹചര്യം നേരിടാന്‍ ദുരന്തനിവാരണസേനാ ഉദ്യോഗസ്ഥരേയും വിളിപ്പിച്ചു. എന്തായാലും വിദഗ്ദ്ധസംഘത്തിന്റെ പരിശോധന കഴിഞ്ഞപ്പോള്‍ അജ്ഞാതശിലയ്ക്ക് പിന്നിലെ ദുരൂഹത ഒഴിഞ്ഞു.

സംഭവം ഉല്‍ക്കയും വാല്‍നക്ഷത്രവുമൊന്നുമല്ലെന്നും ബ്ലൂ ഐസാണെന്ന് ഉദ്യോഗസ്ഥര്‍ ഗ്രാമവാസികളെ അറിയിച്ചു. വിമാനത്തിന്റെ ടോയ്‌ലറ്റില്‍ നിന്നുമുള്ള മാലിന്യമാണ് ബ്ലൂഐസ്. സൂക്ഷിക്കാനും നശിപ്പിക്കാനുമുള്ള സൗകര്യത്തിനായി ഇവയെ ശീതീകരിച്ചാണ് വിമാനത്തിലെ ടാങ്കില്‍ സൂക്ഷിക്കുക. പ്രത്യേക രാസമിശ്രിതങ്ങള്‍ ഉപയോഗിച്ച് വിമാനത്തിലെ സെപ്റ്റിക് ടാങ്കില്‍ സൂക്ഷിക്കുന്ന മാലിന്യം അതില്‍ നിന്നും ചോര്‍ന്നാവാം ഗ്രാമത്തില്‍ പതിച്ചത്.