ബോളിവുഡ് സിനിമയുടേതിനേക്കാള്‍ ട്വിസ്റ്റുകളും നാടകീയതകളും നിറഞ്ഞ കര്‍ണാടക നിയമസഭാ തിരഞ്ഞെടുപ്പ് ഫലം ക്ലൈമാക്‌സിലേക്ക് അടുപ്പിച്ച തീരുമാനത്തിന് പിന്നില്‍ പ്രധാനമന്ത്രി നരേന്ദ്ര മോദിയും ബി.ജെ.പി അദ്ധ്യക്ഷന്‍ അമിത് ഷായുമെന്ന് സൂചന. തിരഞ്ഞെടുപ്പ് ഫലപ്രഖ്യാപനത്തിന് പിന്നാലെ പാര്‍ട്ടി ദേശീയ കാര്യാലയത്തില്‍ ചേര്‍ന്ന യോഗത്തില്‍ തന്നെ യെദിയൂരപ്പയെ മുഖ്യമന്ത്രിയാക്കണമെന്ന തീരുമാനത്തിലെത്തിയിരുന്നു.

ബി.ജെ.പിക്ക് വ്യക്തമായ ഭൂരിപക്ഷം ഇല്ലാതെ വരികയും കോണ്‍ഗ്രസ് ജെ.ഡി എസ് സഖ്യമുണ്ടാക്കുകയും ചെയ്‌തോടെ യെദിയൂരപ്പ തന്നെ ആദ്യം മുഖ്യമന്ത്രിയായി സ്ഥാനമേറ്റെടുക്കണമെന്ന് ദേശീയ നേതൃത്വം തീരുമാനിച്ചിരുന്നു. ജനതാദളുമായി സഖ്യമുണ്ടാക്കുന്നതില്‍ അമര്‍ഷമുള്ള കോണ്‍ഗ്രസ് അംഗങ്ങളെ കൂട്ടുപിടിച്ച് സര്‍ക്കാര്‍ ഉണ്ടാക്കാന്‍ ആയിരുന്നു ആദ്യ നീക്കം. ഇക്കാര്യവുമായി ബന്ധപ്പെട്ട് ചില എം.എല്‍.എമാരുമായി ബി.ജെ.പി നേതാക്കള്‍ ചര്‍ച്ചയും നടത്തിയെന്നാണ് വിവരം. എന്നാല്‍ കോണ്‍ഗ്രസ് തങ്ങളുടെ എം.എല്‍.എമാരെ റിസോര്‍ട്ടിലേക്ക് മാറ്റിയതോടെ ഈ നീക്കം പൊളിഞ്ഞു. തുടര്‍ന്നാണ് യെദിയൂരപ്പയെ സര്‍ക്കാരുണ്ടാക്കാന്‍ ക്ഷണിക്കണമെന്ന നിര്‍ദ്ദേശം ഗവര്‍ണര്‍ക്ക് ലഭിച്ചതെന്നാണ് വിവരം. 

അതേസമയം, മുഖ്യമന്ത്രിയായതിന് ശേഷം നിയമസഭയില്‍ ഭൂരിപക്ഷം തെളിയിക്കാനാവാതെ രാജിവയ്‌ക്കേണ്ടി വന്നാലും അത് നേട്ടമാണെന്നാണ് ബി.ജെ.പിയുടെ കണക്കുകൂട്ടല്‍. നിയമസഭയില്‍ ഭൂരിപക്ഷം തെളിയിക്കാന്‍ 15 ദിവസം ഗവര്‍ണര്‍ അനുവദിച്ചിട്ടുണ്ട്. ഈ സമയം ഫലപ്രദമായി ഉപയോഗിച്ച് മാന്ത്രിക സംഖ്യയായ 113ലെത്തുന്നതിനുള്ള ശ്രമങ്ങള്‍ തുടരാനാണ് ബി.ജെ.പി നീക്കം. നിലവില്‍ ബി.ജെ.പിക്ക് 104 അംഗങ്ങളും ഒരു സ്വതന്ത്രന്റെ പിന്തുണയുമുണ്ട്. ഒരുപക്ഷേ കൂടുതല്‍ അംഗങ്ങളുടെ പിന്തുണ ലഭിച്ചില്ലെങ്കില്‍ 15 ദിവസത്തിന് ശേഷം യെദിയൂരപ്പ രാജിവച്ചൊഴിയും. ഇത് ലിംഗായത്ത് വോട്ടുകള്‍ തങ്ങള്‍ക്ക് ഉറപ്പിക്കുന്നതിന് സഹായിക്കുമെന്നും സഹതാപ തരംഗം തങ്ങള്‍ക്ക് അനുകൂലമാകുമെന്നുമാണ് ബി.ജെ.പി കണക്കുകൂട്ടല്‍.