മാതാപിതാക്കൾക്കൊപ്പം യു.എ.ഇ സന്ദർശിക്കുന്ന 18 വയസിന് താഴെയുള്ളവർക്ക് വിസാ ഫീസ് നൽകേണ്ട. ജൂലൈ 15 മുതൽ സെപ്റ്റംബർ 15 വരെയാണ് എല്ലാ വർഷവും ഈ ഇളവ് ലഭിക്കുക. ടൂറിസം പ്രോൽസാഹനം ലക്ഷ്യം വെച്ച് യു.എ.ഇ മന്ത്രിസഭയാണ് തീരുമാനം കൈക്കൊണ്ടത്.

അവധിക്കാലത്ത് യുഎഇ സന്ദര്‍ശിക്കാനെത്തുന്ന കുടുംബങ്ങളുടെ യാത്രാ ചെലവ് ചുരുക്കുന്നതിനാണ് ഈ തീരുമാനം. സന്ദർശകർക്ക് വേണ്ടി നേരത്തെയും വിസ ചട്ടങ്ങളിൽ യു.എ.ഇ. ഇളവ് വരുത്തിയിരുന്നു. ട്രാന്‍സിറ്റ് വിസയില്‍ എത്തുന്നവർക്ക് 48 മണിക്കൂര്‍ വരെ രാജ്യത്ത് തങ്ങാൻ ഫീസ് ഈടാക്കേണ്ടതില്ലെന്നതായിരുന്നു ഇതിൽ പ്രധാനം. 50 ദിര്‍ഹം നല്‍കി ഈ ആനുകൂല്യം 96 മണിക്കൂര്‍ വരെ ദീര്‍ഘിപ്പിക്കാനും അനുമതി നൽകി.

ലോകത്തെ ഏറ്റവും മികച്ച ടൂറിസ്റ്റ് കേന്ദ്രം എന്ന നിലക്ക് ഓരോ വർഷവും ഇവിടേക്കുള്ള ടൂറിസ്റ്റുകളുടെ എണ്ണത്തിൽ ഗണ്യമായ വർധനയാണുള്ളത്. ഈ വർഷം ആദ്യ 3 മാസം മാത്രം 32.8 ദശലക്ഷം യാത്രക്കാരാണ് യു.എ.ഇ വിമാനത്താവളങ്ങൾ മുഖേന കടന്നു പോയത്. കുടുംബ ടൂറിസം രംഗത്ത് വൻ മുന്നേറ്റം കുറിക്കാൻ പുതിയ നടപടി ഏറെ ഉപകരിച്ചേക്കും. വരും വർഷങ്ങളിൽ കൂടുതൽ ശക്തമായ വർധന മുന്നിൽ കണ്ടാണ് വിസാ നിയമങ്ങളിൽ ഉദാര നടപടി സ്വീകരിക്കാൻ യു.എ.ഇ തീരുമാനിച്ചിരിക്കുന്നതും.