മൂന്നരക്കോടി ആവശ്യപ്പെട്ട് മലയാളിയെയും മകനെയും സാംബിയയില്‍ തടങ്കലിലാക്കി
മൂന്നരക്കോടി രൂപ മോചനദ്രവ്യം ആവശ്യപ്പെട്ട് മലയാളിയെയും മകനെയും സാംബിയയില്‍ സ്വകാര്യ കമ്പനി അധികൃതര്‍ തടങ്കലിലാക്കി. കൊട്ടാരക്കര പടിഞ്ഞാറ്റിന്‍കര പണ്ടാരഴികത്തുവീട്ടില്‍ രവീന്ദ്രന്‍ പിള്ള(56), മകന്‍ റോണക് രവീന്ദ്രന്‍ എന്നിവരെയാണ് ആഫ്രിക്കന്‍ രാജ്യമായ സാംബിയയില്‍ കമ്പനി അധികൃതര്‍തന്നെ തോക്കുചൂണ്ടി തടങ്കലിലാക്കിയിരിക്കുന്നത്. പണം സംഘടിപ്പിക്കാനായി രവീന്ദ്രന്‍ പിള്ളയുടെ ഭാര്യ രാധാ രവീന്ദ്രന്‍ മൂത്ത മകന്‍ രഞ്ജു എന്നിവരെ കമ്പനിതന്നെ നാട്ടിലേക്കയയ്ക്കുകയും ചെയ്തു. 14ന് മുമ്പ് പണവുമായി എത്തിയില്ലെങ്കില്‍ ഇരുവരെയും വധിക്കുമെന്നാണ് ഭീഷണി. നാട്ടിലെത്തിയ രാധാ രവീന്ദ്രന്‍ ഭര്‍ത്താവിനെയും മകനെയും രക്ഷിക്കാന്‍ അടിയന്തര നടപടികളുണ്ടാകണം എന്നാവശ്യപ്പെട്ട് നോര്‍ക്ക അധികൃതര്‍ക്കും മുഖ്യമന്ത്രിക്കും പരാതി നല്‍കി.
സാംബിയയുടെ തലസ്ഥാനമായ ലുസാക്കയില്‍ സ്വകാര്യ പെട്രോള്‍ വ്യാപാര കമ്പിനിയായ റവാസിയ പെട്രോളിയം ലിമിറ്റഡില്‍ നാലുവര്‍ഷമായി ജനറല്‍ മാനേജരാണ് രവീന്ദ്രന്‍ പിള്ള. മകന്‍ റോണക്ക് ഇതേ കമ്പനിയില്‍ അക്കൗണ്ട്‌സ് വിഭാഗത്തിലും ജോലി ചെയ്യുന്നു. കഴിഞ്ഞ 20നാണ് കമ്പിനി ഉടമയും ബന്ധുവും കൂടി രവീന്ദ്രന്‍ പിള്ളയെയും റോണക്കിനെയും തടങ്കലിലാക്കിയത്. തോക്കു ചൂണ്ടി നിരവധി രേഖകളില്‍ ഒപ്പിടുവിക്കുകയും ചെയ്തു. തുടര്‍ന്ന് രാധാ രവീന്ദ്രനെയും രഞ്ജുവിനെയും വിളിച്ചുവരുത്തിയ കമ്പനിയുടമ ഇരുവരുടെ നേരെയും തോക്കു ചൂണ്ടുകയും ഭര്‍ത്താവിനെയും മകനെയും വിട്ടുനല്‍കണമെങ്കില്‍ മുപ്പത് ലക്ഷം ഡോളര്‍(മൂന്നരക്കോടി രൂപ) നല്‍കണമെന്ന് ആവശ്യപ്പെടുകയും ചെയ്തു. നാട്ടില്‍ പോയി വസ്തുവകകള്‍ വിറ്റ് പണം ഉണ്ടാക്കി വരാന്‍ ടിക്കറ്റെടുത്തു നല്‍കുകയും ചെയ്തു. എപ്പോഴും ഫോണില്‍ ബന്ധപ്പെടുന്ന കമ്പനിയുടമ തുക മാറ്റി മാറ്റി പറയുകയും ചെയ്യുന്നു. രവീന്ദ്രന്‍ പിള്ള കമ്പനി മാറുമെന്ന ധാരണയാണ് തടങ്കലിലാക്കാന്‍ കാരണമെന്നും കമ്പനിയുമായി ബന്ധപ്പെട്ട രഹസ്യങ്ങള്‍ പുറത്താകുമെന്ന ചിന്തയാണ് ഇതിനു പിന്നിലെന്നും രാധാ രവീന്ദ്രന്‍ പറയുന്നു. ഭര്‍ത്താവിന്റെയും മകന്റെയും ജീവന്‍ രക്ഷിക്കാന്‍ എന്തു ചെയ്യണമെന്നറിയാത്ത അവസ്ഥയിലാണിവര്‍. പതിന്നാലു വര്‍ഷത്തോളം ദുബായിലായിരുന്ന രവീന്ദ്രന്‍ പിള്ള നാലുവര്‍ഷം മുമ്പാണ് സാംബിയയിലേക്കു പോയത്. കഴിഞ്ഞ മൂന്നുവര്‍ഷമായി കുടുംബവും സാംബിയയിലായിരുന്നു
https://www.facebook.com/Malayalivartha
