പ്രവാസികള്‍ക്ക് ആശ്വാസം പകര്‍ന്ന് പുതുവര്‍ഷത്തില്‍ സന്തോഷവാര്‍ത്ത. പുതിയ ബജറ്റില്‍ പ്രവാസികള്‍ നാട്ടിലേക്കയക്കുന്ന പണത്തിന് നികുതി ഏര്‍പ്പെടുത്താനുള്ള നിര്‍ദേശം ഒഴിവാക്കിയത് വിദേശികള്‍ക്ക് ആശ്വാസംപകര്‍ന്നു. പ്രവാസികള്‍ നാട്ടിലയക്കുന്ന പണത്തിന് രണ്ടു ശതമാനം നികുതി ഏര്‍പ്പെടുത്തണമെന്ന് മജ് ലിസു ശൂറയാണ് നിര്‍ദേശംവെച്ചത്.

എണ്ണവില കുത്തനെ കുറയുന്ന സാഹചര്യത്തില്‍ രാജ്യത്തിന്റെ സാമ്പത്തിക രംഗത്തെ രക്ഷപ്പെടുത്താന്‍ മജ് ലിസു ശൂറ നിരവധി നിര്‍ദേശങ്ങള്‍ വെച്ചിരുന്നു. പ്രവാസികള്‍ നാട്ടിലയക്കുന്ന പണത്തിന് നികുതി ഏര്‍പ്പെടുത്തുകയെന്നത് അതില്‍ പ്രധാന നിര്‍ദേശമായിരുന്നു. മജ് ലിസു ശൂറയില്‍ നിന്ന് ഈ നിര്‍ദേശം വന്നപ്പോള്‍ തന്നെ പ്രവാസികള്‍ ആശങ്കയിലായിരുന്നു. നാട്ടിലയക്കുന്ന പണത്തിന്റെ ഒരു ഭാഗം നികുതിയടക്കേണ്ടി വരുന്നത് ചെറിയ വരുമാനക്കാരെയാണ് ഏറെ അസ്വസ്ഥരാക്കിയത്.

അതിനിടെ കഴിഞ്ഞ ദിവസം ഉപരിസഭയായ സ്‌റ്റേറ്റ് കൗണ്‍സില്‍ നിര്‍ദേശം തള്ളിയതോടെ തന്നെ പ്രവാസികള്‍ ആശ്വാസത്തിലായിരുന്നു. എന്നാലും, അവസാന നിമിഷത്തില്‍ നികുതി നിര്‍ദേശവുമായി മുമ്പോട്ട് പോവുമെന്ന ആശങ്കയിലായിരുന്നു പലരും. പുതിയ ബജറ്റില്‍ ഇതുസംബന്ധമായ നിര്‍ദേശങ്ങള്‍ ഒന്നുമില്ലെങ്കിലും ചില ആശങ്കകള്‍ നിലനില്‍ക്കുന്നതായി ഈ രംഗത്തുള്ളവര്‍ പറയുന്നു.
എണ്ണ വില കുറയുമ്പോള്‍ രാജ്യം നേരിടുന്ന സാമ്പത്തിക പ്രതിസന്ധി നേരിടാന്‍ രണ്ട് ശതമാനം റമിറ്റന്‍സ് നികുതി, ടെലികോം കമ്പനികളുടെ റോയല്‍റ്റി ഏഴ് ശതമാനത്തില്‍ നിന്ന് 12 ശതമാനമായി ഉയര്‍ത്തല്‍, എല്‍. എന്‍. ജിയുടെ കയറ്റുമതി നികുതി വര്‍ധിപ്പിക്കല്‍ തുടങ്ങിയ നിര്‍ദേശങ്ങള്‍ മജ് ലിസു ശൂറ മുമ്പോട്ടുവെച്ചിരുന്നെങ്കിലും അവ സ്‌റ്റേറ്റ് കൗണ്‍സില്‍ തന്നെ തള്ളുകയായിരുന്നുവെന്ന് ടൈംസ് ഓഫ് ഒമാന്‍ ബിസിനസ് എഡിറ്റര്‍ എ.ഐ. ജെയിംസ പറഞ്ഞു.

മുന്‍കാല ബജറ്റുകളില്‍ എണ്ണവില നിശ്ചയിക്കുകയും അതിന്റെ അടിസ്ഥാനത്തില്‍ വരുമാനം കണ്ടത്തെുകയുമായിരുന്നു പതിവ്. കഴിഞ്ഞ വര്‍ഷം 85 ഡോളറായിരുന്നു ഒമാന്‍ അസംസ്‌കൃത എണ്ണയുടെ വില. എന്നാല്‍ പുതിയ ബജറ്റില്‍ എണ്ണ വില നിശ്ചയിക്കാത്തതും അതനുസരിച്ച് വരുമാന മാര്‍ഗങ്ങള്‍ കണ്ടത്തൊത്തതും അവ്യക്തതയുണ്ടാക്കുന്നതായി അദ്ദേഹം പറഞ്ഞു.

9.6 ശതകോടി റിയാലാണ് എണ്ണയില്‍ നിന്ന് കണ്ടെത്തേണ്ടത്. അതോടൊപ്പം, ആവശ്യമായിവന്നാല്‍ ജനങ്ങളെ ബുദ്ധിമുട്ടിക്കാത്ത രീതിയില്‍ സാമ്പത്തിക നടപടികള്‍ എടുക്കുമെന്നും ബജറ്റില്‍ പറയുന്നുണ്ട്. ഇത് എന്തൊക്കെയാണെന്ന് തെളിയിച്ച് പറയാത്തതും അവ്യക്തതയുണ്ടാക്കുന്നതായി അദ്ദേഹം പറഞ്ഞു. സാധാരണ ബജറ്റുകളില്‍ ഇത്തരം കാര്യങ്ങള്‍ വ്യക്തമാക്കാറുണ്ട്.
പ്രവാസി നികുതി നിര്‍ദേശം ബജറ്റില്‍ വരാത്തത് പ്രവാസികള്‍ക്ക് വന്‍ ആശ്വാസം പകര്‍ന്നതായി ഒമാന്‍ യു.എ.ഇ എക്‌സ്‌ചേഞ്ച് ജനറല്‍ മാനേജര്‍ ടോണി ജോര്‍ജ് അലക്‌സാണ്ടര്‍ പറഞ്ഞു. മാത്രമല്ല ഒമാനില്‍ നികുതി നടപ്പായാല്‍ മറ്റ് ജി സി സി രാജ്യങ്ങളിലേക്ക് ഇവ വ്യാപിക്കാനും സാധ്യതയുണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha