ഖത്തറില്‍ തൊഴില്‍ കരാറിലെ കാലാവധി സംബന്ധിച്ച് അഭിപ്രായ വ്യത്യാസങ്ങള്‍ നിലനില്‍ക്കുന്നതായി റിപ്പോര്‍ട്ട്. അതിനാലാണ് ദേഭഗതികളോടെയുള്ള സ്‌പോണ്‍സര്‍ഷിപ്പ് നിയമം നടപ്പാക്കാന്‍ തടസ്സമെന്നാണ് സൂചന. വന്‍ നിര്‍മാണ പദ്ധതികളിലെ എഞ്ചിനീയര്‍മാരുടെയും ഉന്നത ഉദ്യോഗസ്ഥരുടെയും കരാര്‍ കാലാവധി നിശ്ചയിക്കാന്‍ തിരക്കിട്ട ചര്‍ച്ചകളാണ് നടക്കുന്നത്.

ശൂറാ കൌണ്‍സിലിന്റെ പരിഗണനയിലുള്ള കരടു നിയമത്തില്‍ ഇക്കാര്യം വ്യക്തത വരുത്താനുള്ള ശ്രമത്തിലാണ്. സാധാരണ തൊഴിലാളികളുടെ തൊഴില്‍ മാറ്റവും എക്‌സിറ്റ് പെര്‍മിറ്റും സംബന്ധിച്ച കരടു നിയമത്തിലെ നിര്‍ദേശങ്ങള്‍ അംഗീകരിക്കുന്നുണ്ടെങ്കിലും വലിയ നിര്‍മാണ പദ്ധതികളുടെ ഭാഗമായി ജോലി ചെയ്യുന്ന ഉന്നത ഉദ്യോഗസ്ഥരും എഞ്ചിനീയര്‍മാരും ഇടക്കു വെച്ചു ജോലി മാറുന്നത് പദ്ധതികളെ ബാധിക്കുമെന്ന ആശങ്കയാണ് സ്വകാര്യ മേഖലക്കുള്ളത്. 
വന്‍ പദ്ധതികള്‍ പൂര്‍ത്തിയാകാണമെങ്കില്‍ കുറഞ്ഞത് അഞ്ചു വര്‍ഷമെങ്കിലും വേണ്ടിവരുന്നതിനാല്‍ ഇവരുടെ കരാര്‍ കാലാവധി അഞ്ചു മുതല്‍ പത്തു വര്‍ഷം വരെയാക്കണമെന്നാണ് ഖത്തര്‍ ചേമ്പര്‍ പ്രധാനമായും ആവശ്യപ്പെടുന്നത്. കരാര്‍ കാലാവധിക്കു ശേഷം മാത്രമേ ഇവര്‍ക്ക് തൊഴില്‍ മാറ്റം അനുവദിക്കാവൂ എന്നും ഖത്തര്‍ ചേമ്പര്‍ ആവശ്യപ്പെടുന്നു.

സ്‌പോണ്‍സര്‍ഷിപ്പ് മാറ്റം തൊഴിലിന്റെ സ്വഭാവവുമായി ബന്ധപ്പെട്ടായിരിക്കണം തീരുമാനിക്കുന്നതെന്നും എഞ്ചിനീയര്‍മാരും സാങ്കേതിക വിദഗ്ദ്ധരും ഉള്‍പെട്ട പ്രൊഫഷണല്‍സിനെ പ്രത്യേകമായി കാണണമെന്നുമാണ് ചേമ്പറിന്റെ മറ്റ് പ്രധാന ആവശ്യങ്ങള്‍.ഇതിനിടെ തൊഴില്‍ കരാര്‍ സംബന്ധിച്ച് കരടു നിയമത്തിലെ ശിപാര്‍ശകള്‍ക്ക് വ്യക്തതയില്ലെന്നു ഖത്തര്‍ ചേമ്പര്‍ ചെയര്‍മാന്‍ ഷെയ്ഖ് ഖലീഫ ബിന്‍ ജാസിം അല്‍താനി ഒരു പ്രാദേശിക പത്രത്തിനു നല്കിയ അഭിമുഖത്തില്‍ വ്യക്തമാക്കി.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha