അബൂദബിയുടെ വ്യവസായ മേഖലയായ മുസഫയില്‍ വന്‍ തീപിടിത്തം. മുസഫ 44ലെ ഗോഡൗണുകളിലാണ് തീപിടിച്ചത്. ഞായറാഴ്ച വൈകുന്നേരം 3.30ഓടെയാണ് തീ കണ്ടത്. ഫയര്‍ഫോഴ്‌സിന്റെയും പോലീസിന്റെയും സംഘങ്ങള്‍ മണിക്കൂറുകള്‍ പരിശ്രമിച്ചാണ് തീ നിയന്ത്രണ വിധേയമാക്കിയത്. മലയാളികളുടേത് അടക്കം 20ലധികം സ്ഥാപനങ്ങള്‍ അഗ്‌നിക്കിരയായതാണ് പ്രാഥമിക വിവരം.
രാത്രിയും പ്രദേശം പൂര്‍ണമായും പോലീസിന്റെയും അഗ്‌നിശമന സേനയുടെയും നിയന്ത്രണത്തിലാണ്.
കണ്ണൂര്‍ മാട്ടൂല്‍ സ്വദേശികളായ അഷ്‌റഫ്, മസൂദ് എന്നിവരുടേത് അടക്കം നിരവധി മലയാളികളുടെ സ്ഥാപനങ്ങളാണ് ഗോഡൗണ്‍ സമുച്ചയത്തില്‍ ഉള്ളത്. നെറ്റ് വര്‍ക്കിങ്, ഇലക്ട്രോണിക്‌സ്, റബര്‍, സോഫ സെറ്റുകള്‍, കമ്മ്യൂണിക്കേഷന്‍, പ്‌ളാസ്റ്റിക് എന്നിങ്ങനെ വിവിധ മേഖലകളില്‍ പ്രവര്‍ത്തിക്കുന്ന ഗോഡൗണ്‍കം ഓഫിസുകളും വര്‍ക്ഷോപ്പുകളും ഉള്‍പ്പെട്ട കേന്ദ്രത്തിലാണ് തീപിടിച്ചത്. സമീപത്തായി തൊഴിലാളികളുടെ താമസ കേന്ദ്രവുമുണ്ട്. ലക്ഷക്കണക്കിന് ദിര്‍ഹത്തിന്റെ നഷ്ടം സംഭവിച്ചതായാണ് പ്രാഥമിക വിവരം. അതേസമയം, ആള്‍ നാശമുണ്ടായിട്ടില്ല.
വൈകുന്നേരം 3.30ഓടെയാണ് മുസഫ 44 ചൈന ബസാറിന് പിന്നിലുള്ള ഗോഡൗണില്‍ തീ കണ്ടതെന്ന് മാട്ടൂല്‍ സ്വദേശി പറഞ്ഞു. തന്റെ രണ്ട് സ്ഥാപനങ്ങള്‍ ഗോഡൗണ്‍ സമുച്ചയത്തിലുണ്ട്. സംഭവ സ്ഥലം പോലീസ് നിയന്ത്രണത്തിലായതിനാല്‍ നഷ്ടം സംബന്ധിച്ച വിശദ വിവരങ്ങള്‍ ലഭ്യമല്ലെന്നും അദ്ദേഹം പറഞ്ഞു. മാട്ടൂല്‍ സ്വദേശി തന്നെയായ മസൂദിന്റെ ഇലക്ട്രോണിക്‌സ് സ്ഥാപനവും മറ്റ് ഏതാനും മലയാളികളുടെ ഗോഡൗണുകളും തീപിടിച്ച കേന്ദ്രത്തിലുണ്ട്.
20ലധികം സ്ഥാപനങ്ങളുള്ള ഗോഡൗണ്‍ സമുച്ചയത്തില്‍ നിരവധി മലയാളികള്‍ ജോലി ചെയ്യുന്നുമുണ്ട്. വൈകുന്നേരത്തോടെ തീപിടിച്ചയുടന്‍ കറുത്ത പുക ഉയര്‍ന്നുപൊങ്ങി. തീപിടിത്തം അറിഞ്ഞ് നിരവധി പേരാണ് സംഭവ സ്ഥലത്തേക്ക് എത്തിയത്.
സംഭവം അറിഞ്ഞയുടന്‍ മുസഫയിലെയും പരിസര പ്രദേശങ്ങളിലെയും അഗ്‌നിശമന സേനയും പോലീസും സ്ഥലത്തത്തെി. പത്തിലധികം പോലീസ് യൂണിറ്റുകളാണ് സംഭവ സ്ഥലത്തേക്ക് എത്തിയത്. രാത്രി ഒമ്പത് മണിക്കും തീയണക്കാനുള്ള ശ്രമങ്ങള്‍ പുരോഗമിക്കുകയാണ്. തീപിടിത്തത്തിനുള്ള കാരണം വ്യക്തമല്ല.