പാചകവാതകം ചോര്‍ന്നു .. ദുബായ് റെസ്റ്റോറന്റില്‍ വന്‍ സ്‌ഫോടനം, അപ്പാര്‍ട്ട്മെന്റ് കെട്ടിടത്തിന്റെ താഴെ നിലയില്‍ പ്രവര്‍ത്തിച്ചിരുന്ന റെസ്റ്റോറന്റിലാണ് സ്‌ഫോടനമുണ്ടായത്
ദുബായ് ഖിസൈസിലെ റെസ്റ്റോറന്റില്‍ വന്‍സ്‌ഫോടനം നടന്നതായി റിപ്പോര്‍ട്ടുകള്‍.പാചകവാതകം ചോര്‍ന്നതാന് അപകടകാരണമെന്ന് വിലയിരുത്തല്‍. തിങ്കളാഴ്ച പുലര്‍ച്ചെ ദമാസ്‌കസ് സ്ട്രീറ്റിന് സമീപത്തെ കെട്ടിടത്തിലായിരുന്നു അപകടം. ആളപായമോ പരിക്കോ റിപ്പോര്‍ട്ട് ചെയ്യപ്പെട്ടിട്ടില്ല. അപ്പാര്‍ട്ട്മെന്റ് കെട്ടിടത്തിന്റെ താഴെ നിലയില്‍ പ്രവര്‍ത്തിച്ചിരുന്ന റെസ്റ്റോറന്റിലാണ് സ്‌ഫോടനമുണ്ടായത്. സമീപത്ത് പ്രവര്‍ത്തിച്ചിരുന്ന ഫാര്‍മസിയും സലൂണും അടുത്തുണ്ടായിരുന്ന മൂന്ന് കാറുകളും സ്‌ഫോടനത്തില്‍ തകര്‍ന്നു.
തിങ്കളാഴ്ച പുലര്‍ച്ചെ നാല് മണിയോടെയാണ് സംഭവം. റെസ്റ്റോറന്റ് അടച്ചിരുന്നപ്പോഴാണ് സ്‌ഫോടനമുണ്ടായതെന്ന് പോലീസ് സ്റ്റേഷന്‍ ആക്ടിങ് ഡയറക്ടര്‍ ബ്രിഗേഡിയര്‍ അബ്ദുല്‍ ഹലീം അല്‍ ഹാഷിമി അറിയിച്ചു. സംഭവം നടന്ന ഉടന്‍തന്നെ പോലീസ് പട്രോള്‍ സംഘവും സിവില്‍ ഡിഫന്‍സും സ്ഥലത്തെത്തി.
കെട്ടിടത്തില്‍ ഉണ്ടായിരുന്ന ആളുകളെയെല്ലാം സുരക്ഷ മുന്‍നിര്‍ത്തി ഒഴിപ്പിച്ചിട്ടുണ്ട്
പാചകവാതകം ചോര്‍ന്നതിനെ തുടര്‍ന്നാണ് സ്‌ഫോടനമുണ്ടായതെന്ന് ബ്രിഗേഡിയര്‍ അബ്ദുല്‍ ഹലീം അല്‍ ഹാഷിമി സ്ഥിരീകരിച്ചു.
അതേസമയം, ഫോറന്‍സിക് ആന്‍ഡ് ക്രിമിനോളജി വകുപ്പില്‍നിന്നുള്ള ഉദ്യോഗസ്ഥരെത്തി തെളിവുകള്‍ ശേഖരിച്ചു. സംഭവത്തില്‍ വിശദമായ അന്വേഷണം നടത്തും. ഹോട്ടല്‍, റെസ്റ്റോറന്റ് ഉടമകള്‍ തങ്ങളുടെ സ്ഥാപനങ്ങളില്‍ ആവശ്യമായ എല്ലാ സുരക്ഷാ സംവിധാനങ്ങളും ഏര്‍പ്പെടുത്തണമെന്നും ഉപകരണങ്ങളുടെ പരിശോധനകള്‍ കൃത്യസമയത്ത് നടത്തണമെന്നും പോലീസ് അറിയിച്ചു.
"
https://www.facebook.com/Malayalivartha
