ഓസ്‌ട്രേലിയയില്‍ കുടുങ്ങിയ മലയാളികള്‍ക്ക് കൈത്താങ്ങുമായി മമ്മൂട്ടി ആരാധകര്‍. ഓസ്ട്രേലിയയിലെ മലയാളികള്‍ക്കായി പെര്‍ത്തില്‍ നിന്നും കൊച്ചിയിലേക്ക് വിമാനം ചാര്‍ട്ടര്‍ ചെയ്തു നൽകുകയാണ് ഇവർ. ഓസ്‌ട്രേലിയയിലെ മമ്മൂട്ടി ആരാധകരുടെ കൂട്ടായ്മയായ മമ്മൂട്ടി ഫാന്‍സ് ആന്‍ഡ് വെല്‍ഫെയര്‍ അസോസിയേഷന്‍ ഇന്റര്‍നാഷണല്‍ ഓസ്‌ട്രേലിയ ഘടകമാണ് കോവിഡ് കാലത്ത് പ്രവാസികൾക്ക് സഹായ ഹസ്തവുമായി മുന്നോട്ട് വന്നിരിക്കുന്നത്. .

പ്രമുഖ എയര്‍ ലൈന്‍സ് കമ്പനിയായ സില്‍ക്ക് എയര്‍ വെയ്സും ഓസ്ട്രേലിയ ആസ്ഥാനമായ ഫ്‌ളൈ വേള്‍ഡ് ഇന്റര്‍നാഷണലും ചേര്‍ന്നാണ് സൗകര്യം ഒരുക്കിയിരിക്കുന്നത്. മലയാളി അസോസിയേഷന്‍ ഓഫ് പെര്‍ത്തും പിന്തുണയുമായി രംഗത്തുണ്ട്. ജൂലൈ 25- ന് ഉച്ചകഴിഞ്ഞു രണ്ടു മണിക്ക് പുറപ്പെടുന്ന വിമാനം അന്നു രാത്രി പത്തു മണിയോടെ കൊച്ചിയില്‍ എത്തും.

ടിക്കറ്റുകള്‍ ആവശ്യം ഉള്ളവര്‍ +61410366089 നമ്പറില്‍ വിളിച്ചു സീറ്റുകള്‍ ബുക്ക് ചെയ്യാവുന്നതാണെന്ന് അധികൃതര്‍ അറിയിച്ചിട്ടുണ്ട്. ഇതു കൂടാതെ നേരത്തെയും നിരവധി കാരുണ്യപ്രവൃത്തികള്‍ മമ്മൂട്ടി ആരാധകര്‍ ചെയ്തിരുന്നു. നേരത്തെ മോഹന്‍ലാലിന്റെ ഗള്‍ഫിലെ ആരാധക കൂട്ടായ്മയായ ലാല്‍ കെയെര്‍സ് പ്രവാസി യാത്രാമിഷന്റെ ഭാഗമായി സൗജന്യ വിമാനത്തില്‍ 177 പ്രവാസികളെ ബഹ്റിനില്‍ നിന്നും കോഴിക്കോട് എത്തിച്ചിരുന്നു.

അതേസമയം കോവിഡ് പ്രതിസന്ധിയിൽ നാട്ടിലെത്തുവാൻ ബുദ്ധിമുട്ടിയ 100 പ്രവാസികൾക്ക് 100 സൗജന്യ ടിക്കറ്റുകൾ നൽകി ഓൾ കേരള പ്രവാസി അസോസിയേഷനും മുന്നോട്ട് വന്നിരുന്നു.. 2000 ഭക്ഷണക്കിറ്റ് വിതരണം, സൗജന്യ മെഡിക്കൽ ക്യാംപ്, നിയമ സഹായം, ഫീസ് അടയ്ക്കാൻ മാർഗമില്ലാത്തവർക്ക് സഹായം, മരുന്നു വിതരണം തുടങ്ങിയവയും നടത്തി. 2.62 ലക്ഷം അംഗങ്ങളുള്ള പ്രവാസി ഓൺലൈൻ കൂട്ടായ്മയാണ് അസോസിയേഷൻ. നൂറാമത് ടിക്കറ്റ് അർഹതപ്പെട്ട ഒരു പ്രവാസിക്ക് ഷാർജ ഇന്ത്യൻ അസോസിയേഷൻ പ്രസിഡന്റ് ഇ പി ജോൺസൻ കൈമാറി. 31 ടിക്കറ്റുകൾ നൽകി എറണാകുളം വരാപ്പുഴ സ്വദേശിയായ ബൻജീനയും 10 ടിക്കറ്റുകൾ നൽകി ഒമാനിൽ ബിസിനസ് നടത്തുന്ന സുരേഷും സൗജന്യ ടിക്കറ്റുകൾ നൽകുന്ന പ്രചാരണത്തിന് നേതൃത്വം നൽകി. രോഗികളായ പ്രവാസികളെ സഹായിക്കുന്നതിനുള്ള പദ്ധതിക്കും കൂടി ഓൾ കേരള പ്രവാസി അസോസിയേഷൻ തുടക്കമിട്ടിട്ടുണ്ട്. കൊറോണ ബാധിച്ച് വിദേശത്ത് മരിച്ച പാവപ്പെട്ട പ്രവാസി കുടുംബങ്ങളെ സഹായിക്കാനുള്ള പദ്ധതിയും ഒരുങ്ങുന്നതായി ഓൾ കേരള പ്രവാസി അസോസിയേഷൻ അറിയിച്ചു.