അങ്ങനെ ദീർഘനാളത്തെ കാത്തിരിപ്പിനു വിരാമമായി. എയർ ബബ്ൾ കരാർ പ്രാബല്യത്തിലായി. ഇന്ത്യയും ബഹ്റൈനും തമ്മിലുള്ള എയർ ബബ്ൾ കരാർ വെള്ളിയാഴ്ച ഒപ്പു വെയ്യ്ക്കുകുയും ചെയ്തു . ഇരു രാജ്യങ്ങളിലേക്കുമുള്ള വിമാന സർവീസ് ഉടൻ തുടങ്ങുമെന്ന് ഇന്ത്യൻ എംബസി അറിയിക്കുകയും ചെയ്തു. ഇന്ത്യയുടേയും ബഹ്റൈന്റെയും ദേശീയ വിമാനക്കമ്പനികൾക്കാണ് സർവീസ് നടത്താൻ അനുമതി. ഇതനുസരിച്ചു എയർ ഇന്ത്യ, എയർ ഇന്ത്യ എക്സ്പ്രസ്സ്, ഗൾഫ് എയർ വിമാനങ്ങൾക്കാണ് സർവീസ് നടത്താൻ അനുമതി നൽകിയത്.

ബഹ്റൈനി പൗരന്മാർക്കും ബഹ്റൈനിൽ സാധുവായ വിസയുള്ളവർക്കും മാത്രമായിരിക്കും യാത്ര ചെയ്യാൻ അനുമതി നൽകുക . വിസിറ്റ് വിസക്കാർക്കും യാത്ര ചെയ്യാം. കരാർ പ്രാബല്യത്തിലായതിനാൽ മേലിൽ യാത്ര ചെയ്യുന്നതിന് ഇന്ത്യൻ എംബസി യിൽ രജിസ്റ്റർ ചെയ്യേണ്ടതില്ല. ഇതുവരെ രജിസ്റ്റർ ചെയ്തവരുടെ ലിസ്റ്റും ഇതോടെ അസാധുവാകും. ദിവസേന വിമാന സർവീസ് ഉണ്ടാകും എന്നതിനാൽ ഇന്ത്യയിൽ കുടുങ്ങിക്കിടക്കുന്ന നിരവധി പേർക്ക് ഇത് സഹായകരമാണ്. എന്നാൽ കോവിഡ് മാനദണ്ഡമനുസരിച്ചു സാമൂഹിക അകലം പാലിച്ചുള്ള യാത്രയായതിനാൽ ഓരോ ഫ്ലൈറ്റിലും യാത്രക്കാരുടെ എണ്ണം കുറക്കേണ്ടി വരും. ടിക്കറ്റിനായി എയർ ഇന്ത്യ സെയിൽസ് ഓഫീസുമായും ഗൾഫ് എയറിന്റെ സെയിൽസ് ഓഫീസുമായും ട്രാവൽ ഏജന്റുകളുമായും ബന്ധപ്പെടാവുന്നതാണ്.

ഇന്ത്യയിൽ കുടുങ്ങിക്കിടക്കുന്ന നിരവധി പേർക്ക് ആശ്വാസകരമാകുന്നതാണ് എയർ ബബ്ൾ കരാർ. അതേസമയം ടിക്കറ്റ് നിരക്ക് താങ്ങാനാവാത്തതാകുമോയെന്ന ആശങ്കയിലുമാണ് പ്രവാസികൾ. ഇന്ത്യയിൽനിന്ന് വിമാന സർവീസ് മുടങ്ങിക്കിടക്കുന്നതിനാൽ വിസ കാലാവധി തീരാറായിട്ടുള്ള നിരവധി പേരാണ് ആശങ്കയോടെ ഇന്ത്യയിൽ കഴിയുന്നത്. പലരുടെയും വിസ കാലാവധി ഇതിനോടകം തീർന്നിട്ടുമുണ്ട്. ഇനി എങ്ങിനെ ബഹ്റൈനിലെത്തും എന്ന ആശങ്കയിലാണിവർ. ഇവരുടെ ജോലി നഷ്ടപെടുമോയെന്നും അറിയില്ല. കഴിഞ്ഞ ദിവസങ്ങളിൽ ഏതാനും സർവീസുകൾ ഇന്ത്യയിൽനിന്ന് എയർ ഇന്ത്യ എക്സ്പ്രസ്സ് നടത്തിയെങ്കിലും നാമമാത്രമായ യാത്രക്കാർക്ക് മാത്രമാണ് ബഹറിനിൽ എത്താൻ കഴിഞ്ഞത്.

അതേസമയം ബഹ്റൈനിൽനിന്നു ഇന്ത്യയിലേക്ക് യാത്രക്ക് തടസ്സമുണ്ടായിരുന്നില്ല. ഇന്ത്യൻ എംബസ്സിയിൽ രജിസ്റ്റർ ചെയ്തിട്ടുള്ള നിരവധി പേർ വന്ദേ ഭാരത് മിഷൻ വഴി നാട്ടിലെത്തി. കൂടാതെ ബഹ്റൈൻ കേരളീയ സമാജവും ബഹ്റൈൻ കേരള സോഷ്യൽ ഫോറവും മറ്റു നിരവധി സംഘടനകളും ചാർട്ടേർഡ് ഫ്ലൈറ്റുകൾ ഏർപ്പെടുത്തിയാൽ നിരവധി പേർക്ക് നാട്ടിലെത്താൻ കഴിഞ്ഞു. ഏതായാലും എയർ ബബ്ൾ കരാർ വന്നതിൽ ആഹ്ലാദഭരിതരാണ് ബഹ്റൈനിലെ പ്രവാസികൾ.