പ്രവാസികൾക്ക് നല്ലകാലം വരുന്നൂ യുഎഇയിലെ ഈ മാറ്റങ്ങൾ അറിയാതെ പോകരുത് ....!!
20 DECEMBER 2025 09:49 PM IST
മലയാളി വാര്ത്ത
ഈ മാറ്റങ്ങൾ പ്രവാസികളുടെ മൊത്തത്തിലുള്ള സാമ്പത്തിക സ്ഥിതി മെച്ചപ്പെടുത്തും.
യുഎഇയിൽ ജോലി ചെയ്യുന്ന പ്രവാസികൾ ഉൾപ്പെടെയുള്ളവർക്ക് ഏറ്റവും പ്രധാനപ്പെട്ട ഒന്നാണ് ശമ്പളം. കഴിഞ്ഞ കുറച്ചു വർഷങ്ങളായി യുഎഇയിലെ സാമ്പത്തിക മേഖലയിൽ വലിയ മാറ്റങ്ങളാണ് നടക്കുന്നത്. പ്രത്യേകിച്ച് 5,000 ദിർഹത്തിന് താഴെ ശമ്പളമുള്ള സാധാരണക്കാരായ തൊഴിലാളികളുടെ കാര്യത്തിൽ.
2026 ആകുമ്പോഴേക്കും നമ്മുടെ ശമ്പളം ലഭിക്കുന്ന രീതിയിലും അത് ചെലവാക്കുന്ന രീതിയിലും വരാൻ പോകുന്ന പ്രധാനപ്പെട്ട 5 മാറ്റങ്ങൾ എന്താണെന്നും അത് എങ്ങനെ ചെലവഴിക്കാമെന്നും വിശദമായി അറിയാം. കാരണം ഈ കാര്യങ്ങൾ പ്രവാസികൾ അറിയാതെയിരുന്നാൽ ചിലപ്പോൾ പണി കിട്ടിയേക്കാം.
നേരത്തെ ശമ്പളം അക്കൗണ്ടിൽ വന്നാൽ ഉടൻ തന്നെ എല്ലാവരും എടിഎമ്മിൽ പോയി മുഴുവൻ തുകയും പിൻവലിക്കുമായിരുന്നു. എന്നാൽ ഈ രീതി ഇനി അങ്ങോട്ട് മാറുകയാണ്. തൊഴിലാളികൾ ശമ്പളം മുഴുവനായി പിൻവലിക്കുന്നത് 84 ശതമാനത്തിൽ നിന്ന് 69 ശതമാനമായി കുറഞ്ഞിട്ടുണ്ട് എന്നാണ് റിപ്പോർട്ടുകൾ സൂചിപ്പിക്കുന്നത്.
2026 ഓടെ ഇത് 60 ശതമാനത്തിന് താഴെയാകും. അതായത്, ആളുകൾ പണം കൈയ്യിൽ വെക്കുന്നതിന് പകരം ഫോൺ വഴിയോ കാർഡ് വഴിയോ നേരിട്ട് പണമടയ്ക്കാൻ ശീലിച്ചു കഴിഞ്ഞു. കൂടാതെ തട്ടിപ്പുകൾ തടയാനുള്ള സംവിധാനങ്ങൾ വന്നതോടെ ഡിജിറ്റൽ ഇടപാടുകൾക്ക് സുരക്ഷിതത്വം വർധിച്ചതും ഇതിന് കാരണമാണ്.
മറ്റൊന്ന് ഇന്ന് നമ്മൾ ഉപയോഗിക്കുന്ന സാലറി ആപ്പുകൾ വെറും ബാലൻസ് നോക്കാൻ മാത്രമുള്ളതല്ല. 2026 ആകുമ്പോഴേക്കും ഈ ആപ്പുകൾ വഴി നാട്ടിലേക്ക് പണം അയക്കാനും, കറന്റ് ബില്ലും ഫോൺ ബില്ലും അടയ്ക്കാനും, ചെറിയ രീതിയിലുള്ള സമ്പാദ്യ പദ്ധതികളിൽ ചേരാനും സാധിക്കും.
പല തൊഴിലുടമകളും ഇത്തരം ആപ്പുകൾ വഴി ജീവനക്കാരുടെ പ്രശ്നങ്ങൾ പരിഹരിക്കാൻ ശ്രമിക്കുന്നുണ്ട്. ഇത് തൊഴിലാളികൾക്ക് വലിയ സൗകര്യമാകും കാരണം നാട്ടിലേക്ക് പണം അയക്കാൻ ഇനി എക്സ്ചേഞ്ചുകളിൽ പോയി വരി നിൽക്കേണ്ട ആവശ്യം ഇതിനില്ല. പലപ്പോഴും ശമ്പളത്തിൽ നിന്ന് പണം കുറയുന്നത് എന്തിനാണെന്നോ അല്ലെങ്കിൽ ലോണുകളുടെയും ക്രെഡിറ്റ് കാർഡുകളുടെയും അപകടങ്ങളെക്കുറിച്ചോ പലർക്കും കൃത്യമായ ധാരണയില്ല.
യുഎഇയിലെ വെറും 31 ശതമാനം പേർക്ക് മാത്രമേ സാമ്പത്തിക കാര്യങ്ങളിൽ വ്യക്തമായ അറിവുള്ളൂ എന്നാണ് റിപ്പോർട്ടുകൾ പറയുന്നത്. അതുകൊണ്ട് തന്നെ കമ്പനികൾ വരും വർഷത്തിൽ തൊഴിലാളികൾക്കായി പ്രത്യേക സാമ്പത്തിക ബോധവൽക്കരണ ക്ലാസുകൾ സംഘടിപ്പിക്കും. അതിൽ ബജറ്റ് എങ്ങനെ തയ്യാറാക്കാം, ഡിജിറ്റൽ പണമിടപാടുകൾ എങ്ങനെ സുരക്ഷിതമായി ചെയ്യാം തുടങ്ങിയ കാര്യങ്ങൾ പഠിക്കാൻ അവസരം ലഭിക്കും.
ഈ വര്ഷം മുതൽ യുഎഇയിലെ വേജ് പ്രൊട്ടക്ഷൻ സിസ്റ്റം കൂടുതൽ ശക്തമാവുകയാണ്. ശമ്പളം നൽകാൻ വൈകിയാലോ ശമ്പളത്തിൽ അനാവശ്യമായി കുറവ് വരുത്തിയാലോ കമ്പനികൾക്ക് കനത്ത പിഴയും നിയന്ത്രണങ്ങളും നേരിടേണ്ടി വരും. 2025 ന്റെ ആദ്യ പകുതിയിൽ തന്നെ അയ്യായിരത്തിലധികം കമ്പനികൾക്കെതിരെ മന്ത്രാലയം നടപടിയെടുത്തു കഴിഞ്ഞു.
ഇനി 2026 ആകുമ്പോഴേക്കും എല്ലാ മാസവും ശമ്പളം കൃത്യമായി തൊഴിലാളികളുടെ അക്കൗണ്ടിൽ എത്തുന്നുണ്ടെന്ന് ഉറപ്പാക്കാൻ മന്ത്രാലയം തത്സമയ നിരീക്ഷണം കൂടെ ഏർപ്പെടുത്തും. ഇത് പ്രവാസി തൊഴിലാളികൾക്ക് ഏറെ ആശ്വാസമാകും. കൂടാതെ നിങ്ങളുടെ അക്കൗണ്ടിൽ നിന്ന് മറ്റേതെങ്കിലും രീതിയിൽ പണം നഷ്ടപ്പെടുകയോ അല്ലെങ്കിൽ നിങ്ങളുടെ ശമ്പളത്തിൽ എന്തെങ്കിലും തടസ്സമുണ്ടാവുകയോ ചെയ്താൽ അത് മുൻകൂട്ടി അറിയാൻ എഐ വഴി സാധിക്കും.
എല്ലാവർക്കും ഇത് വളരെ എളുപ്പത്തിൽ മനസിലാക്കാനായി വലിയ മെസേജുകൾക്ക് പകരം ലളിതമായ ഭാഷയിലാണ് ഫോണിലേക്ക് മുന്നറിയിപ്പുകൾ വരിക. അതിനാൽ നിലവിൽ യുഎഇയിൽ വ്യാപകമായി കൊണ്ടിരിക്കുന്ന തട്ടിപ്പുകളിൽ നിന്ന് സാധാരണക്കാരായ തൊഴിലാളികളെ രക്ഷിക്കാൻ ഈ സംവിധാനം വലിയ സഹായമാകും.
യുഎഇയിൽ 2023 ജൂൺ 1 മുതൽ 9% കോർപ്പറേറ്റ് നികുതി പ്രാബല്യത്തിൽ വന്നെങ്കിലും ചില ഫ്രീസോണുകളിലെ 5% നികുതിയിളവുകൾ 2026 ഓടെ പുനഃപരിശോധിക്കപ്പെട്ടേക്കാമെന്നായിരുന്നു നേരത്തെ അറിയിച്ചിരുന്നത്. അതിനാൽ ചെറുകിട, ഇടത്തരം സംരംഭങ്ങൾ നടത്തുന്ന പ്രവാസികളെ ഇത് നേരിട്ട് ബാധിക്കും.
നികുതി വർധിക്കുമ്പോൾ ബിസിനസ് ചെലവുകൾ ഉയരാനും സാധനങ്ങളുടെയും സേവനങ്ങളുടെയും വിലകൾ വർധിക്കാനും സാധ്യതയുണ്ട്. ഇത് പ്രവാസികൾ ഉൾപ്പെടെയുള്ളവർക്ക് സാമ്പത്തിക ബാധ്യത ഉയർത്തുന്നു. കൂടാതെ പ്രവാസി സംരംഭകരുടെ വരുമാനത്തെയും ഇത് നേരിട്ട് തന്നെ ബാധിച്ചേക്കാം. ഒപ്പം ഇത് നാട്ടിലേക്ക് അയയ്ക്കുന്ന പണത്തിന്റെ അളവിനെയും സ്വാധീനിക്കും.
മറ്റൊന്ന് തൊഴിൽ നിയമങ്ങളിൽ യുഎഇ നിരന്തരം മാറ്റങ്ങൾ കൊണ്ടുവരുന്നുണ്ട്. അതിനാൽ 2026 ൽ തൊഴിൽപരമായ കാര്യക്ഷമതയും തൊഴിലാളികളുടെ അവകാശങ്ങളും ഉറപ്പാക്കുന്ന കൂടുതൽ കർശനമായ നിയമങ്ങൾ പ്രതീക്ഷിക്കാം. നിലവിൽ യുഎഇയിലെ എല്ലാ മേഖലയിലും വ്യക്തമായ നിയമങ്ങൾ ഉണ്ട്.
കൂടാതെ അടുത്ത വർഷം മുതൽ വിസകൾ പുതുക്കുന്നതിനും പുതിയ വിസ നേടുന്നതിനും കൂടുതൽ കർശനമായ യോഗ്യതാ മാനദണ്ഡങ്ങൾ പ്രഖ്യാപിക്കാനുള്ള സാധ്യത ഏറെയാണ്. ഇത് കുറഞ്ഞ വിദ്യാഭ്യാസ യോഗ്യതയുള്ള തൊഴിലാളികളെ സാരമായി തന്നെ ബാധിക്കും. അതിനാൽ തൊഴിൽ കരാറുകൾ കൃത്യമായി വായിച്ചു മനസ്സിലാക്കണം.
മറ്റൊരു പ്രധാന മാറ്റം പ്രൊഫഷണലുകൾക്ക് യുഎഇയിൽ ദീർഘകാല താമസാനുമതി നൽകുന്ന ഗ്രീൻ വിസ, ഗോൾഡൻ വിസ പദ്ധതികളിൽ വരാൻ സാധ്യതയുള്ള മാറ്റങ്ങളാണ്. കൂടുതൽ ഉയർന്ന ശമ്പളവും പ്രത്യേക കഴിവുകളുമുള്ള പ്രൊഫഷണലുകൾക്ക് മാത്രം വിസ നൽകുന്നതിലേക്ക് ഈ നിയമങ്ങൾ മാറിയേക്കാം.
അതേസമയം യുഎഇ റോഡുകളിൽ അപകടങ്ങൾ കുറയ്ക്കുന്നതിനായി ട്രാഫിക് പിഴകൾ വർദ്ധിപ്പിക്കാനും, ലൈസൻസ് എടുക്കുന്നതിനുള്ള മാനദണ്ഡങ്ങൾ കടുപ്പിക്കാനും സാധ്യതയുണ്ട്. അതിനാൽ യുഎഇയിലെ ഡ്രൈവിംഗ് നിയമങ്ങൾ കർശനമായി പാലിക്കേണ്ടതുണ്ട്. കൂടാതെ നിയമ ലംഘനകൾ കാരണമുള്ള പിഴകൾ വലിയ സാമ്പത്തിക ബാധ്യതയും ഉണ്ടാക്കും
കൂടാതെ സൈബർ ലോകത്തെ തട്ടിപ്പുകളും നിയമലംഘനങ്ങളും വർധിക്കുന്ന സാഹചര്യത്തിൽ, ഓൺലൈൻ ഇടപാടുകൾ, സോഷ്യൽ മീഡിയ ഉപയോഗം എന്നിവ സംബന്ധിച്ച നിയമങ്ങൾ കൂടുതൽ കടുപ്പിക്കും. സാമൂഹിക മാധ്യമങ്ങളിലൂടെയോ ഓൺലൈനിലൂടെയോ വ്യക്തിപരമായ അഭിപ്രായങ്ങൾ ഇനി പറയുമ്പോൾ ഒന്ന് ശ്രദ്ധിക്കണം.
കാരണം യുഎഇയിൽ ഇതിനൊക്കെ വ്യക്തമായ ചില നിയമങ്ങൾ പറഞ്ഞിട്ടുണ്ട്. അതിനാൽ ഇത് പാലിക്കുന്നുണ്ടെന്ന് ഉറപ്പുവരുത്തേണ്ടത് അത്യാവശ്യമാണ്. ഒപ്പം ഏതെങ്കിലും തരത്തിലുള്ള സൈബർ കുറ്റകൃത്യങ്ങളിൽ പങ്കാളികളാകുന്നത് കടുത്ത ശിക്ഷയ്ക്ക് കാരണമാകുമെന്നതും ശ്രദ്ധിക്കണം.
യുഎഇയിൽ ഇടയ്ക്കിടെ മാറ്റങ്ങൾ വരാറുണ്ട്. അതിനാൽ പുതുതായി യുഎഇയിൽ എത്തിയ ആളുകൾ കൃത്യമായ നിയമങ്ങൾ, ചെയ്യാൻ പാടുള്ളതും പാടില്ലാത്തതുമായ കാര്യങ്ങൾ എല്ലാം അറിഞ്ഞിരിക്കുന്നത് നല്ലതായിരിക്കും. കാരണം ഒരു ഫോട്ടോ എടുക്കുന്നതിൽ പോലും കൃത്യമായ നിയമങ്ങളുണ്ട്.
അതിനാൽ യുഎഇ സർക്കാരിന്റെ ഔദ്യോഗിക വെബ്സൈറ്റുകളിലൂടെയും അംഗീകൃത വാർത്താ മാധ്യമങ്ങളിലൂടെയും പുതിയ നിയമങ്ങളെക്കുറിച്ച് അറിഞ്ഞിരിക്കണം. തൊഴിൽ കരാറുകളോ വിസ സംബന്ധമായ കാര്യങ്ങളോ സംശയമുണ്ടെങ്കിൽ നിയമപരമായ സഹായം തേടാൻ മടിക്കരുത്.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
