ഇന്ത്യ-യുഎഇ വാണിജ്യ ബന്ധം ശക്തമാക്കാന്‍ ബിസിനസ് ലീഡേഴ്‌സ് ഫോറം രൂപീകരിച്ചു
ഇന്ത്യ-യുഎഇ വാണിജ്യ ബന്ധം ശക്തമാക്കാന്‍ ബിസിനസ് ലീഡേഴ്‌സ് ഫോറം രൂപീകരിച്ചു. ഇന്ത്യന്‍ എംബസി, കോണ്‍സുലേറ്റ്, യുഎഇയിലെ ധനകാര്യ മന്ത്രാലയം എന്നിവയുടെ നേതൃത്വത്തിലാണ് ബിസിനസ് ലീഡേഴ്‌സ് ഫോറം (ബിഎഎഫ്) രൂപീകരിച്ചത്. യുഎഇയിലെ വ്യാപാര, വ്യവസായ രംഗത്തിനു നേതൃത്വം നല്‍കാനും ഇരു രാജ്യങ്ങളിലെയും ബിസിനസ് നേതാക്കള്‍ക്ക് ഇടപഴകുന്നതിനും ആശയങ്ങള്‍ കൈമാറുന്നതിനുമുള്ള വേദിയായിരിക്കും ഇതെന്നു പ്രസിഡന്റ് ഡോ. ആസാദ് മൂപ്പന്‍ പറഞ്ഞു. വ്യാപാരവും നിക്ഷേപങ്ങളും വര്‍ധിപ്പിക്കുന്നതിനും നിക്ഷേപകര്‍ക്കു പ്രശ്‌നങ്ങള്‍ ഉന്നയിക്കുന്നതിനുമുള്ള ഏകജാലക സംവിധാനമായിരിക്കും ബിഎഎഫ്. നൂറുകോടി ദിര്‍ഹത്തിന്റെ നിക്ഷേപ കണ്‍സോര്‍ഷ്യം രൂപീകരിക്കുന്നതിനു ബിഎഎഫ് നേതൃത്വം നല്‍കുമെന്നും അദ്ദേഹം പറഞ്ഞു.
ഇന്ത്യന്‍ മിഷന്‍ ബിഎഎഫിനു രൂപം നല്‍കിയതു വ്യക്തമായ കാഴ്ചപ്പാടോടെയാണെന്നും ഫോറത്തിനു പിന്തുണ നല്കി വ്യാപാരം വര്‍ധിപ്പിക്കുന്നതിനും നിക്ഷേപങ്ങള്‍ കൂട്ടുന്നതിനും യുഎഇഇന്ത്യ ബന്ധം കൂടുതല്‍ ഊഷ്മളമാക്കുന്നതിനുമായി പ്രവര്‍ത്തിക്കുമെന്നും ഇന്ത്യന്‍ സ്ഥാനപതി നവദീപ് സിങ് സൂരി അറിയിച്ചു. ബിഎഎഫ് അംഗത്വം ഇന്ത്യയിലെയും എമിറേറ്റ്‌സിലെയും ബിസിനസ് നേതാക്കള്‍ക്കും മറ്റു സൗഹൃദ രാജ്യങ്ങളിലുള്ളവര്‍ക്കും ഇന്ത്യയുമായും യുഎഇയുമായും ബിസിനസ് ബന്ധങ്ങള്‍ ആഗ്രഹിക്കുന്നവര്‍ക്കും ക്ഷണം അനുസരിച്ചു മാത്രമായിരിക്കും. ഉടന്‍തന്നെ എമിറേറ്റ്‌സിലെ അറബ് ബിസിനസ് നേതാക്കളെ ഉള്‍പ്പെടുത്തി ബോര്‍ഡിനു രൂപം നല്‍കും. കൂടുതല്‍ നിക്ഷേപത്തിനും ഇന്ത്യയില്‍ നിക്ഷേപം നടത്തുന്ന യുഎഇയിലെ രാജ്യാന്തര നിക്ഷേപകരുടെ അവകാശങ്ങള്‍ സംരക്ഷിക്കുന്നതിനുമായി ബിഎഎഫുമായി ധാരണാപത്രം ഒപ്പുവച്ചെന്നു യുഎഇ ഇന്റര്‍നാഷനല്‍ ഇന്‍വെസ്‌റ്റേഴ്‌സ് കൗണ്‍സില്‍ സെക്രട്ടറി ജനറല്‍ ജമാല്‍ ജര്‍വാന്‍ പറഞ്ഞു. യുഐഐസിയുടെ ലക്ഷ്യങ്ങള്‍ നേടിയെടുക്കുന്നതിനു ബിഎഎഫ് നല്ല വേദിയായിരിക്കുമെന്നും അദ്ദേഹം പറഞ്ഞു. കോണ്‍സല്‍ ജനറല്‍ അനുരാഗ് ഭൂഷന്‍ യോഗത്തില്‍ പങ്കെടുത്തു.
https://www.facebook.com/Malayalivartha
