ഹാർവി ചുഴലിക്കാറ്റിനു ശേഷം ഉണ്ടായ കനത്തമഴയിലും വെള്ളപ്പൊക്കത്തിലും ഹൂസ്റ്റൺ ദുരിതത്തിൽ. നദികളും തടാകങ്ങളും കരകവിഞ്ഞ് ഒഴുകുകയാണ്. രണ്ട് അണക്കെട്ടുകൾ നിറഞ്ഞുകവിഞ്ഞത് അപകടഭീഷണി വർധിപ്പിക്കുന്നു.

വെള്ളപ്പൊക്കം ഉണ്ടായതോടുകൂടി ചീങ്കണ്ണികളും പാമ്പുകളുമൊക്കെ താമസകേന്ദ്രങ്ങളിൽ ഒഴുകിയെത്തുകയാണ്.നടൻ ബാബു ആന്റണിയുടെ വീട്ടിലും അങ്ങനെ ചില അതിഥികൾ എത്തി. ഇതേ തുടർന്ന് ബാബു ആന്റണിയും കുടുംബവും സുഹൃത്തിന്റെ വീട്ടിലേക്ക് മാറിയെന്ന് സഹോദനും നടനുമായ തമ്പി ആന്റണി. ഹൂസ്റ്റണിൽ ബാബു ആന്റണിയുടെ വീട്ടിൽ കയറിയ മുതലയുടെയും പാമ്പിന്റെയും ദൃശ്യങ്ങൾ തമ്പി ആന്റണി ഫെയ്സ്ബുക്കിൽ പോസ്റ്റ് ചെയ്തു.

ഹൂസ്റ്റണിന്റെ ചരിത്രത്തിൽ തന്നെ ഇത്രയും ശക്തമായ മഴ ആദ്യമായാണ്. മഴ കൂടി ഡാമുകൾ കൂടി തുറന്നുവിട്ടാൽ ഇതിലും മോശമായ അവസ്ഥയാകും ഉണ്ടാകാൻ സാധ്യത. എത്രയും വേഗം രക്ഷാബോട്ടുകളിൽ ദുരിതാശ്വാസ ക്യാംപുകളിലേക്കു മാറണമെന്നു മലയാളികൾ ഉൾപ്പെടെയുള്ളവർക്ക് അധികൃതർ നിർദേശം നൽകി. താമസസ്ഥലങ്ങൾ നഷ്ടമായവർക്ക് ഇന്ത്യക്കാരുടെ വ്യവസായ സ്ഥാപനങ്ങളിലും ആരാധനാലയങ്ങളിലും അഭയം നൽകുന്നുണ്ട്.

പലരും ദിവസങ്ങളായി വീടിനു പുറത്തിറങ്ങാനാകാത്ത അവസ്ഥയിലാണ്. ശേഖരിച്ചു വച്ച ഭക്ഷണവും തീരാറായി. റോഡുകളെല്ലാം തകർന്നു. ജോർജ് ബുഷ്, ഹോബി വിമാനത്താവളങ്ങൾ അടച്ചിട്ടിരിക്കുകയാണ്. വിമാനത്താവളങ്ങളിൽ 25 അടിയോളം വെള്ളമുണ്ട്. ഗതാഗതമാർഗങ്ങളെല്ലാം അടഞ്ഞതോടെ ഹൂസ്റ്റൺ ഒറ്റപ്പെട്ടു.