ബി.എല്‍.എസ് പ്രാദേശിക കേന്ദ്രങ്ങള്‍ നിര്‍ജീവം; ഉള്‍പ്രദേശങ്ങളിലെ പ്രവാസികള്‍ വലയുന്നു
മസ്കത്ത് ഇന്ത്യന്‍ എംബസിയുടെ പാസ്പോര്‍ട്ട് സേവനങ്ങള്‍ ഏറ്റെടുത്ത സ്വകാര്യകമ്പനിയുടെ പ്രാദശിക കേന്ദ്രങ്ങള്‍ നിര്‍ജീവമാണെന്ന പരാതി വ്യാപകമാകുന്നു.
ഇതോടെ പാസ്പോര്‍ട്ട് സേവനങ്ങള്‍ക്കായി നൂറുകണക്കിന് കിലോമീറ്റര്‍ യാത്ര ചെയ്യണ്ട ഗതികേടിലാണ് ഒമാന്‍െറ വിദൂര പട്ടണങ്ങളില്‍ ജോലിചെയ്യുന്ന പ്രവാസികള്‍. 2011 മുതല്‍ മസ്കത്തിലെ ഇന്ത്യന്‍ എംബസിയുടെ പാസ്പോര്‍ട്ട് വിസാ സേവനങ്ങള്‍ ബി.എല്‍.എസ് ഇന്‍റര്‍നാഷണല്‍ എന്ന് സ്വകാര്യ കമ്പനി ഏറ്റടെുത്തിരിക്കുകയാണ്. കരാര്‍ ലഭിച്ച് ഒരു വര്‍ഷത്തിനകം ഒമാനിലെ വിദൂര പട്ടണങ്ങളില്‍ പ്രാദേശിക കേന്ദ്രം തുറക്കണമെന്നായിരുന്നു വ്യവസ്ഥ. എന്നാല്‍, ഒരു സ്വകാര്യ ട്രാവല്‍ ഏജന്‍സിയുടെ ശാഖകളെ പ്രാദേശിക കേന്ദ്രങ്ങളാക്കി മാറ്റിയാണ് ബി.എല്‍.എസ് വ്യവസ്ഥ പാലിച്ചെന്ന് വരുത്തിയത്. ദിവസം രണ്ടുമണിക്കൂര്‍ മാത്രം പ്രവര്‍ത്തിക്കുന്ന ഈ മൊബൈല്‍ കേന്ദ്രങ്ങളില്‍ പലതും ഇപ്പോള്‍ ഒട്ടും പ്രവര്‍ത്തന സജ്ജമല്ലെന്നാണ് പരാതി. ആഴ്ചകള്‍ മാത്രം പ്രായമുള്ള മകന് പാസ്പോര്‍ട്ടെടുക്കാന്‍ ശ്രമിച്ച തന്നെ ബി.എല്‍.എസ് കേന്ദ്രം വട്ടം കറക്കിയെന്ന് ഇബ്ര കോളജ് അധ്യാപകന്‍ മുനീറുദ്ദീന്‍ സിദ്ദീഖി പറയുന്നു.
ഇബ്രയിലെ കേന്ദ്രത്തിലേക്കാണ് ആദ്യം പോയത്. ലാഭകരമല്ലാത്തതിനാല്‍ ഇപ്പോള്‍ സേവനം ഇല്ല എന്നായിരുന്നു മറുപടി. ഇനി പാസ്പോര്‍ട്ട് കിട്ടാന്‍ പിഞ്ചു കുഞ്ഞിനെയും കൊണ്ട് 200 കിലോമീറ്റര്‍ അകലെ മസ്കത്തിലേക്കോ ജാലാന്‍ ബനി ബുആലിയിലേക്കോ പോകേണ്ട അവസ്ഥയാണ്.
പാസ്പോര്‍ട്ട് അപേക്ഷകളിലെ ഫോട്ടോ സാക്ഷ്യപ്പെടുത്താന്‍ നേരത്തേ വിദൂരപട്ടണങ്ങളില്‍ എംബസി നിയോഗിച്ച കോണ്‍സുലാര്‍ ഏജന്‍റുമാര്‍ക്ക് അധികാരമുണ്ടായിരുന്നു. എന്നാല്‍, സ്വകാര്യ കമ്പനിയുടെ പ്രാദശിക കേന്ദ്രങ്ങള്‍ ലാഭകരമാക്കാന്‍ എംബസി ഇവരുടെ അറ്റസ്റ്റേഷന്‍ അധികാരം എടുത്ത് കളഞ്ഞു.
അതേസമയം, ബി.എല്‍.എസ് വെബ്സൈറ്റില്‍ കോണ്‍സുലാര്‍ ഏജന്‍റ് സാക്ഷ്യപ്പെടുത്തിയ അപേക്ഷ സ്വീകരിക്കുമെന്ന് പറയുന്നുണ്ടെങ്കിലും നടക്കാറില്ല.
https://www.facebook.com/Malayalivartha
