ജിദ്ദയില് നിന്നെത്തിയ മലയാളിക്ക് മെര്സ് രോഗമെന്ന് സംശയം
ജിദ്ദയില് നിന്നു വന്ന മലയാളിയെ മെര്സ് രോഗബാധയെന്ന സംശയത്തെ തുടര്ന്ന് ആസ്പത്രിയില് പ്രവേശിപ്പിച്ചു. മധ്യ-പൂര്വ്വ രാജ്യങ്ങളില് മാത്രം കണ്ടുവരുന്ന വൈറസ് രോഗമാണ് മെര്സ് (മിഡില് ഈസ്റ്റ് റസ്പിരേറ്ററി സിന്ഡ്രം). അതിവേഗം പടരുന്നതും ഉയര്ന്ന മരണനിരക്കുള്ളതുമായ രോഗമാണിത്. നെടുമ്പാശേരി വിമാനത്താവളത്തില് വന്നിറങ്ങിയ ഇദ്ദേഹത്തിന് ശാരീരിക അസ്വാസ്ഥ്യം നേരിട്ടതിനെ തുടര്ന്നാണ് ആസ്പത്രിയില് പ്രവേശിപ്പിച്ചത്. ജനറല് ആസ്പത്രിയില് പ്രവേശിപ്പിച്ച രോഗിയെ ബന്ധുക്കള് പിന്നീട് അമൃത ഇന്സ്റ്റിറ്റിയൂട്ടിലേക്ക് മാറ്റി.
കടുത്ത ശ്വാസതടസ്സവും ചുമയും പനിയും ഉണ്ടായിരുന്ന രോഗിയെ ജനറല് ആസ്പത്രിയില് ഡോ വിജയന്, ഡോ പാര്വതി എന്നിവരുടെ നേതൃത്വത്തിലുള്ള സംഘമാണ് പരിശോധിച്ചത്. ജിദ്ദയില് നിന്നുള്ള യാത്രക്കാരനായതിനാല് മെര്സ് രോഗമെന്ന സംശയം മാത്രമാണെന്ന് ഡോക്ടര്മാര് പറഞ്ഞു. രോഗിയുടെ തൊണ്ടയില് നിന്നു ശേഖരിച്ച കഫം ജനറല് ആസ്പത്രിയില് നിന്ന് മണിപ്പാല് ആസ്പത്രിയിലേക്ക് പരിശോധനയ്ക്ക് അയച്ചിട്ടുണ്ട്. പരിശോധനാ ഫലം ലഭിച്ചശേഷമേ രോഗം സ്ഥിരീകരിക്കൂ. എന്നാല്, എക്സ്റേ എടുത്തതില് ന്യൂമോണിയ ബാധ ഇല്ലെന്നത് മെര്സ് രോഗബാധയാണെന്ന സംശയത്തെ ദുര്ബലപ്പെടുത്തുന്നുണ്ടെന്ന് അമൃതയില് രോഗിയെ പരിശോധിച്ച ഡോ. ഗിരീഷ് പറഞ്ഞു.
https://www.facebook.com/Malayalivartha