പുതിയ വിസ പ്രഖ്യാപിച്ച് യുഎഇ സര്ക്കാര്; പ്രകൃതി ദുരന്തങ്ങളും യുദ്ധക്കെടുതിയും അനുഭവിക്കുന്നവര്ക്ക് ആശ്വാസമായി യുഎഇ
വിവിധ കെടുതികള് നേരിടുന്ന രാജ്യങ്ങളിലെ പൗരന്മാര്ക്ക് ഒരുവര്ഷത്തെ അഭയാര്ത്ഥി വിസ നല്കാന് ഒരുങ്ങുകയാണ് യുഎഇ. യുദ്ധവും പ്രകൃതിദുരന്തങ്ങളും മൂലം വലയുന്ന രാജ്യങ്ങളിലെ പൗരന്മാര്ക്ക് ഒരു വര്ഷത്തെ താമസവിസ നല്കാന് തീരുമാനം കൈക്കൊണ്ടത് യുഎഇ മന്ത്രിസഭയാണ്. ദുരിതമനുഭവിക്കുന്നവര്ക്ക് ആശ്വാസവും സുരക്ഷിതത്വവും നല്കാനുള്ള നടപടികളുടെ ഭാഗമായാണിത്. അടുത്തമാസം ഒന്നു മുതല് ഒക്ടോബര് 31 വരെ വിസയ്ക്ക് അപേക്ഷിക്കാം. വിശദാംശങ്ങള് ഉടന് അറിയിക്കും.
രാജ്യത്തെ തൊഴില് വിസ ചട്ടങ്ങളില് അടുത്തിടെ അടിമുടി മാറ്റമാണ് യുഎഇ മന്ത്രിസഭാ യോഗം കൈക്കൊണ്ടത്. രാജ്യത്തെ സ്വകാര്യ തൊഴില് വിനോദസഞ്ചാരവിദ്യാഭ്യാസ മേഖലക്ക് ഊര്ജ്ജം പകരുന്ന തീരുമാനങ്ങളാണ് യുഎഇ നടപ്പാക്കാനൊരുങ്ങുന്നത്. ഇതിന്റെ ഭാഗമായാണ് ദുരിതം അനുഭവിക്കുന്നവരെ സഹായിക്കാനുള്ള നിര്ദേശവും വന്നത്. മനുഷ്യത്തപരമായി ഈ നീക്കത്തിന് ലോകം മുഴുവന് കയ്യടിക്കയാണ്.
നിലവില് ഒരു തൊഴില് വിസ അനുവദിച്ച് കിട്ടാന് താമസകുടിയേറ്റ വകുപ്പില് മൂവായിരം ദിര്ഹം നിക്ഷേപിക്കണമായിരുന്നു. വിസ റദ്ദാക്കുമ്ബോള് തിരിച്ച് കിട്ടുന്ന രീതിയിലായിരുന്നു ഈ സെക്യൂരിറ്റി ഡിപ്പോസിറ്റ്,എന്നാല് പുതിയ തീരുമാനത്തിന്റെ ഭാഗമായി ഇത് ആവശ്യമില്ല,രാജ്യത്ത് നിക്ഷേപമായി സ്വീകരിച്ചിട്ടുള്ള പതിനാല് ബില്യണ് യുഎഇ ദിര്ഹം തൊഴിലുടമകള്ക്ക് തിരിച്ച് നല്കും.
ഇതിന് പകരം വര്ഷം ഓരോ തൊഴിലാളിക്കും വാര്ഷിക വരിസംഖ്യയായി അറുപത് ദിര്ഹം മാത്രം അടച്ച് പരിരക്ഷാ പദ്ധതിയില് അംഗങ്ങളാകണം. വിസ കാലാവധി കഴിഞ്ഞ് അനധികൃതമായി രാജ്യത്ത് തങ്ങുന്നവര്ക്ക് രണ്ട് വര്ഷത്തേക്ക് യുഎഇയിലേക്ക് വരാന് വിലക്കേര്പ്പെടുത്തിയിരുന്നു. ഇത് ഇനി ഉണ്ടാവില്ല. പകരം നിലവിലുള്ള പിഴയടച്ച് അവര്ക്ക് വീണ്ടും പുതിയ വിസയില് രാജ്യത്തെത്താം.
യുഎഇയിലെ വിമാനത്താവളങ്ങള് വഴി മറ്റ് രാജ്യങ്ങളിലേക്ക് പോവുന്നവര്ക്ക് നാല്പ്പത്തിയെട്ട് മണിക്കൂര് നേരത്തേക്ക് സൗജന്യ ട്രാന്സിറ്റ് വിസ അനുവദിക്കും. 96 മണിക്കൂര് നേരത്തേക്കാണെങ്കില് വെറും അമ്ബത് ദിര്ഹം മാത്രം മതിയാകും.ഇപ്പോള് ഈ വിസക്ക് മുന്നൂറ് ദിര്ഹം ചിലവുണ്ട്. തൊഴില് വിസ കാലാവധി കഴിഞ്ഞും,ജോലിയില് തുടരാന് താല്പര്യമുള്ളവര്ക്ക് ആറ് മാസത്തെ താല്ക്കാലിക വിസ അനുവദിക്കും. രാജ്യത്തെ വിദ്യാഭ്യാസ സ്ഥാപനങ്ങളില് പഠിക്കാന് എത്തുന്നവര്ക്ക് രണ്ട് വര്ഷത്തെ സ്റ്റൂഡന്റ് വിസ നല്കാനും മന്ത്രിസഭായോഗം തീരുമാനിച്ചു.
നിലവിലുള്ള വിസയില് നിന്ന് മറ്റൊരു വിസയിലേക്ക് മാറാന് ഇനി രാജ്യം വിടേണ്ട കാര്യമില്ല,ഇവിടെ തന്നെ വിസ മാറ്റത്തിന് സൗകര്യമൊരുക്കാനും യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന് റാഷിദ് അല് മക്തുമിന്റെ അധ്യക്ഷതയില് അബുദാബിയില് ചേര്ന്ന മന്ത്രിസഭായോഗം തീരുമാനിച്ചിട്ടുണ്ട്. തൊഴില് വിസക്ക് സെക്യൂരിറ്റി ഡിപ്പോസിറ്റ് ആവശ്യമില്ല.
https://www.facebook.com/Malayalivartha
