യുഎഇയിൽ വ്രതശുദ്ധിയുടെ നാളുകൾക്ക് തുടക്കമായതോടെ വിശ്വാസികൾ ആത്മീയമായ ദിനചര്യകളിലേക്ക് കടന്നു കഴിഞ്ഞു. ഫെബ്രുവരി 18-ന് വ്രതം ആരംഭിച്ചതോടെ നഗരങ്ങളിൽ റമസാൻ ശാന്തത നിറയുമ്പോഴും പ്രവാസികൾ ഉൾപ്പെടെയുള്ള താമസക്കാർ ഏറെ ആകാംക്ഷയോടെ കാത്തിരിക്കുന്നത് വരാനിരിക്കുന്ന ചെറിയ പെരുന്നാൾ (ഈദുൽ ഫിത്തർ) അവധി ദിനങ്ങളെക്കുറിച്ചറിയാനാണ്.

അവധി എത്ര ദിവസം?
യുഎഇ പൊതുഅവധി കലണ്ടർ പ്രകാരം ശവ്വാൽ 1 മുതൽ 3 വരെയാണ് പെരുന്നാൾ അവധി. ഇപ്രാവശ്യം ഇത് മാർച്ച് 20 മുതൽ 22 വരെയാകാനാണ് സാധ്യത. എന്നാൽ മാർച്ച് 18ന് (റമസാൻ 29) ചന്ദ്രക്കല ദൃശ്യമാകുന്നതിനനുസരിച്ചാകും ഔദ്യോഗിക പ്രഖ്യാപനം.

നാല് ദിവസത്തെ അവധി: മാർച്ച് 18ന് ചന്ദ്രക്കല ദൃശ്യമായാൽ വ്യാഴാഴ്ച (മാർച്ച് 19) പെരുന്നാൾ ആരംഭിക്കും. അങ്ങനെയാണെങ്കിൽ ഞായറാഴ്ച വരെയുള്ള നാല് ദിവസം താമസക്കാർക്ക് അവധി ലഭിക്കും.

മൂന്ന് ദിവസത്തെ അവധി: ഇനി ചന്ദ്രക്കല ദൃശ്യമാകാതെ വരികയും റമസാൻ 30 പൂർത്തിയാവുകയും ചെയ്താൽ, പെരുന്നാൾ വെള്ളിയാഴ്ച (മാർച്ച് 20) തുടങ്ങും. അപ്പോൾ വെള്ളി മുതൽ ഞായർ വരെ മൂന്ന് ദിവസമായിരിക്കും അവധി.

അവധി നീട്ടിയെടുക്കാൻ ആഗ്രഹിക്കുന്നവർക്ക് ഒരു 'ബുദ്ധിപരമായ' വഴിയും മുന്നിലുണ്ട്. മാർച്ച് 16 തിങ്കൾ മുതൽ 19 വ്യാഴം വരെ വാർഷിക അവധി എടുത്താൽ, തൊട്ടുമുൻപത്തെ വാരാന്ത്യം (മാർച്ച് 14, 15) ഉൾപ്പെടെ മൊത്തം 9 ദിവസത്തെ നീണ്ട അവധി ആഘോഷിക്കാൻ സാധിക്കും. നാട്ടിൽ പോകാൻ ആഗ്രഹിക്കുന്ന പ്രവാസികൾക്ക് ഇത് വലിയൊരു അവസരമാണ്. മലയാളികളടക്കമുള്ള ഇന്ത്യൻ പ്രവാസികൾ വിമാന ടിക്കറ്റ് നിരക്ക് കുത്തനെ കൂടുന്നതിന് മുൻപേ ബുക്ക് ചെയ്യുന്ന തിരക്കിലുമാണ്.

പെരുന്നാളിന് ഇനിയും ദിവസങ്ങൾ ഉണ്ടെങ്കിലും വിപണികൾ ഇപ്പോൾത്തന്നെ സജീവം. തുന്നൽ കടകളിൽ പെരുന്നാൾ വസ്ത്രങ്ങൾക്കുള്ള ഓർഡറുകൾ എടുത്തു കഴിഞ്ഞു. സൂപ്പർ മാർക്കറ്റുകളും മറ്റ് വ്യാപാര സ്ഥാപനങ്ങളും പെരുന്നാൾ വരവേൽക്കാനുള്ള ഒരുക്കങ്ങൾ നേരത്തെ തന്നെ ആരംഭിച്ചു കഴിഞ്ഞു.