ആന കിണറ്റില് വീണു ചരിഞ്ഞു; ജഡം ഉയര്ത്താന് എത്തിയ മണ്ണുമാന്തിയന്ത്രത്തിന് വഴി കാണിക്കാന് പോയ യുവാവിന് ദാരുണാന്ത്യം
ഇടുക്കിയില് കഞ്ഞിക്കുഴി പഞ്ചായത്തിലെ കൈതപ്പാറയില് വീടും കൃഷിയും തകര്ത്ത കാട്ടാനക്കൂട്ടത്തിലെ ഒരു ആന പുരയിടത്തിലെ കിണറ്റില് വീണു ചരിഞ്ഞു. ശനിയാഴ്ച അര്ധരാത്രിയാണ് സംഭവം. തൊടുപുഴ റേഞ്ചിനു കീഴിലെ മണിയാറന്കുടി വനമേഖലയില് നിന്ന് രാത്രി കൂട്ടമായി ഇറങ്ങിയ ആറു കാട്ടാനകള് കുളമ്പനേല് ജോസഫിന്റെ പുരയിടത്തിലേക്ക് കയറുകയായിരുന്നു.
കൃഷി ചവിട്ടിമെതിച്ച ഇവ ജോസഫിന്റെ വീടും , സമീപത്തുള്ള തൊഴുത്തും തകര്ത്തു. ഈ സമയം വീട്ടില് ആളില്ലാതിരുന്നതിനാല് വന് ദുരന്തം ഒഴിവാകുകയായിരുന്നു. തുടര്ന്ന് സമീപത്തെ മാത്യുവിന്റെ പുരയിടത്തിലേക്ക് ഇറങ്ങിയ ആനകള് ഇവിടെയും കൃഷി തകര്ത്ത് മടങ്ങുമ്പോഴായിരുന്നു ഒരു ആന കിണറ്റില് വീണത്.
തലകുത്തി വീണ ആനയ്ക്ക് കരകയറാനായില്ല. കൂട്ടത്തിലെ മറ്റ് ആനകള് പുലര്ച്ച വരെ അവിടെ കാത്തുനിന്നു. ഇന്നലെ രാവിലെ പ്രദേശവാസികള് കൃഷിയിടത്തിലെത്തിയപ്പോഴാണ് വിവരം അറിയുന്നത്. നാട്ടുകാര് അറിയിച്ചതിനെ തുടര്ന്ന് സ്ഥലത്തെത്തിയ വനപാലകര് കാട്ടാനയെ കിണറ്റില് നിന്ന് ഉയര്ത്തി ജഡം മറവു ചെയ്യുന്നതിനുള്ള നടപടികള് ആരംഭിച്ചു.
വനമേഖലയില് നിന്ന് നാട്ടിലേക്ക് ഇറങ്ങിയ കാട്ടാനകള് വഴിയോരത്തുള്ള ഉറുമ്പില് ബൈജു, കുളമ്പനേല് ജോസ് എന്നിവരുടെ കൃഷിയിടങ്ങളിലും വ്യാപക നാശനഷ്ടം വരുത്തി. നാലു ഭാഗവും വനത്താല് ചുറ്റപ്പെട്ട പ്രദേശമാണ് കൈതപ്പാറ.
കിണറ്റില് വീണു ചരിഞ്ഞ കാട്ടാനയുടെ ജഡം ഉയര്ത്താന് പോയ മണ്ണുമാന്തി യന്ത്രം മറിഞ്ഞു കൈതപ്പാറ കുളമ്പേല് (വാഴക്കുളത്ത്) ജോബിഷ് ചാക്കോ (28) മരിച്ചു. ഇന്നലെ വൈകിട്ട് കൈതപ്പാറയിലെത്തിയ മണ്ണുമാന്തിയന്ത്രത്തിന് വഴി കാണിക്കാനാണ് ജോബിഷ് കൂടെപ്പോയത്. മൃതദേഹം ഇടുക്കി ജില്ലാ ആശുപത്രി മോര്ച്ചറിയില്.
https://www.facebook.com/Malayalivartha
