ചൈനയില്‍ ഒരു ടയര്‍ റിപ്പയറിങ് സ്ഥാപനത്തിലെ ഹെവി വെഹിക്കിള്‍ വാഹനത്തിന്റെ ടയര്‍ പൊട്ടിത്തെറിച്ചു. ഉഗ്രസ്‌ഫോടനത്തോടെ പൊട്ടിത്തെറിച്ച ടയര്‍ വന്നിടിച്ച് അമ്മയുടെ കൈയ്യില്‍ നിന്ന് കുഞ്ഞ് തെറിച്ചു വീണു. എന്നാല്‍ കൈക്കുഞ്ഞിന് ഒന്നും സംഭവിച്ചില്ല. കുഞ്ഞിനെ എടുത്തിരുന്ന അമ്മ സാരമായ പരിക്കുകളോടെ ആശുപത്രിയിലായി.

ടയര്‍ റിപ്പയറിങ് സ്ഥാപനത്തില്‍ ജോലിക്കാര്‍ അറ്റകുറ്റപ്പണികള്‍ നടത്തിക്കൊണ്ടിരിക്കുകയായിരുന്നു. പകുതി പണി തീര്‍ത്ത ഒരു വലിയ ടയര്‍ അവര്‍ ഒരു സ്ഥലത്ത് ചാരിവെച്ചു. ഈ സമയത്ത് അവിടെയെത്തിയ അമ്മയും കുഞ്ഞും നടന്ന് ടയറിന് തൊട്ടടുത്ത് എത്തിയപ്പോഴാണ് അത് പൊട്ടിച്ചിതറിയത്.

കുഞ്ഞ് അമ്മയുടെ കയ്യില്‍ നിന്ന് തെറിച്ച് വീണെങ്കിലും ഒന്നും സംഭവിച്ചില്ല. കുട്ടിയുടെ അമ്മയെ പരിക്കുകളോടെ ടയര്‍ കമ്പനിയിലെ ജീവനക്കാര്‍ തന്നെ ആശുപത്രിയില്‍ എത്തിച്ചു. കുട്ടിക്ക് ഒരു വയസില്‍ താഴെ മാത്രമേ പ്രായമുണ്ടാകൂ.

ഇവരുടെ പേരുവിവരങ്ങള്‍ പുറത്തു വിട്ടിട്ടില്ല. അതേസമയം കുഞ്ഞിനേയും എടുത്ത് ഇത്തരം അപകടകരമായ ഒരു സ്ഥലത്തേക്ക് വന്ന അമ്മയെ പൊലീസ് വിമര്‍ശിച്ചു.