മുന്‍ ഇംഗ്ലണ്ട് ക്രിക്കറ്റ് താരം മൈക്കിള്‍ വോണിന്റെ പിറന്നാള്‍ ദിനത്തില്‍ അദ്ദേഹം എടുത്ത സെല്‍ഫിയാണ് ഇപ്പോള്‍ ചര്‍ച്ച വിഷയം. ആടിനൊപ്പമുള്ള ചിത്രത്തിന് വോണ്‍ നല്‍കിയ ക്യാപ്ഷന്‍ 'വിരാടിനൊപ്പം' എന്നായിരുന്നു. വെസ്റ്റ് ഇന്‍ഡീസിനെതിരെ തുടര്‍ച്ചയായ മൂന്നാം ഏകദിനത്തിലും സെഞ്ചുറി നേടിയ കോഹ്‌ലിയെ അഭിനന്ദിക്കുക എന്ന ഉദ്ദേശത്തോടെയാണ് വോണ്‍ അങ്ങനൊരു കുറിപ്പെഴുതിയത്.

ഗോട്ട് (GOAT ) എന്നാല്‍ ഗ്രേറ്റസ്റ്റ് ഓഫ് ഓള്‍ ടൈം (Greatest Of All Time) എന്നാണ് വോണ്‍ ഉദേശിച്ചത്. എന്നാല്‍ ഒരുകൂട്ടം കോഹ്‌ലി ആരാധകര്‍ക്ക് വോണിന്റെ തമാശ അത്ര സുഖിച്ചില്ല. ഇതോടെ വോണിനെതിരെ തെറിവിളിയായി.

ഇംഗ്ലണ്ട് ക്രിക്കറ്റ് ടീമിന്റെ മികച്ച നായകന്മാരിള്‍ ഒരാളാണ് മൈക്കിള്‍ വോണ്‍. എന്നാല്‍ കളി ജീവിതത്തില്‍ നിന്ന് വിരമിച്ചതിന് ശേഷം വോണിന് ഇത്തരത്തില്‍ അമിളി പറ്റുന്നത് പതിവാണ്. എന്തും എവിടെയും വിളിച്ചു പറയുന്ന വോണിന്റെ വാക്കുകള്‍ പലപ്പോഴും വിമര്‍ശനം ഏറ്റുവാങ്ങിയിട്ടുണ്ട്.

അതേസമയം വോണിനെ അനുകൂലിച്ചും പോസ്റ്റിന് താഴെ ഒരുപാട് കമന്റുകള്‍ വരുന്നുണ്ട്. കാര്യം മനസിലാകാത്ത ആരാധകര്‍ക്ക് ഗോട്ടിന്റെ അര്‍ത്ഥം പറഞ്ഞ് കൊടുത്തും വോണിനെ ന്യായീകരിച്ചും നിരവധി ആളുകളാണ് കമന്റ് ചെയ്തിരിക്കുന്നത്.