പോലീസ് സേനയ്ക്കെതിരെ നടക്കുന്ന നുണ പ്രചരണം പൊളിച്ചടുക്കി കേരള പോലീസ്
സോഷ്യല്മീഡിയയില് കേരള പോലീസ് സേനയ്ക്കെതിരെ പ്രചരിക്കുന്ന വ്യാജവാര്ത്തകള്ക്ക് മറുപടിയായി കിടിലന് ട്രോള് വീഡിയോ പങ്കുവച്ച് കേരള പോലീസ് സോഷ്യല്മീഡിയ വിഭാഗം.
ശബരിമല സ്ത്രീ പ്രവേശനവുമായി ബന്ധപ്പെട്ടുണ്ടായ പോലീസ് ലാത്തി ചാര്ജില്, കേരളത്തിലെ ഒരു യുവജന രാഷ്ട്രീയ സംഘടനയിലെ കുറച്ചാളുകള് പോലീസില് കയറികൂടിയാണ് അക്രമം അഴിച്ചുവിട്ടതെന്ന തരത്തിലായിരുന്നു ഈ വ്യാജ പോസ്റ്റുകള് സാമൂഹ്യമാധ്യമങ്ങളില് പ്രത്യക്ഷപ്പെട്ടത്.
എന്നാല് ഈ വ്യാജ പോസ്റ്റുകള് പങ്കുവച്ചവര് പെന്മസാല എന്ന സിനിമയിലെ അഭിനേതാക്കളുടെയും തെലുങ്ക് സിനിമ താരം സമ്പൂര്ണേഷ് ബാബുവിന്റേയും ചിത്രമാണ് ഉപയോഗിച്ചതെന്ന് വെളിപ്പെടുത്തുകയാണ് കേരള പോലീസിലെ സോഷ്യല്മീഡിയ വിഭാഗം കൈകാര്യം ചെയ്യുന്ന ഉദ്യോഗസ്ഥര്.
ഇതിനു മുമ്പും പോലീസിനെതിരെയുള്ള വ്യാജപോസ്റ്റുകളുടെ യാഥാര്ഥ്യം തിരിച്ചറിയുക എന്ന മുന്നറിയിപ്പ് കേരള പോലീസ് നല്കിയിരുന്നു.
'കേരളത്തില് സമാധാനാന്തരീക്ഷം കാത്തു സൂക്ഷിക്കുന്നതില് കേരള പോലീസിന്റെ ശക്തമായ ഇടപെടലുകള് നിര്ണായകമാണ്.
അതുകൊണ്ടുതന്നെ കുറേ വര്ഷങ്ങളായി കേരളത്തില് ഒരു വര്ഗീയ കലാപം പോലും റിപ്പോര്ട്ട് ചെയ്യപ്പെട്ടിട്ടില്ല എന്നുള്ള വസ്തുതയും ഏറെ ശ്രദ്ധേയമാണ്.
നമ്മുടെ നാടിന്റെ സാഹോദര്യവും സഹവര്ത്തിത്വവും കൂടുതല് ശോഭനമാക്കാന് നാമോരോരുത്തരും പ്രതിജ്ഞാബദ്ധരാണെന്നായിരുന്നു കേരള പോലീസ് വ്യക്തമാക്കിയത്'.
https://www.facebook.com/Malayalivartha
