വിവാഹഫോട്ടോകളും വിഡിയോകളുമൊക്കെ വൈറലാക്കാന്‍ വധൂവരന്മാര്‍ പെടാപാട് പെടുന്ന കാലമാണ്. ഇപ്പോഴിതാ സാങ്കേതികതയുടെ യാതൊരു സവിശേഷതയുമില്ലാതെ ഒരു വിവാഹനിശ്ചയ ചിത്രം വൈറലായിരിക്കുകയാണ്.

മെല്‍ബണിലാണ് രസകരമായ ചിത്രം പിറന്നത്. പ്രതിശ്രുതവധുവും പ്രതിശ്രുതവരനും സ്‌നേഹചുംബനം പങ്ക് വയ്ക്കുമ്പോള്‍ വരന്‍ സമ്മാനിച്ച മോതിരം അണിഞ്ഞ കൈ കൊണ്ട് ആ രംഗം മറച്ചുപിടിക്കാന്‍ ശ്രമിക്കവേ ആ മോതിരം കൂടി ചിത്രത്തില്‍ ഉള്‍പ്പെടുന്ന രീതിയില്‍ ഒരു ചിത്രം എടുക്കാനായിരുന്നു ഉദ്ദേശ്യം.

എന്നാല്‍ അപ്പോഴാണ് കൈകള്‍ക്ക് മാനിക്യൂര്‍ ചെയ്തിട്ടില്ലെന്ന് വധു ഓര്‍ത്തത്. ഫോട്ടോയില്‍ മാനിക്യൂര്‍ ചെയ്യാത്ത വിരലുകള്‍ അഭംഗിയാണെന്ന് തോന്നി. വിവാഹനിശ്ചയ പ്രഖ്യാപന സമയത്തിന്റെ ഫോട്ടോയില്‍ പതിയുന്നത് മനോഹരമായ കൈവിരലുകള്‍ ആകേണ്ടിയിരുന്നു എന്ന് കുണ്ഠിതപ്പെട്ടപ്പോഴാണ് സഹോദരി സഹായഹസ്തവുമായി എത്തിയത്.

വധുവിന്റേതിനേക്കാള്‍ മനോഹരമായ വിരലുകളായിരുന്നു അവര്‍ക്കുണ്ടായിരുന്നത്. ഒപ്പമുണ്ടായിരുന്ന സഹോദരിയോട് തന്റെ കൈ കൊണ്ട് മറച്ചുപിടിക്കാന്‍ ആവശ്യപ്പെട്ടശേഷം ഫോട്ടോയെടുത്തു. ആ ചിത്രം മാത്രമായി കാണുകയാണെങ്കില്‍ വധു, വിവാഹമോതിരം അണിഞ്ഞ സ്വന്തം കൈ കൊണ്ട് ചുംബിക്കുന്ന രംഗത്തിന് മറപിടിക്കയാണെന്ന തോന്നൂ.

ചുംബനം മറയ്ക്കുന്ന ആ ചിത്രം വൈറലായി. ഇത്രയും മനോഹരമായ കൈവിരലുകളുള്ള വധുവിന്റെ വിവരങ്ങളാണ് കൂടുതല്‍പേരും അന്വേഷിച്ചത്. ചുവപ്പ് നെയില്‍പോളിഷ് അണിഞ്ഞ നീണ്ട വിരലുകളുടെ ഉടമയെ തേടിയുള്ള ആ അന്വേഷണത്തിന്റെ ഒടുവിലാണ് ഈ രഹസ്യം പുറത്തായത്.