ഒരു ദിവസമെടുത്ത മൂന്ന് ലോട്ടറിയും ഒരാള്‍ക്ക് അടിച്ചാലോ? എത്ര മനോഹരമായ നടക്കാത്ത സ്വപ്‌നങ്ങള്‍ എന്നാവും പറയാന്‍ തോന്നുക,അല്ലേ? എന്നാല്‍ ഇതു കേള്‍ക്കൂ.

അമേരിക്കയിലെ ന്യൂ ജഴ്‌സിയിലെ റോബര്‍ട്ട് സ്റ്റീവാര്‍ട്ടിന് ഇക്കഴിഞ്ഞ ഓഗസ്റ്റ് മാസം സമ്മാനപ്പെരുമഴ ആയിരുന്നു.  കെട്ടിടമേഖലയില്‍ ഡ്രൈവറായി വിരമിച്ച ആളാണ് ഈ ഭാഗ്യതാരം.

ആഗസ്റ്റ് മാസത്തിലാണ് റോബര്‍ട്ട് സ്റ്റീവാര്‍ട്ടിന് അഞ്ചു മില്യന്‍ ഡോളര്‍ ലോട്ടറിയടിച്ചത്. അതായത് ഇന്ത്യന്‍ രൂപയില്‍ 36 കോടിയ്ക്കു മുകളില്‍ വരുന്ന തുക. സ്‌ക്രാച്ച് കാര്‍ഡ് ലോട്ടറിയുടെ ജാക്‌പോട്ട് സമ്മാനമായിരുന്നു അത്.

ജാക്‌പോട്ട് കിട്ടിയ സന്തോഷത്തില്‍ കടയിലെത്തി വീണ്ടും രണ്ട് ലോട്ടറിയെടുത്തു സ്റ്റീവാര്‍ട്ട്. ഭാഗ്യം സ്റ്റീവാര്‍ട്ടിനെ വിട്ടു പോയിരുന്നില്ല. ആ രണ്ടു ടിക്കറ്റിനും സമ്മാനമടിച്ചു. ഒന്നിന് 500 ഡോളറും മറ്റൊന്നിനു 100 ഡോളറും. രണ്ടാമതു കിട്ടിയ തുകകള്‍ ചെറുതാണെങ്കിലും തുടര്‍ച്ചയായി ഭാഗ്യം സ്റ്റീവാര്‍ട്ടിന് തേടിയെത്തിയ വാര്‍ത്ത നാട്ടില്‍ അദ്ഭുതമായി.

ആഗസ്റ്റ് രണ്ടാണ് റോബര്‍ട്ട് സ്റ്റീവാര്‍ട്ടിന്റെ ഭാഗ്യദിനം, അന്നായിരുന്നു ഭാഗ്യപ്പെരുമഴ ഉണ്ടായത്. പക്ഷേ, പിന്നെയും രണ്ടു മാസം കഴിഞ്ഞ് ഇപ്പോഴാണ് വാര്‍ത്ത ന്യൂ ജഴ്‌സി ലോട്ടറി പുറത്തുവിട്ടത്. ഇതോടെയാണ് ഇദ്ദേഹത്തിന്റെ ഭാഗ്യം ലോകമറിഞ്ഞത്.

ഇതിനു മുന്‍പ് ഒരിക്കല്‍ 2500 ഡോളര്‍ സ്റ്റീവാര്‍ട്ടിനു സമ്മാനമായി ലഭിച്ചിട്ടുണ്ട്. സമ്മാനമായി ലഭിച്ച തുക കൊണ്ട് തന്റെ കുടുംബാംഗങ്ങളെയും കൂട്ടുകാരെയും സഹായിക്കാനാണ് റോബര്‍ട്ടിന്റെ തീരുമാനം.