സെയ്ഫ് അലി ഖാന്‍-കരീന ദമ്പതിമാരുടെ കുഞ്ഞ് രാജകുമാരന്‍ തൈമൂര്‍ അലി ഖാന്‍ പട്ടൗഡി ജനിച്ച അന്ന് മുതല്‍ താരമാണ്. തൈമൂറിനെ കുറിച്ച് എഴുതിയും പറഞ്ഞും ആര്‍ക്കും മതിവന്നിട്ടില്ല. രാജ്യത്തെ ഏറ്റവും പ്രശസ്തനും ഏറ്റവും കൂടുതല്‍ ആരാധകരുമുളള കുട്ടി സെലിബ്രിറ്റി തൈമൂറാണ്. എവിടെപ്പോയാലും തന്നെ പിന്തുടരുന്ന പാപ്പരാസിയെ കണ്ട് തുടങ്ങിയ കാലത്ത് ഒന്നമ്പരന്നുവെങ്കിലും ഇപ്പോള്‍ അത് തന്റെ ജീവിതത്തിന്റെ തന്നെ ഭാഗമാണ് എന്ന് തിരിച്ചറിഞ്ഞു കഴിഞ്ഞു തൈമൂര്‍. അടുത്തിടെ തൈമൂറിന് പിന്നാലെ ഫോട്ടോയെടുക്കാനായി കൂടെകൂടിയ ഫോട്ടോഗ്രാഫര്‍മാരെ തിരുത്തി കൊച്ചു തൈമൂര്‍ ശ്രദ്ധാകേന്ദ്രമായിരുന്നു.

കേരളത്തിലും തൈമൂര്‍ താരമാകുകയാണ്. തൈമൂറിന് കേരളത്തില്‍ നിരവധി ആരാധകരുണ്ടെന്ന് തെളിയിച്ചു നിര്‍മ്മാതാവായ അശ്വിനി യാര്‍ദ്ദി പങ്കുവെച്ച ചിത്രം. കുര്‍ത്തയും പൈജാമയും അതിനു മുകളില്‍ നെഹ്‌റു ജാക്കറ്റുമണിഞ്ഞ ഒരു പാവയ്ക്ക് തൈമൂറിന്റെ മുഖമാണെന്ന് അശ്വിന്‍ യാര്‍ദിക്കു തോന്നി. കേരളത്തിലെ ഒരു പാവക്കടയില്‍ നിന്ന് എന്ന കുറിപ്പിലാണ് യാര്‍ദി തൈമൂറുമായി രൂപസാദൃശ്യമുള്ള ഒരു പാവയുടെ ചിത്രം ട്വിറ്ററില്‍ പങ്കുവെച്ചത്.

ചുരുണ്ട, ഇടതൂര്‍ന്ന ബ്രൗണ്‍ നിറത്തിലുള്ള മുടിയും മുഖഭാവവുമൊക്കെയായി തൈമൂറുമായി പാവയ്ക്കുള്ള സാമ്യം കൗതുകമുണര്‍ത്തും. തൈമൂറിന്റെ പ്രശസ്തി ആളുകള്‍ക്ക് സഹായകരമായി മാറുന്നത് കാണുന്നതില്‍ സന്തോഷമുണ്ടെന്നാണ് തൈമൂര്‍ പാവയുടെ ചിത്രം കണ്ണില്‍പ്പെട്ട സെയ്ഫ് അലി ഖാന്‍ പ്രതികരിച്ചത്.

ഞാന്‍ അവന്റെ പേര് ട്രേഡ്മാര്‍ക്ക് ചെയ്യേണ്ടതുണ്ട്. ഏറ്റവും കുറഞ്ഞത് അവര്‍ക്ക് ഒരു പാവ അയക്കാമായിരുന്നു. അവന്‍ മറ്റുള്ളവര്‍ക്ക് ഗുണകരമായി മാറുന്നതില്‍ സന്തോഷമുണ്ട്. അതിനു പകരമെന്നോണം, അവന്റെ സുരക്ഷയും സന്തോഷവും ഉറപ്പു വരുത്തണമേ എന്നു മാത്രമാണ് ഞാന്‍ ദൈവത്തോട് പ്രാര്‍ത്ഥിക്കുന്നത് ഒരു മാധ്യമത്തിന് അനുവദിച്ച അഭിമുഖത്തില്‍ സെയ്ഫ് പറഞ്ഞു.