ഇന്നലെ ഗാബാ സ്‌റ്റേഡിയത്തില്‍ നടന്ന ഇന്ത്യ-ഓസ്‌ട്രേലിയ ഒന്നാം ട്വന്റി20 മല്‍സരത്തെക്കുറിച്ച് മുന്‍ ഇന്ത്യന്‍ താരം വീരേന്ദര്‍ സേവാഗിന്റെ ട്വീറ്റ് വൈറലാകുന്നു. മഴമൂലം ഡക്ക്‌വര്‍ത്ത് ലൂയിസ് നിയമം നിര്‍ണായകമായി മാറിയ മത്സരത്തില്‍ ഇന്ത്യ നാലു റണ്‍സിന് ഓസീസിനോടു തോറ്റിരുന്നു. ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഓസ്‌ട്രേലിയ 17 ഓവറില്‍ നാലു വിക്കറ്റ് നഷ്ടത്തില്‍ നേടിയത് 158 റണ്‍സ് മാത്രം. എന്നാല്‍, ഡക്‌വര്‍ത്ത് ലൂയിസ് നിയമപ്രകാരം ഇന്ത്യയുടെ വിജയലക്ഷ്യം 17 ഓവറില്‍ 174 ആയി പുനര്‍നിശ്ചയിച്ചതോടെയാണ് ഇന്ത്യ തോല്‍വി വഴങ്ങിയത്. 17 ഓവറില്‍ ഏഴു വിക്കറ്റ് നഷ്ടത്തില്‍ 169 റണ്‍സെടുത്തെങ്കിലും ഇന്ത്യ നാലു റണ്‍സിന് തോല്‍ക്കുകയായിരുന്നു.

ഓസീസ് 17 ഓവറില്‍ നേടിയത് 158 റണ്‍സാണെങ്കിലും, അത്രതന്നെ ഓവറുകളില്‍നിന്ന് 169 റണ്‍സ് നേടിയിട്ടും ഇന്ത്യ തോറ്റ സാഹചര്യത്തിലാണ് പകുതി തമാശയായും പകുതി കാര്യമായും വീരുവിന്റെ ട്വീറ്റ് എത്തിയത്. ഓസീസിനേക്കാള്‍ 11 റണ്‍സ് അധികം നേടിയിട്ടും ഇന്ത്യ നാലു റണ്‍സിന് തോറ്റതിനെക്കുറിച്ച് വീരുവിന്റെ കമന്റ് ഇങ്ങനെ;

'ഓസ്‌ട്രേലിയയുടെ സ്‌കോറിനേക്കാള്‍ ഉയര്‍ന്ന സ്‌കോര്‍ നേടിയിട്ടും ഇന്ത്യ തോറ്റിരിക്കുന്നു. ഓസ്‌ട്രേലിയന്‍ സ്‌കോറിനൊപ്പം കൂട്ടിച്ചേര്‍ത്ത 'ജിഎസ്ടി'യാണ് പണിപറ്റിച്ചത്.' എങ്കിലും ഒരു പരമ്പരയ്ക്കു തുടക്കമിടാന്‍ പറ്റിയ ആവേശപ്പോരാട്ടമായിരുന്നു ഇത്.

മല്‍സരത്തിനു തൊട്ടുപിന്നാലെ എത്തിയ വീരുവിന്റെ ഈ കമന്റ് ക്രിക്കറ്റ് ആരാധകര്‍ ഏറ്റെടുത്തു കഴിഞ്ഞു. ഡക്ക്‌വര്‍ത്ത് ലൂയിസ് നിയമം 'ചതിച്ചുവെന്ന' വികാരത്തില്‍ നിരാശപ്പെട്ടിരുന്ന ആരാധകരെല്ലാം ഇപ്പോള്‍ വീരുവിന്റെ ട്വീറ്റും ഷെയര്‍ ചെയ്യുകയാണ്.