മന്ത്രി ഇ.ചന്ദ്രശേഖരന്റെ മകളുടെ വിവാഹം ആര്‍ഭാടരഹിതമായി നടന്നു. പുഷ്പഹാരമണിയിക്കലും താലി ചാര്‍ത്തലും ഉള്‍പെടെ 10 മിനിറ്റില്‍ കല്യാണച്ചടങ്ങുകള്‍ കഴിഞ്ഞു. പങ്കെടുത്തവര്‍ക്കെല്ലാം ചായയും ബിസ്‌കറ്റും.

ടൗണ്‍ഹാളില്‍ നടന്ന ലളിതമായ ചടങ്ങില്‍ മന്ത്രിയുടെ മകള്‍ നീലി ചന്ദ്രന്റെയും കാസര്‍കോട് ടൗണ്‍ സര്‍വീസ് സഹകരണബാങ്ക് റിട്ട. മാനേജര്‍ കാഞ്ഞങ്ങാട് ചെമ്മട്ടംവയലിലെ പി.കുഞ്ഞികൃഷ്ണന്‍ നായരുടെ മകന്‍ പി.വിഷ്ണുവിന്റെയും വിവാഹം ശുഭം.

ടൗണ്‍ഹാളും പരിസരവും നിറഞ്ഞുകവിഞ്ഞ് ജനം. കൊട്ടും കുരവയുമില്ല. പണക്കൊഴുപ്പിന് ഇടം നല്‍കാത്ത വേദി. അവരെയെല്ലാം നേരിട്ടു സ്വീകരിച്ച് നാടിന്റെ സ്വന്തം 'ചന്ദ്രേട്ടന്‍'. മുഖ്യമന്ത്രി പിണറായി വിജയന്‍ സദസ്സിന്റെ മുന്‍നിരയില്‍ ഉപവിഷ്ടനായതോടെ ചടങ്ങുകള്‍ തുടങ്ങി. എ4 സൈസ് പേപ്പറില്‍ അച്ചടിച്ച ലളിതമായ വിവാഹ ക്ഷണക്കത്ത് നേരത്തേ തന്നെ എല്ലാവരും ശ്രദ്ധിച്ചിരുന്നു.

പ്രശസ്തരുടെ പങ്കാളിത്തം കൊണ്ടു ഗംഭീരമായിരുന്നു ചടങ്ങ്. മുഖ്യമന്ത്രിയുള്‍പെടെ 17 മന്ത്രിമാര്‍. കൂടാതെ സ്പീക്കര്‍, ഡെപ്യൂട്ടി സ്പീക്കര്‍ , എംപി, എംഎല്‍എമാരുള്‍പെട്ട വലിയ രാഷ്ട്രീയ സദസ്സ്. ഒട്ടേറെ ഉന്നത ഉദ്യോഗസ്ഥരും പങ്കെടുത്തു. ജനപ്രിയനായ മന്ത്രിയുടെ മകളുടെ വിവാഹത്തിനു സാക്ഷ്യം വഹിക്കാന്‍ നാടു മുഴുവന്‍ ഒഴുകിയെത്തി.

1981-ല്‍ ആയിരുന്നു ഇ.ചന്ദ്രശേഖരന്റെയും വി.സാവിത്രിയുടെയും വിവാഹം. താലികെട്ടും പുടവ കൈമാറ്റവുമില്ലാതെ പൂമാല ചാര്‍ത്തലില്‍ ഒതുക്കിയ ഹ്രസ്വമായ ചടങ്ങ്. പങ്കെടുത്തവര്‍ക്കു നല്‍കിയതു നാരങ്ങ സര്‍ബത്ത്. കാര്‍മികത്വം വഹിച്ചത് അന്നു പാര്‍ട്ടി ജില്ലാ സെക്രട്ടറിയേറ്റംഗമായിരുന്ന മുന്‍ മന്ത്രി പരേതനായ ഡോ. എ.സുബ്ബറാവു. ലാളിത്യത്തിന്റെ തുടര്‍ച്ച നിലനിര്‍ത്തിക്കൊണ്ട് രക്ഷിതാക്കളുടെ വഴിയേ മകളുടെ വിവാഹവും നടന്നു.