ഉരഗ ലോകത്ത് സൂപ്പര്‍ സ്റ്റാര്‍ ആയി വാഴുന്ന പഞ്ചവര്‍ണ പാമ്പ്
ലോകത്തെ ഏറ്റവും സുന്ദരനായ പാമ്പ് ഏതാണെന്ന് അറിയാമോ? ഓറഞ്ച് നിറത്തില്‍ ആകര്‍ഷകമായ തല. പച്ചയും നീലയും നേരിയ ചുവപ്പും കറുപ്പും ഇടകലര്‍ന്ന മനോഹരമായ ഉടല്‍. അമേരിക്കയിലെ സാന്‍ഫ്രാന്‍സിസ്‌കോയില്‍ ഉള്ള അപൂര്‍വയിനം പാമ്പായ സാന്‍ഫ്രന്‍സിസ്‌കോ ഗാര്‍ട്ടറെ കുറിച്ചാണ് പറയുന്നത്.
കണ്ടാല്‍ എടുത്ത് ഓമനിക്കാനും വീട്ടില്‍ കൊണ്ടു പോയി വളര്‍ത്താനും ഒക്കെ തോന്നുന്നത്ര ഭംഗിയാണ് ഈ പ്രത്യേക ഇനം പാമ്പുകള്‍ക്ക്. പച്ച കലര്‍ന്ന നീല നിറത്തിലുള്ള ഉടലില്‍ കറുപ്പും ചുവപ്പും നിറത്തിലുള്ള വരകളുമുണ്ട് ഇവയ്ക്ക്.
ഈ ഉരഗ സുന്ദരന്റെ ശാസ്ത്രനാമം താംനോഫിസ് സിര്‍റ്റാലിസ് ടെട്രാറ്റേനിയ എന്നാണ്. ഉടലിനെക്കാള്‍ അല്‍പം വീതി കൂടിയ തലയാണ് ഇവയ്ക്കുള്ളത്. അമേരിക്കയില്‍ സാധാരണയായി കണ്ടു വരുന്ന ഗാര്‍ട്ടര്‍ ഇനത്തില്‍ ഉള്ള പാമ്പുകളുടെ ഉപവിഭാഗമാണ് സാന്‍ ഫ്രന്‍സിസ്‌കോ ഗാര്‍ട്ടര്‍. പൂര്‍ണ വളര്‍ച്ചയെത്തിയ ഈ വിഭാഗത്തില്‍പ്പെട്ട പാമ്പുകള്‍ക്ക് 46 മുതല്‍ 140 സെന്റീമീറ്റര്‍ വരെ നീളമുണ്ടാകും.
വിഷപ്പല്ലുകള്‍ ഇല്ലാത്ത ഇവ ഉമിനീരിലെ വിഷാംശം ഉപയോഗിച്ചാണ് ഇരപിടിക്കുനത്. എന്നാല്‍ ഇത് മനുഷ്യനു ദോഷകരമല്ല. വംശനാശ ഭീഷണി നേരിടുന്ന ജീവികളുടെ പട്ടികയിലാണ് സാന്‍ ഫ്രന്‍സിസ്‌കോ ഗാര്‍ട്ടറിനെയും ഉള്‍പ്പെടുത്തിയിരിക്കുന്നത്.
നിലവില്‍ ഇവയുടെ എണ്ണം 1000-നും 2000 -നും ഇടയില്‍ മാത്രമാണെന്നു ഗവേഷകര്‍ പറയുന്നു. അതിനാല്‍ തന്നെ ഇവയെ പിടിക്കുന്നതു കുറ്റകരമാണ്. എന്നാലും അടുത്തു കണ്ടാല്‍ ഈ ഉരഗ സുന്ദരന്മാരുടെ സൗന്ദര്യത്തില്‍ മയങ്ങി, നിയമവിരുദ്ധമാണെങ്കിലും അവയെ വളര്‍ത്താന്‍ കൊണ്ടു പോകുന്നവരും കുറവല്ല.
https://www.facebook.com/Malayalivartha
