മുട്ടന്‍ പണി ഇരന്നു വാങ്ങി ഫ്ലോറിഡയില്‍ ഒരു യുവതി! അയല്‍ക്കാരന്റെ വീട്ടിലെത്തിയ കൊറിയര്‍ യുവതി മോഷ്ടിച്ചെടുക്കുകയായിരുന്നു.

എന്നാല്‍ അയല്‍ വീട്ടില്‍ നിന്നും മോഷ്ടിച്ച് കൊണ്ടുവന്ന കൊറിയര്‍ തുറന്ന യുവതി ഞെട്ടി. അയല്‍വീട്ടുകാരുടെ മകന്‍ വളര്‍ത്തുന്ന ഓന്തിന്റെ ഭക്ഷണാവശ്യത്തിനായി കൊണ്ടുവന്ന ചില പ്രത്യേകയിനം വണ്ടുകളുടെ ലാര്‍വ്വയാണ് യുവതി അയല്‍ക്കാരന്റെ വീട്ടുപടിക്കല്‍ നിന്ന് മോഷ്ടിച്ചത്. വീടിന്റെ കതകിലുണ്ടായിരുന്ന സിസി ടിവി ശ്രദ്ധിക്കാതെയായിരുന്നു യുവതിയുടെ മോഷണം.

സംഭവം നടന്നത് ഫ്‌ലോറിഡയിലെ അപ്പോപ്ക എന്ന സ്ഥലത്താണ് . സമയമായിട്ടും പാര്‍സല്‍ ലഭിക്കാതിരുന്നതിനെ തുടര്‍ന്നാണ് ഷെല്ലി ഡ്രേവ് എന്നയാള്‍ കൊറിയര്‍ കമ്പനിയുമായി ബന്ധപ്പെട്ടത്.

എന്നാല്‍ പാര്‍സല്‍ വീട്ടിലെത്തിച്ചിട്ട് ഏറെ മണിക്കൂറുകള്‍ ആയെന്നായിരുന്നു കൊറിയര്‍ കമ്പനിക്കാരുടെ മറുപടി. തുടര്‍ന്നാണ് ഷെല്ലി സിസി ടിവി ദൃശ്യങ്ങള്‍ പരിശോധിച്ചത്.

പരിസരം നീരീക്ഷിച്ച ശേഷം യുവതി വീട്ടുപടിക്കല്‍ എത്തുന്നതും പാര്‍സല്‍ എടുത്തുകൊണ്ട് പോവുന്നതും സിസി ടിവി ദൃശ്യങ്ങളില്‍ വ്യക്തമാണ്.

തുടര്‍ന്ന് വീടിന് പരിസരത്ത് നടന്ന വിശദമായ പരിശോധനയില്‍ ഏതാനും വീടുകള്‍ക്ക് അകലെ പാര്‍സല്‍ ഉപേക്ഷിക്കപ്പെട്ട നിലയില്‍ കണ്ടെത്തി. എന്നാല്‍ ഇതില്‍ നിന്ന് പകുതിയില്‍ എറെയും ലാര്‍വ്വകള്‍ നഷ്ടമായെന്ന് ഷെല്ലി പറയുന്നു. സിസിടിവി ദൃശ്യങ്ങള്‍ ഉള്‍പ്പെടുത്തി ഷെല്ലി സമൂഹമാധ്യമങ്ങളില്‍ വിവരം പങ്കുവച്ചതോടെയാണ് സംഭവം പുറംലോകമറിയുന്നത്.