കെട്ടിടങ്ങളില്‍ അഗ്‌നിപടരുമ്പോഴുണ്ടാകുന്ന അലാറം ശബ്ദം കേട്ട് ഇംഗ്ലണ്ടിലെ ദാവെന്‍ട്രി എന്ന സ്ഥലത്ത് എത്തിയ അഗ്‌നിശമന സേനാംഗങ്ങള്‍ക്ക് പറ്റിയ അമളി് സോഷ്യല്‍മീഡിയയുടെ ശ്രദ്ധയ്ക്ക് വിഷയമായി.

ഒരു വീട്ടിനുള്ളില്‍ നിന്നും അലാറം ശബ്ദം കേട്ട സമീപവാസികളാണ് അഗ്‌നിശമന സേനാംഗങ്ങളെ വിവരം അറിയിച്ചത്.

ഇവരെത്തി വീട്ടുടമസ്ഥനോട് കാര്യം ആരാഞ്ഞപ്പോള്‍ തനിക്ക് ഒന്നുമറിയില്ലെന്ന് പറഞ്ഞ് അദ്ദേഹം കൈമലര്‍ത്തുകയായിരുന്നു. വീടിന് യാതൊരു കുഴപ്പവുമില്ലെന്ന് അദ്ദേഹം പറഞ്ഞുവെങ്കിലും അത് വിശ്വസിക്കുവാന്‍ സര്‍വ സന്നാഹങ്ങളുമായി എത്തിയ അഗ്‌നിശമനസേനാംഗങ്ങള്‍് തയാറായില്ല.

പിന്നീട് അവര്‍ വീട്ടില്‍ പരിശോധന നടത്തികൊണ്ടിരുന്നതിനിടയില്‍ വീടിന്റെ പിറകുവശത്ത് നിന്നും വീണ്ടും ഈ അലാറം ശബ്ദം കേട്ടു. ശബ്ദം കേട്ട് ഇവര്‍ വന്ന് നോക്കിയപ്പോള്‍ കാണുന്നത് ഒരു തത്തയെ ആയിരുന്നു.

ഈ തത്തയായിരുന്നു അലാറം സമാന ശബ്ദത്തിന്റെ യഥാര്‍ത്ഥ ഉടമ. ആഫ്രിക്കന്‍ ഗ്രേ എന്ന ഇനത്തില്‍പ്പെട്ട തത്തയാണ് ഈ ശബ്ദമുണ്ടാക്കിയത്. ധര്‍മ സങ്കടത്തിലായ അഗ്‌നിശമന സേനാംഗങ്ങള്‍ തന്നെയാണ് ഈ വീഡിയോ ദൃശ്യങ്ങള്‍ പകര്‍ത്തി സാമൂഹ്യ മാധ്യമങ്ങളില്‍ പങ്കുവച്ചത്.