മദ്യലഹരിയില്‍ അമിതവേഗതയില്‍ വാഹനമോടിച്ചതിനെ തുടര്‍ന്നുണ്ടായ അപകടത്തില്‍ നിന്ന് ഭാര്യയും ഭര്‍ത്താവും അത്ഭുതകരമായി രക്ഷപ്പെട്ടു. അമിത വേഗതയില്‍ വന്ന വാഹനത്തില്‍ നിന്ന് പുറത്തേക്ക് വീണ യുവതി അന്തരീക്ഷത്തില്‍ ഉയര്‍ന്നു പൊങ്ങിയ ശേഷമാണ് തറയിലേക്ക് വീണത്. യുവാവ് അമിതമായി മദ്യപിച്ചിരുന്നതായി പൊലീസ് പറഞ്ഞു. ചൈനയിലാണ് സംഭവം .

ഭാര്യപിതാവ് നല്‍കിയ പണത്തെ ചൊല്ലി അമിതമായി മദ്യപിച്ചിരുന്ന ഇയാള്‍ വാഹനം ഓടിക്കുന്നതിനിടെ ഭാര്യയോട് കലഹിക്കുകയായിരുന്നു. ഇതിനിടെയായിരുന്നു അപകടം നടന്നത്.

വാഹനത്തിന്റെ നിയന്ത്രണം നഷ്ടമായതിനെ തുടര്‍ന്ന് റോഡിലെ വളവില്‍ ഇടിച്ച് രണ്ട് വട്ടം മറിഞ്ഞു. വാഹനത്തില്‍ നിന്ന് അപകടത്തിന്റെ ആഘാതം മൂലം യുവതി പറന്നു പോയി എന്നാണ് സിസിടിവി ദൃശ്യങ്ങളെ ഉദ്ധരിച്ച് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്തത്.

അപകടം നടക്കുമ്പോള്‍ സ്ത്രീ മുന്‍സീറ്റിയിലായിരുന്നുവെന്നും സുരക്ഷാബെല്‍റ്റ് ധരിച്ചിരുന്നില്ലെന്നും പൊലീസ് സംശയിക്കുന്നു.യുവതിക്ക് കാര്യമായ പരിക്കുകള്‍ ഇല്ലെങ്കിലും പുരുഷന്റെ തലക്ക് പരിക്കേറ്റിട്ടുണ്ട്. കാറിന് ഗുരുതരമായ കേടുപാടുകള്‍ സംഭവിച്ചിട്ടുമുണ്ട്. ട്രാഫിക് പൊലീസ് ഉദ്യോഗസ്ഥരുടെ കണ്‍മുന്നിലായിരുന്നു അപകടം.