ശരീരഭാരം കുറയ്ക്കാന് ആഗ്രഹിക്കുന്നുണ്ടെങ്കില് ഉടന് ദുബായ്ക്ക് വിട്ടോളൂ.. ഒരു മാസത്തിനിടെ ശരീരഭാരത്തില് കുറക്കുന്ന ഓരോ കിലോക്കും ഓരോ ഗ്രാം സ്വര്ണം ലഭിക്കും!
മുപ്പത്തിനാലുകാരനായ ഫിലിപ്പൈന് പൗരന്, റോമല് മാനിയോക്ക് 10 ഗ്രാം സ്വര്ണ്ണം സമ്മാനമായി ലഭിച്ചു. പ്രവാസികളില് ആരോഗ്യ അവബോധം ഉണ്ടാക്കുന്നതിനായി ദേറയിലെ അല് ഗുറൈര് സെന്റര് പ്രഖ്യാപിച്ച ദുബായ് ഫിറ്റ്നസ് ചലഞ്ചില് പങ്കെടുത്താണ് സമ്മാനം നേടിയത്. 9500 ഓളം പേരാണ് ചലഞ്ചില് പങ്കെടുക്കുന്നത്. ഒരു മാസത്തിനിടെ ശരീരഭാരത്തില് കുറക്കുന്ന ഓരോ കിലോക്കും ഓരോ ഗ്രാം സ്വര്ണം സമ്മാനം നല്കുമെന്നായിരുന്നു പ്രഖ്യാപനം.
ഇതനുസരിച്ച് 30 ദിവസം കൊണ്ട് 10 കിലോ കുറച്ച റോമലിന് 10 ഗ്രാം ലഭിച്ചു. ഭാരം കുറച്ച് ഫിറ്റാകണമെന്ന് എപ്പോഴും ആഗ്രഹിച്ചിരുന്നെങ്കിലും സ്ഥിരമായി വര്ക്ക് ഔട്ട് ചെയ്യാന് കഴിഞ്ഞിരുന്നില്ലെന്ന് റോമല് പറഞ്ഞു. എല്ലാ ദിവസവും മൂന്ന് മുതല് അഞ്ച് കിലോമീറ്റര് വരെ നടക്കുന്നതായിരുന്നു പതിവ്.
ഫിറ്റ്നസ് ചലഞ്ച് പ്രഖ്യാപിച്ചതോടെ ഇത് 10 കിലോമീറ്ററാക്കി. ആഴ്ചയില് ആറ് ദിവസവും വെജിറ്റേറിയന് ഭക്ഷണങ്ങള് മാത്രമാക്കി. പഴങ്ങളും പച്ചക്കറികളും മാത്രം ആഴ്ചയില് ആറ് ദിവസങ്ങളും കഴിച്ചു. വാരാന്ത്യത്തില് ഒരു ദിവസം മാത്രമാക്കി മാംസഭക്ഷണങ്ങള്. ഇതിനുപുറമെ അവധിദിനങ്ങളില് അല് ഗുറൈര് സെന്ററില് സംഘടിപ്പിച്ചിരുന്ന സൗജന്യ ഫിറ്റ്നെസ് സെഷനുകളിലും പങ്കെടുത്തു.
റോമലിന്റെ മാറ്റം സുഹൃത്തുങ്ങള്ക്കെല്ലാം അത്ഭുതമാണ്. ദുബായ് കിരീടാവകാശി ശൈഖ് ഹംദാന് ബിന് മുഹമ്മദ് ബിന് റാഷിദ് അല് മക്തൂമിന്റെ ആഹ്വാനം അനുസരിച്ചാണ് ഫിറ്റ്നസ് ചലഞ്ചിന്റെ രണ്ടാം സീസണ് ദുബായില് സംഘടിപ്പിച്ചത്.
https://www.facebook.com/Malayalivartha
