നോര്‍ഡിലിന്‍ഗെന്‍ ജര്‍മനിയിലെ ബവാറിയ എന്ന സംസ്ഥാനത്തുള്ള ഒരു ചെറിയ നഗരമാണ്. ഒറ്റ നോട്ടത്തില്‍ ജര്‍മനിയിലെ മറ്റു പല നഗരങ്ങളെയുംപോലെ കല്‍ഭിത്തികളും ഓടുകൊണ്ടുള്ള മേല്‍ക്കൂരകളുമുള്ള നിരവധി കെട്ടിടങ്ങള്‍ തിങ്ങിനിറഞ്ഞ ഒരു സാധാരണ നഗരമാണിത്. എന്നാല്‍ ലോകത്തിലെ ഏറ്റവും തിളക്കമുള്ള നഗരമെന്ന് നാം നോര്‍ഡിലിന്‍ഗെനെ വിളിക്കും, ഇവിടത്തെ കെട്ടിടങ്ങളുടെ കല്‍ചുവരുകള്‍ ഒരു മൈക്രോസ്‌കോപ് ഉപയോഗിച്ച് പരിശോധിച്ചാല്‍.

കാരണം ഈ ചുവരുകള്‍ക്കുള്ളില്‍ ഒളിച്ചിരിക്കുന്നത് 72,000 മൈക്രോസ്‌കോപിക് വജ്രങ്ങളാണ്. ഏകദേശം 150 ലക്ഷം വര്‍ഷം മുമ്പ് ബഹിരാകാശത്തുനിന്നെത്തിയ ഒരു വലിയ ഉല്‍ക്ക ഈ പ്രദേശത്ത് പതിച്ചതായാണ് പഠനങ്ങള്‍ തെളിയിക്കുന്നത്. സെക്കന്‍ഡില്‍ 15.5 മൈല്‍ വേഗത്തില്‍ സഞ്ചരിച്ചിരുന്ന ഈ ഉല്‍ക്കയ്ക്ക് ഒരു കിലോമീറ്ററോളം വിസ്താരവും 300 ലക്ഷം ടണ്‍ ഭാരവും ഉണ്ടായിരുന്നു. ഈ ഉല്‍ക്ക ഭൂമിയില്‍ പതിച്ചപ്പോഴുണ്ടായ ഉയര്‍ന്ന താപവും മര്‍ദവും നിമിത്തം ഉല്‍ക്ക ഉരുകുകയും ഗ്ലാസ്, ക്രിസ്റ്റല്‍, വജ്രം എന്നിവ അടങ്ങിയ ഒരുതരം കല്ല് രൂപപ്പെടുകയും ചെയ്തു.

ലക്ഷക്കണക്കിന് വര്‍ഷങ്ങള്‍ക്ക് ശേഷം എഡി 898-ല്‍ ഇവിടെ മനുഷ്യവാസം ആരംഭിച്ചതായാണ് പഠനങ്ങള്‍ തെളിയിക്കുന്നത്. എന്നാല്‍ അന്ന് ഇവിടെ എത്തി വീടുവച്ചു താമസിച്ചവര്‍ക്ക് തങ്ങള്‍ ലോകത്ത് ഏറ്റവും അധികം വജ്രസാന്ദ്രതയുള്ള സ്ഥലത്താണ് താമസിക്കുന്നതെന്ന് അറിയില്ലായിരുന്നു. ലക്ഷക്കണക്കിന് വജ്രങ്ങള്‍ ഇവിടെ ചിതറിക്കിടപ്പുണ്ടായിരുന്നെങ്കിലും അവ നഗ്‌ന നേത്രങ്ങള്‍ കൊണ്ട് കാണാന്‍ കഴിയുമായിരുന്നില്ല.

തങ്ങള്‍ താമസിക്കുന്നത് എന്തൊക്കെയോ പ്രത്യേകയുള്ള കല്ലിന് മുകളിലാണെന്ന് പിന്നീട് മനസിലാക്കിയ നോര്‍ഡിലിന്‍ഗെന്‍കാര്‍ കെട്ടിടങ്ങള്‍ പണിയാനും മറ്റും ഈ കല്ലുകള്‍ ഉപയോഗിച്ചു. അഗ്‌നിപര്‍വത സ്‌ഫോടനത്തിലോ മറ്റോ രൂപപ്പെട്ടതാണ് ഈ കല്ലുകള്‍ എന്നാണ് ആളുകള്‍ വിശ്വസിച്ചിരുന്നത്. എന്നാല്‍ 1960-ലാണ് ഇത് ഒരു ഉല്‍ക്കയാണെന്ന് ലോകം തിരിച്ചറിഞ്ഞത്.

കാര്യം ഇത്രയും വജ്രക്കല്ലുകളൊക്കെയുണ്ടെങ്കിലും അവയുടെ വലുപ്പം 0.33മില്ലിമീറ്ററിലും കുറവായതിനാല്‍ അവയ്ക്ക് വിലയൊന്നും ലഭിക്കില്ല. അതുകൊണ്ടുതന്നെ തങ്ങളുടെ കെട്ടിടങ്ങള്‍ പൊളിച്ച് വജ്രമെടുക്കാനോ ഇവിടെ വജ്ര ഖനി തുടങ്ങാനോ ഒന്നും ഇവിടത്തുകാര്‍ മെനക്കെടാറില്ല. വജ്രത്തില്‍ തീര്‍ത്ത കെട്ടിടങ്ങളും ഉല്‍ക്കയുമൊക്കെ കാണാന്‍ നിരവധി വിനോദസഞ്ചാരികളാണ് ദിവസവും ഇവിടെ എത്തുന്നത്.