കിട്ടിയവര്‍ ആദ്യമൊന്ന് ഞെട്ടി, ഈശ്വരാ മനസറിയാതെ വല്ല കേസിലുംപെട്ടോ!? പിന്നെ കൈയില്‍ കിട്ടിയ കോടതി സമന്‍സ് ആശങ്കയോടെ വായിക്കാന്‍ തുടങ്ങി. പക്ഷേ, വായിച്ചു തുടങ്ങിയപ്പോള്‍ ഞെട്ടല്‍ പൊട്ടിച്ചിരിയായി മാറി. കൈയില്‍ കിട്ടിയത് കോടതി സമന്‍സ് അല്ല. കോട്ടിട്ട ഒരു വക്കീലിന്റെ കല്യാണക്കുറിയാണ്!

കോട്ടയത്തെ യുവ അഭിഭാഷകന്‍ അഡ്വ. വിഷ്ണു മണിയാണ് വ്യത്യസ്തമായ കല്യാണക്കുറി ഒരുക്കി ഏവരെയും ഞെട്ടിച്ചിരിക്കുന്നത്. കോടതിയില്‍നിന്ന് അയയ്ക്കുന്ന സമന്‍സിന്റെ അതേ രൂപത്തിലാണ് വക്കീലിന്റെ വിവാഹക്ഷണക്കത്ത്. ഒറ്റ നോട്ടത്തില്‍ കോടതി സമന്‍സ് തന്നെ. പേരും കുറിപ്പും സീലുമെല്ലാം അതേപോലെ.

വിവാഹങ്ങളിലും വിവാഹക്ഷണക്കത്തുകളിലും പുത്തന്‍ ട്രെന്‍ഡുകള്‍ പരീക്ഷിക്കപ്പെടുന്ന ഈ കാലത്ത് സ്വന്തം തൊഴില്‍ മേഖലയുമായി ബന്ധപ്പെടുത്തി വിഷ്ണു തയാറാക്കിയ ഈ ക്ഷണക്കത്ത് സോഷ്യല്‍ മീഡിയയിലും ജാമ്യം കിട്ടാതെ പറക്കുകയാണ്. ജനുവരി 13-നാണ് വിഷ്ണുവും ചിങ്ങവനം സ്വദേശിയായ അഡ്വ. അരുന്ധതി ദിലീപും തമ്മിലുള്ള വിവാഹം. എറണാകുളം ലോ കോളജ് മുതലുള്ള സൗഹൃദമാണ് ഇപ്പോള്‍ വിവാഹത്തിലെത്തി നില്‍ക്കുന്നത്.

സാധാരണരീതിയില്‍ കാണുന്ന സമന്‍സ് പോലെ തന്നെയാണ് ക്ഷണക്കത്തും തയാറാക്കിയിരിക്കുന്നത്. ക്രൈം  നമ്പറിന്റെ സ്ഥാനത്ത് ഇരുവരും പ്രണയത്തിലായ ദിവസവും സ്ഥലമായ ലോ കോളജുമാണ് ചേര്‍ത്തിരിക്കുന്നത്. ക്ഷണിക്കപ്പെട്ട കക്ഷികള്‍ എല്ലാവരും വീഴ്ചവരുത്താതെ അന്നേദിവസം 11-നും 11.45-നുമിടയില്‍ കോട്ടയം ഇന്ദ്രപ്രസ്ഥ ഓഡിറ്റോറിയത്തില്‍ എത്തിച്ചേരേണ്ടതാണെന്നും സമന്‍സില്‍ പറയുന്നു. അതിനു താഴെയായി ചേര്‍ത്തിരിക്കുന്ന സീലില്‍ കുമരകം കോട്ടയം ക്ലബില്‍ നടക്കുന്ന റിസപ്ഷന്റെ കാര്യമാണ് ചേര്‍ത്തിരിക്കുന്നത്.

തങ്ങള്‍ രണ്ടുപേരുടെയും ആശയമാണ് വ്യത്യസ്തമായ ഈ ക്ഷണക്കത്തെന്ന് അഡ്വ. വിഷ്ണു പറഞ്ഞു. ദിവസങ്ങള്‍ക്കു മുമ്പ് ഇരുവരും കോട്ടയത്തെ ഇന്ത്യന്‍ കോഫി ഹൗസില്‍ ഭക്ഷണം കഴിക്കാന്‍ പോയിരുന്നു. കഴിച്ച ശേഷം ബില്‍ അടയ്ക്കാന്‍ പണത്തിനായി പോക്കറ്റില്‍ കൈയിട്ടപ്പോള്‍ ആദ്യം കിട്ടിയത് ഒരു സമന്‍സാണ്. അപ്പോഴാണ്, ക്ഷണക്കത്ത് സമന്‍സാക്കിയാലോ എന്ന ആശയം ഇരുവരുടെയും മനസില്‍ ഉദിച്ചത്.

അപ്പോള്‍തന്നെ ഒരു ടിഷ്യു കടലാസില്‍ ക്ഷണക്കത്തിനായുള്ള വാചകങ്ങള്‍ കുറിച്ചു. തുടര്‍ന്നാണ് അത് ഡിസൈന്‍ ചെയ്യുന്നതിനായി നല്‍കിയതെന്നും വിഷ്ണു പറഞ്ഞു. വിവാഹത്തിന്റെ സേവ് ദ ഡേറ്റ് കാര്‍ഡും ഇത്തരത്തില്‍ കോടതിയുമായി ബന്ധപ്പെടുത്തി തയാറാക്കാനാണ് ഇവരുടെ പദ്ധതി. കുമരകം പഞ്ചായത്ത് അംഗം കൂടിയായ വിഷ്ണു കോട്ടയത്ത് പ്രാക്ടീസ് ചെയ്യുകയാണ് ഇപ്പോള്‍. വധു അരുന്ധതി ചിങ്ങവനം നെല്ലിക്കല്‍ സ്വദേശിനിയാണ്. ചങ്ങനാശേരി കോടതിയില്‍ പ്രാക്ടീസ് ചെയ്യുന്നു.