തങ്ങളെ ആമസോണ്, ഡെലിവറി 'ബോയ്സ്' ആയി അംഗീകരിച്ചുവെന്ന് ശിവയ്ക്കും ജെയ്സണും വിശ്വസിക്കാനായില്ല!
ശിവയും ജെയ്സണും. പെണ്ണായി ജനിച്ച്, ആണായി ജീവിക്കാന് തീരുമാനമെടുത്ത ഇവര്ക്ക് പുതിയൊരു കാല്വയ്പാണിത്. കളിയാക്കി ചിരിച്ചവര്ക്കു മുന്നില്... ജോലി ചോദിച്ചപ്പോള് അധിക്ഷേപിച്ചവര്ക്കു മുന്നില്... ഇന്നൊരു തൊഴിലുമായാണ് ഇവര് നില്ക്കുന്നത്. ആലപ്പുഴയിലെ ആമസോണ് ഡെലിവറി സര്വീസില് ബുധനാഴ്ച മുതല് ഇവര് ജോലി ചെയ്തു തുടങ്ങി.
കുടുംബശ്രീയുടെ ട്രാന്സ്ജെന്ഡര് സംഘടനായ ഷീറോസിനെ നയിക്കുന്ന അരുണിമ സുല്ഫിക്കറാണ് ഇരുവര്ക്കും ജോലി ലഭിക്കാന് സഹായിച്ചത്. ആമസോണിലെ അഭിമുഖത്തിന്റെ കാര്യം മമ്മി എന്ന് ഇരുവരും വിളിക്കുന്ന അരുണിമ, പറഞ്ഞപ്പോള് ആദ്യം തമാശയെന്നാണ് ഇരുവരും കരുതിയത്. പക്ഷേ മറ്റ് പല ഉദ്യോഗാര്ഥികളെ പിന്തള്ളി ഇരുവരും ജോലിയില് പ്രവേശിക്കുകയായിരുന്നു. പൊലീസ് സേനയില് ചേരണം എന്ന ആഗ്രഹം പിന്തുടരുന്നവരാണ് ഇരുവരും.
ജീവിതത്തില് പലതും നേടിയും നഷ്ടപ്പെടുത്തിയും 29 വയസ്സിലെത്തി നില്ക്കുമ്പോള് ശിവയുടെ മനസ്സില് നഷ്ടബോധം മാത്രമില്ല. കോമളപുരം സ്വദേശിയായ ശിവ ബികോം കംപ്യൂട്ടര് ആപ്ലിക്കേഷന് ബിരുദധാരിയാണ്. ചെറുപ്പം മുതല് തന്നെ ആണ്കുട്ടികള്ക്കൊപ്പം കൂട്ടു കൂടി ആണ്കുട്ടിയായി വളര്ന്നു. പ്ലസ് ടു, ഡിഗ്രി പഠന കാലത്താണ് താന് പെണ്കുട്ടിയല്ലെന്ന ബോധ്യം ഉറച്ചത്.
ട്രാന്സ്ജെന്ഡര് അവസ്ഥയെക്കുറിച്ചു പഠിച്ച ശേഷമാണ് തന്റെ വ്യക്തിത്വം വിളിച്ചു പറയാന് ശിവ തയാറായത്. പഠനത്തിനു ശേഷം വാഹന ഷോറൂമിലും ലുലു മാളിലും ശിവ ജോലി നോക്കി. അമ്മയ്ക്കു സുഖമില്ലാതായതോടെ ഏക മകനായ ശിവ തിരികെ വന്നു.
വലിയ കലവൂരില് താമസിക്കുന്ന ജെയ്സണിനും സമാന ജീവിത സാഹചര്യമാണ്. ബന്ധുക്കള് വടിയെടുത്തപ്പോഴും കൂടെ നിന്നത് അമ്മ മാത്രം. അമ്മ 'എന്റെ മൂത്ത മകന്' എന്നു വിശേഷിപ്പിച്ചപ്പോഴാണ് ഏറ്റവും സന്തോഷം തോന്നിയത് എന്ന് ജെയ്സണ്.
അമ്മ തന്നെ അംഗീകരിച്ചെന്ന...മനസ്സിലാക്കിയെന്ന ആഹ്ലാദം. പ്ലസ് ടുവിനു ശേഷം പഠനം അവസാനിപ്പിച്ചെങ്കിലും തുടര്ന്നു പഠിക്കണമെന്നും കാക്കി അണിയണമെന്നും ആണ് തീരുമാനം.
https://www.facebook.com/Malayalivartha
